SIMAN UKUREN
Pt Mathias Berahmana
ROMBONGEN kalak Midian sinukur Jusup alu erga 20 duit pirak seh i Mesir. Jusup ibaba ku tiga pelelangen budak. Ipecinder ras budak-budak sideban.
Kulit nahena pecah-pecah erdareh. Melket kal dagingna perban erdalan ndauh janah la enggo jumpa lau peridin erminggu-minggu.
Melehe, muas, ipandangi erbage jelma, mela la termelaken, la lit sirate mekuah.
Mata sinukur tempa nelen Jusup atena. Itarik tarik kalak bukna mastiken lit tah lang kutuna, lit ka sinustusi awakna lako ngeteh sehat entah pinakiten budak e. Sura-sura sinukur jumpa budak simegegeh lako itenggalaken.
Sumber Photo :
La ndauhsa bagi pajak lembu Sukarame. Ipekpek pekpeki daging lembu e gelah taksiren ndeher ras beratna.
Enggo pe mbohhh… nina lembu janahna tehtehen ngataken mesui entah megamang akapna, ikidik-kidik denga daging peliturna.
Kenca sie itatap ka piga-piga kali nari maka ibelasken penawaren erga. Emaka itulisken merga sinukursa ibas daging lembu tanda enggo lit empuna.
Ibas daging Jusup itulisken gelar Potifar. Ibaba ia ku rumah Komandan Pengawal Istana Firaun. Iperidi, ibere baju sibersih, andiko seh kal paguhna dagingna dingen rupana pe mejile (Kejadin 39:6).
Bage dekahna teriluh, ndauh rumah nari, la lit sima-sima, banci ridi saja enggo sada kemalemen ate man Jusup.
Mbages lubang man bentasen, embang la ertampuk, si sada endalanisa, la lit arapen enggeluh; tapi jadi bagi kiniteken Jusup maka ibas paksana pasti reh penampat Dibata.
Bandung tahun 1983. Kabanjahe seh dauhna. Lenga melala tandai kalak Karo. Piga-piga wari la jumpa pangan seakaten lau matah.
Lit kalak ngambekken gulen melus ku ingan sampah Pasar Pagi Sukajadi, em ibersihken, la lit adumna bawang la cina tapi nanamna meketket mekeletu.
Erlajar kenek angkot Ledeng-Cicaheum ras merga Simamora, supirna bujur tapi kenekna bendil lalap matana perban mbiar dahinna pindah tan.
Jumpa angkot kalimbubu Purba mergana jurusen Sarijadi-Ciroyom emaka enggo iakap pergeluh bagi jelma. Soniarap kalimbubu ndai mekatep ka la kutiga, pindah ka ku supir kalak Cina.
Kenek tunduh bas angkot, bergehen ras biaren perban ibas berngi singongo la lit lampu iduru kuta rumah supir. Bage ialoken jadi tata usaha merangkap koster GBKP Bandung, enggo ernanam geluh ni baba.
Lanai melungun, lanai lumben, lanai muasen, ernanam kal ngerana ibas bahasa si seri, siangkan. Tuhu kal kiniteken Jusup maka ibas paksana pasti reh penampat.
Rikutken perdalanen geluh Jusup, kiniseran erbahan ia erpengangkan. Pengendesenna man Dibata enjadiken ia pentar.
Jusup erpemeteh janah pentar. Kalak erpemeteh lenga tentu pentar tapi pentar meteh kai siman pesikapen.
Kepentaren igejapken ibas persadan ras Dibata.
Bagi nina Rasul Paulus, si tuhuna Dibata e labo ndauh ibas kita nari sekalak-sekalak (Perbahanen 17:27b)
Si paksana bangger i rumah entah i rumah sakit, la kam sisada, situhuna deherndu e kap Dibata. Pindolah perkuah ateNa.
Sipaksana naruhken kekelengenna ku ingan pengadi-ngadin, nehenlah deherndu lit Dibata. IetehNa suindu. Bagi pertangisNa ibas kematen Lasarus, ietehNa nanam itadingken. Apusi iluhndu.
Dibata mereken dalan pulah man Jusup. Kami pe enggo nanamisa maka ibas kiniseran, ibas kelungun, idudurken Dibata kemalemen ate bagi siniberekenNa man Jusup (Kejadin 39:2).
Ola sangsi. Mbages kal penandai Dibata kerna tinepaNa. Aku la kutandai bangku tapi Dibata tandaiNa aku janah gelarku lit ibas tanNa. Gelarndu pe tersurat ibas tan Dibata.
Raja Daud ngataken maka ija pe lit Dibata. Adi nangkih aku ku langit, enggo Kam ije. Adi aku medem ibas doni kematen, Kam pe ije (Masmur 139:8-9).
Ibas kutana Jusup ernipi, ibas kuta sindauh, Mesir, geluhna ipasu-pasu. Ija pe Jusup ije lit Dibata. Jusup e kam ras aku.
Salam mejuah-juah i Karawaci Simalem nari (29/1/2022)
.jpg)
Komentar