SIMAN UKUREN
Pt Mathias Berahmana
PEDAH nini bulang, adi nangkih batang kayu, ula meganjangsa. Adi ternangkihi ku puncakna, labo dalih, saja ula ndekahsa natap. Angin silumang enjoleken, banci terlena piah ndabuh.
Pedah nini bulang e lit perpayona. Ibas ingan simeganjang nari, sora siteruh sapso terbegi, lanai jelas. Pengenen pe sambar. Enggo kitik teridah nini bulang ras nini tudung. Lanai terbedaken siapai sierlebuh, nini bulang entah nini tudung.
Bagem percelus Raja Daud. Ibas sada wari nandangi ben wari, keke ia inganna medem nari. Lawes ia ku datas tarum istana. Iidahna sekalak diberu sangana ridi. Seh kal jilena diberu e (2 Samuel 11 : 2).
Nai ingan ridi lenga ertarum. Arah ingan simeganjang teridah tapin kalak. Bedana ras gundari, ingan ridina enggo ertarum, jelmana ka la ertarum. Tande me pelakor (perebut laki orang). Adi sidilaki siban saja gelarna BBO (begal bini orang) bagi sinilakoken Daud.
Enda kepeken erti peringeten nini bulang ndube, megermet ibas ingan simegajang, sabab ije nari kai pe banci idah. Adi ndekah natap banci tehtehen.
Engkailah maka nini bulang e la nggeluh ibas zaman Daud, gelah persingetina min ndai. Tapi orong lebe, kepeken lit nge siempersingetisa maka diberu e gelarna Batseba, anak Eliam, ndehara Uria, kalak Heti (Ayat 3).
Kata tuhu kal kepe sibelasken nini bulang, maka ibas ingan simeganjang nari lanai jelas kal pembegi ban isapsoken angin silumang e. Ipersingeti nge Daud e tapi penggejapenna iingeti.
Ndabuh Daud. Perdabuhna ku ingan medem. Jadi me sila arusna jadi. Ersada kula ia ras Batseba, ndehara prajuritna.
Sumber photo : https://mybestwriter.com/analysis-of-the-david-bathsheba-story/
Dungna erkadiola kang anak singuda e. Tapi enggo lonceng, gerbang sekolah itutup ras ijaga PS. Mberat akap Daud ertangkel perban mberat betis Batseba. Sentabi, sipake bahasa Pajak Pringgan, mau enak tapi enggak mau anak.
Kepeken dosa nukah kal partus. Kenca erdosa Daud erkiteken ersada ras ndehara kalak, tubuh me dosa termejinen, eme erpekat lako meneken kesah Uria.
Iihhhh….. ihhhh… uga kal nge firasatndu e Daud. Lanai begikenna kata ise pe. Isorongken me prajurit simelias ndai ku sabah peperangen simberat, mate kena lembing si Uria.
(Situhuna enggo kote kula kami nerusken tulisen e. Ermorah ate kal kami nandangi Uria ras ersegat ate man Daud. Engkailah maka ia kudatas tarum pe. Adi la ndai kudatas tarum, ma la idahna si molek. Ma la min ndai lit simate. Padin min ndai Daud e seh naluken Goliat saja, ma ngena lalap ate jelma sinterem. Enggo ermindai).
Bage gia pala-palai ka yah nerusken turi-turin kegeluhen Daud e segelah lit tampukna. Kepeken, adi ganjangen siakap kita asangken kalak sideban, tabiat sijadi eme reh pasekna mbegiken kata.
Adi ndube ikataken kal gelar Uria punana si Batseba e, ma tanda peringeten kal nge segelah ulanai usur-usur Daud. Bagem mekatep, sora teruh nari lanai begiken si datas e. Perpasek-pasekna bana.
Kisah Daud ras Batseba labo saja soal nafsu rubia ibas manusia, tapi ngerana kerna kekuasaan. Kenca 20 tahun erkuasa, lupa Daud ia pernah jadi permakan, buronen, nipu imam gelah dat nakan.
Emaka enggo payo pengaloi Presidenta Joko Widodo, cukup dua periode saja, segelah tetap napak nahena ku taneh. Sitotoken gelah sigantikensa pagi kembarenna. Alu bage la encedai demokrasi.
Siban kuan-kuanna yah: adi ndekahsa i awang-awang erbahan kalak lupa daraten ras lanai nginget lawiten. Salomo, anak Daud ras Batseba pe erbahan kuan-kuanen kerna ulah bapana e.
Nina ibas Kuan-Kuanen 16 : 18, “Kegombangen mabai ku kebenen, keganjangen ukur mahanca guling nge.”
Dibata pe ciga kal atena nandangi kalak simeganjang rukur. “Nembeh ate TUHAN man kerina kalak simeganjang rukur, janah la ipelepasNa ia pulah ibas ukumen nari.” (Kuan-Kuanen 16:5).
Kai ukumen sijadi nandangi Daud sienggo meganjang rukur, terdauhen siorati ibas wari sideban. Ertima janah tertinggel-tinggel kam.
Adi nina nini bulang, keteruken rukur e eme kikik nipena kiniteken. Kalak simeteruk rukur, tentu mehamat dingen erkemalangen ia man Tuhan, ulihna ibereken Dibata kepentaren man bana (Kuan-Kuanen 1:7).
Em situhuna tambar bisa ibas kegeluhennta: meteruk rukur. Mari sidalanken.
Salam mejuah-juah i Karawaci Simalem nari (7/1/022)
Komentar