SIMAN UKUREN
Pt Mathias Berahmana
Enggo termurmur ku belang-belang kuta maka kalak Karo mesera kal cendeh i tengah-tengah kesain simbelang erkiteken tinali gasingna sada ngenca.
Mekatep nge pendeh tapi la jing jing. Paksa pendeh ipujiken teman, tapi adi mbewat, la lit sinatangsa, padahal lit merga silima sibanci nampati pepinjamken tinalina.
Sada dareh pe mekatep sicianen, apakai sada merga, reh langna ka adi ngarapken merga siempat. Emaka rusur kal cencen gasing sierdeping e. Cendeh di tempat nina kin.
Bagi Saul, sengkebabah ranan ngenca ibelasken perkolong-kolong singalor lau nari, enggo erupsi deleng sinabunna.
Tupung Daud mulih kenca munuh Goliat, ndarat me diberu tep-tep kuta, ngalo-ngalo Raja Saul. Iendeken ende-enden alu ergendang ras engkuit kulcapi (1 Samuel 18:6) .
Rende me perkolong-kolong sidiberu erbalas-balasen. Nina, “Ibunuh Saul meribu-ribu tapi ibunuh Daud erpuluh-puluh ribu.”
Sumber Photo : https://www.cendananews.com/
Mis mulgap kikik nipe Saul si sedekah enda sikap cebuni ibas pusuhna. Mulai wari ei nari bagi rimo mukur la sahun ipangirken e ayo Saul.
Kikik nipe pe kepeken banci mbelgek. Lit 6 kali irencanaken Saul munuh Daud. Paksa Daud engkuit kulcapi, ipantem pulahken Saul lembing tapi dua kalina isilahken Daud.
La erdalan lembing, ipedalan Saul taki macik. “Banci empoindu anakku si Mihal alu batang unjuken 100 jukut sunaten kalak Pilistin,” nina.
Naluken 1 Pilistin bagi Goliat pe mesera, enda pindo Raja ka 100 siman bunuhen gelah banci buat jukut sunatenna. Ate Raja gelah mate anak emas Betlehem e i medan perang.
Kai sijadi? Ibereken Daud beliganna dua kali lipat eme 200 jukut sunaten. Lit piga-piga nari rencana jahat Saul nandangi Daud, emaka oge tuntas lah kari 1 Samuel 18 seh ku 1 Samuel 24.
Adi ifilmken, jadi 4 episode e. Ija kari 85 imam sibanci atan maba epod pe ibunuh alu perentah Saul erkiteken iberena nakan man Daud sipaksa lompat berteng.
Adi salah benana nina sinuria, pasti rontang pendungina. Cian ate nutung pusuh Saul erbahan lanai pernah jore ukurna. Gergoi lalap pusuhna gia la megatel.
Lapuas ia gia enggo merutu Daud cebuni i deleng-deleng, atena min seh melinang. Ijendam turah kuan-kuan kalak Karo, melinang simerutuna.
Sengkebabah ranan mujiken Daud kal ngenca bena benana, ceda pusuh kalimbubu. Cian ate Saul. Cian = Saul. Saul e mekatep jadi sembuyak ibas diri kalak Karo. Sembuyak ei rusur baba ku kerja-kerja.
Erdemu bayu ningen, ban reh ije Saul, enggo erdemu layu. Kurle sukut bas anak beru singerontangi. Kugereja pe siatanken ka.
Rontang ukur meriah. Haleluya hosana nina perkolong kolong, ibalas perkolong-kolong sideban ka alu muji-muji Saul.
La ndauhsa bagi perukuren kepiting. Sicianen. Ise sikudas, mis tarik temanna nusur. Emaka mesera kal kepiting banci pulah, seakatan sisada kepiting e ibas keranjang.
Salam mejuah-juah i Karawaci Simalem nari (4/1/2022)
Komentar