SIMAN UKUREN
Pt Mathias Berahmana
KUNE iputar rekamen kaset kerna kegeluhenta, pita siapai nge ateta situtung gelah ula idah cungikta. Sabab ibas rekamen e jelas kerina cungik-cungik perbahanenta detik per detik.
La lit siterligen. Paksa rukur ras erkesah saja pe jelas gambarna, apai ka waktu sitayap anak kalak, perdalanen tanta seh ku ayona e pe jelas kal, tempa-tempa slow motion.
Tuhan ngidah Daud naluken Goliat, Tuhan ngidah waktu ia tehtehen natap Batseba idatas tarum istana. Ngidah Daud ersada kula ras Batseba, ngidah paksa anak emas Betlehem e ersura-sura muat kesah Uria.
Jelas kal man Tuhan sora Daud waktu merentahken panglimana gelah namaken Uria, perbulangen Batseba, ku sabah peperangen alu tujun segelah saingen e mate meratah.
Kerina siibas istana banci saja natap Daud ras Batseba sempabu bagi Romeo-Juliet, Darmendra-Hemamalini, Galih-Ratna, entah pe Dilan-Milea. Uga kin keluarga siipasu-pasu Dibata, bage tampak.
La lit teridah man kalak tengguang dosa siicibalken Daud ibas umurna si pe-50-ken. Tapi ibas Dibata lit rekamenna. “Kai sirakutindu i doni enda, i Surga pe enggo kap irakuti; kai siosarindu ibas doni enda, i Surga pe enggo kap iosari.” (Matius 16 : 19b).
Daud-Batseba banci muniken ciningna alu bedak rikutken cirem gula tualah ilebe-lebe jelma sinterem. Tapi kebenaren pasti gergoi.
Perdateken lagu Daud paksa rende tengah berngi singongo. “Tupung la kuaken dosa-dosangku, kote aku perban ndehereng tep-tep wari. O TUHAN, iukumndu aku suari berngi, keri gegehku bali ras remang kena las wari.” (Masmur 32 : 3 – 4). Tangis teriluh kal ia.
Getem kal pusuh Daud. La gia rere imenna, teridah selpat kal pusuhna. Raja sijago strategi, raksasa Goliat pe italuken, ihamati melala bangsa, lit kang paksana kote ras ndehereng.
Sumber photo : https://essentialchurch.net/
Jambe isuan, duri siturah, perban ipersilahangna Dibata. Tersurat ibas 2 Samuel 11 : 27, “Kenca paksa erceda ate enggo lepas, isuruh Daud ia reh ku istana, iempoina Batseba emaka ipupusna sekalak anak dilaki. Tapi la ngena ate TUHAN kerna kai siibahan Daud e.”
Adi la ngena ate TUHAN, kai banci jadi? Kai pe banci jadi! Anak hasil BBO (begal bini orang) ndai sakit mekelek, erpuasa pe Daud janah gedang-gedang berngi pedemkenna bas lante, la diate TUHAN. Kenca sada minggu mate me anak ndai.
La sibar anak BBO e ngenca ukumen TUHAN man Daud. Erkiteken sie, nina TUHAN, ibas tiap tingkat kesusurendu tetap lit piga-piga kalak simate ibunuh sabab ihinandu Aku janah enggo ibuatndu ndehara Uria (2 Samuel 12 : 10).
Perban pedang ibahan Daud endungi kegeluhen Uria, pedang ka ulihna man keluargana. Anakna pe sibunuhen. Kerna sie siorati terdauhen ibas kesempaten sireh.
Banci nge siidah maka perbahanen Daud e kinata ibas sekelewetta? Anggota keluarga sibunuhen, rebut kuasa/warisen, sirang anak jabu, narkoba, perjudi, mabok-mabok maka akapna meriah bagi anak-anak Daud.
Lit pedah Job (4:8) siman tinggelenken, nina, “Si asa kuidah, kalak sinenggalai juma kejahaten, singerdangken benih lagu la uli, e ka nge peranina.”
Emaka endapeti taneh la ersuki Daud. Tapi je kap je, lit bedana kalak sierkemalangen sipaksa kote ras kalak si la erkineteken man Dibata.
Kalak sierkiniteken, tetap nge lit sora pusuhna singerana, ngingetken gia taneh e la ersuki tapi cubakenlah iperjumai.
Icubaken Daud erjimpuh. “Enggo aku erdosa man TUHAN,” nina erkelangken nabi Natan siisuruh Simada Kuasa endahi Daud ku istana.
Minter ialoi nabi Natan, “TUHAN enggo ngampuni kam, la kam mate.” (2 Samuel 12 : 13).
Situhuna simpel kal geluh enda iban Dibata. Akui Daud dosana, mindo ampun ras robah ia, mis ialemiNa.
Amin pe buahna melala batu rintik man bentasen, tek Daud maka ibas paksana lit nge ulih robah. Ije pagi terbelas nge kata: haleluya.
Daud enggo endalanisa ras pang ia ngatakensa bage. “Bagi dauhna Timur i Barat nari, bage me ipedauhNa dosa-dosanta ibas kita nari. Bagi keleng ate bapa man anak-anakna, bage kal me pengkelengi Dibata kalak sierkemalangen man baNa.” (Masmur 103 : 12-13)
Dibata keleng atena anak-anakNa, keleng kal ateNa Daud, bage pe Daud keleng atena singoge turi-turinna enda. Emaka nina man banta, “Ulanai pejangjang ukurndu, robahlah sope merawa Dibata. Please….”
Salam mejuah-juah i Karawaci Simalem nari (8/1/2022)
.jpg)
Komentar