Siman Ukurenta
Oleh
Mathias Berahmana
IBAS kegeluhen kalak sierkiniteken pasti ngaloken pasu-pasu simbelin, silanglangna sekali lah gia.
Ibas pasu-pasu simbelin e ipetangkas pagi pendungina, apakah akapna kin ban beluhna, entah igejapkenna pasu-pasu e pemere idur Dibata nari.
Turi-turin sekalenda agak mberat sitik, e pe kerna erlajar arah Saul ras Daud. Saul kalak sila penting tapi itangkuhken jadi sekalak raja.
Ibahan Dibata ia mersik naluken bangsa sideban. Tapi dungna erkadiola TUHAN erkiteken ate-atena banna, lanai ngikutken pedah (1 Samuel 15 : 10a).
Arah buahna teridah bibit e, unggul entah tungkul. Gendek ranan, iurapi Nabi Samuel permakan gantiken Saul.
Daud sekalak permakan. Karakter permakan, meteruk ukur sue ras pengidah kalak nandangi ia; perkeleng ngasuhi rubia-rubiana, persabar sebab arus meseksek ngajarken rubia-rubiana erkiteken la seri bahasana.
Sumber Photo : https://commons.wikimedia.org/wiki/File:DavidtheShepherdBoy.jpg
Man siksiken situhuna, engkai maka adi manusia merawa, pakaina bahasa rubia-rubia. Apakah adi rubia merawa, ia pe ngisak-ngisak?
Gendek ka siban take cuanta. Daud singgejapken pasu pasu idur Dibata nari, labo banna simeriah-meriah guna dirinta tapi simeriah-meriah guna TUHAN eme enggalari utang pengataken bujur.
Kaikin utang sila iperdiateken Saul? Eme ngulihken peti perpadan ku inganna i Jerusalem (1 Kronika 13:3).
Peti perpadanen e encidahken kuasa Dibata ibas sejarah Israel, masa keluaren Mesir nari ku Taneh Kanaan.
Ukurenna labo galang, ganjangna 114 Cm ras mbelangna 68 Cm. Tutupna lempengen emas melambangken tahta kemulian, dua kerubim ersayap siala-alan natap ku tutup peti nandaken kemulian Yahwe.
Isina sipemena eme guci emas (lambang pasu-pasu) sijadi ingan manna. Sedekah 40 tahun manna ei me pangan kalak Israel.
Sipeduaken, tongkat Harun (kuasa Dibata). Adi tongkat ningen, lanai batang-batang, enggo serap ras taneh. Tapi tongkat Harun e lalap ertunas nuduhken maka nggeluh denga. Tongkat ei siipekpekken Musa gelah kerah Lawit Merah.
Sipeteluken eme loh batu, bekas tan Dibata nuratken 10 pedahNa. Perban sakralna, sekali setahun ngenca banci imam agung ngenen peti perpadanen ei ibas ruangen maha kudus.
Raja Saul la pernah erdiate kerna peti perpadan e. Enggo 30 tahun abu-abun ibas gudang rumah imam Abinadab. Adi nina kalak Jakarta, ade same gak ade, same aje.
Tapi kai sijadi, waktu ibaba peti perpadanen ndai ku Jerusalem, lit kejadin si erbahan kerina kalak sengget ras biar-biaren.
Rumah Abinadap jarakna 11,3 Km ku Jerusalem. Peti perpadanen ibaba alu gereta lembu simbaru.
Dua anak Abinadap sitergelar Ussa ras Ahio simabai gereta, iarakken Daud ras 30.000 kalak alu rende, landek rikut sora kulcapi, murdap, gendang, genta, bagepe calayak (2 Samuel 6 : 5).
Kenca seh ipengeriken Nakon, jarakna sekitar 3,2 Km ibas uruk-uruk rumah Aminadab nari ku Jerusalem, celus lembu ndai.
Ergeser peti perpadanen e. Mis idadaken Ussa tanna gelah ula ndabuh atena. Rempet me ije mate Ussa. Mulai paksa sie ingan kejadin e igelari Peres Ussa.
Sekalenda siman ukurenta, ngeri-ngeri sedap, mberat-mberat enteng, emaka man silenga ngopi, ban lebe kopindu maka terusken ngukurisa.
Adi siman ukuren turi-turin kalak Karo, adi ngopi, kopi Karo lah inem, gelah pas kal nanamna. Iyak siterusken ka.
Engkai maka Ussa mate? Ia pe sekalak imam kang? Arusna ma ietehna aturen. Tapi enggo gelgel akapna. Perban ras peti e rusur ije lanai akapna ernanam. Pediatna abu-abun bas Gudang.
Sue ras aturen perentah Musa, maka peti perpadanen arus ilanja (1 Kronika 15 : 15). Ussa selaku kalak Lewi siarusna ngeteh kerna aturen e, ibahanna mabasa alu gereta lembu. Lanai igejapkenna kemulian Dibata e. Teridah, lanai ia mbiar man Dibata.
Belas-belasna man jemaatna banci saja kuasa Dibata e mbelin tapi sebo perbahenna bagi kitik nge Dibata e. La tempa erkuasa Dibata e ibahanna.
Ussa enda inganta ercurmin, ula ninta empermualiken Dibata tapi ate-ateta saja siban ibas rumahNa sibadia.
Adi cakap mulia, mulialah perbahanen. Nanam kemulian e igejapken roh silit ibas dirinta.Kemulian e erbahan malem ate pusuhta.
Adi bage berkat ku gereja, ikut kebaktin, bage ka mulih, ei la nggejapken kemulian Dibata.
Mait Ussa ngingetken gelah kita pedauh perbahanen sila mehamat man Dibata. Nenlah, melala gereja mate, pusuh jemaatna mbergeh, erkiteken lanai igejapken kesakralen i rumah Dibata sibadia.
Ussa lanai ersikap lako ngelai Tuhan, lanai ibersihkenna dirina alu mindo pengampunen, emaka labo akapna dalih hadirat Dibata itamaken idatas gereta lembu.
Ngidah imamna mekarus, entah mbarenda jemaat Ussa e pe bage. Enem wari erbahan dosa, wari pepituken mindo pengampunen.
Man kai repot-repot nembah Dibata, pakai saja kalung salib ibas kerahung ma iarak-arak Dibata gia dahin pekiak-kiak kalak.
Ei gia mulihken kita ku pemasu-masun simbelin ndube. Saul sekali ngenca alokenna pasu-pasu simbelin erkiteken lanai patuh man Tuhan.
Daud tercatat ibas sejarah selaku raja simbelin. Engkai? Iambiar man Dibata. Buah pemena ibas pasu-pasu sialokenna mis ipehagakenna Dibata, alu ngulihken peti perpadanen, emaka ndekah kerajanna ipasu-pasu seh pe ku kesusurenna.
Ibahan Daud dirina jadi usihen segelah rakyatna pe mehamat ras patuh man Dibata. Alu Bahasa sigundari, ipemedak Daud kiniteken rakyatna.
Endam siman ukurenta, ndigan silakoken bagi Daud. Erbahan erbahan kebangunen rohani entah KKI (Kebaktian Kebangunan Iman) alu cara sigundari. Ula pandemic erbahan kita cebuni. Mari siulihken peti perpadanen ku gerejanta sekalak-sekalak.
Salam mejuah-juah i Karawaci Simalem nari (5/1/2022)
Komentar