SIMAN UKUREN
Mesikel Engkelengi
RITME jantung lanai stabil. Pembuluh dareh enggo melket. Dokter nganjurken kateterisasi. Kami endalani pasang ring dua tahun si lewat.
Ibas warina, dokter ras telu asistenna masukken dua alat ku jantung arah pembuluh dareh tan si kemuhen. Alat sipemena kamera singerekam pembuluh dareh ku monitor. Kami baci ndedah pembuluh dareh e ibas televisi.
Alat sikedua, erdahin guna nutung simelket-melket. Gedang pembuluh dareh 100.000 Km, dua kali gedang doni. Kepe ibas sada ingan saja sumbat baci mis iket kambal-kambal e.
Seh teremna kalak sindalani bage. Tep-tep tahun sekurang-kurangna 50 juta kalak mate perban penakit jantung.
Buen simate perbahan penakit jantung asangken terpapar covid-19. Ibas periode terganas covid-19, simate 45 juta sebelang-belang doni, buen 5 juta si sakit jantung.
Sumber Photo : https://biologicallyblog.com/
Gia nina dokter kami labo terpapar penakit jantung tapi melket pembuluh dareh sierbahan terjadi serangen jantung. Damparna seri; baci mate rempet.
Andiko man kelengen kal kap pembuluh dareh e. Megamang pe iakap kenca meteh maka gedang pembuluh dareh e dua kali doni. Gedang Jakarta-Medan la dum 2.000 Km, enda 100.000 Km.
Untung denga kap dua ring ngenca si man pasangen. Adi tiap meter min ndai sumbat, ise nari ngasup ngolangisa?
Pembuluh dareh sempabu ras pusuh. Paksa dokter nutung simelket ibas pembuluh dareh lako masang ring sipemena; turah kenca kebiaren, mis lanai tertembus alat si canggih ndai.
Sumpama sinuan-sinuan, sibanlah putri malu, melus bage ikuit. Bagem sensitifna organ tubuh e ku pusuh. Erkiteken piga-piga kali ikuit kebiaren, melus pembuluh dareh, proses kateterisasi meletlet.
Enggo telu jam lenga tertembus ku batang belinna. Lanai saber dokter ndai. Asistenna pe roga. “Adi la kam baci tenang, ku perpedem kam gundari,” nina dokter ngataken tindaken pembiusen.
Reh biarna ka kami adi endalani kateterisasi ibas la sadarkan diri. Emaka mindo waktu gelah ertoto sekali nari, manjar-anjar muji Tuhan alu ngendeken lagu Kumasuki GerbangNya.
Pusuh positif. Maler percaya diri. Lanjutken katerisasi, lancar. Terpasang ring pemena. Perban ndauh kebiaren, dalanna pe enggo mejile, pemasangen ring sipeduaken lanai ndekah, sekitar 15 menit ngenca.
Waktu rende muji Tuhan ndai, Kesah Sibadia maler. Dung pasang ring ndai, lupa Kesah Sibadia, njoler biak petua-tuaken.
Reh ning kami man dokter, “Adi enggo dung tutungndu si jahat ibas pembuluh darehku e, baci kang tutungndu sel-sel jahat ibas diriku?”
Tawa dokter ndai, nina njababsa, “Adi siena la itanggung asuransi. Dibata ngenca ngasup nutung dosa ras simelket ibas dirindu. Man Dibata, la pe lit asuransindu, nggit IA nutungsa.”
Payo kal, kateterisasi itanggung asuransi. Dua ring man pasangen, ndarat ibas rumah sakit nari, man tebusen sekitar Rp186 juta.
Merga kal kap pembuluh dareh e. Pasang ring saja ratusen juta. Gedangna 100.000 Km. Sibayak namura doni pe labo ngasup galarisa adi tep-tep 1 meter man pasangen ringna.
Pengusaha Amerika Serikat, Elon Musk, simbaru enda jumpa ras Presiden Joko Widodo, siban contohna. Pendiri Tesla enda sibayakna gundari i doni. Ertana lit Rp3.144 triliun.
Kune pembuluh darehna macet tep-tep 1 meter. Tiap ring regana Rp80 juta. Sidat angka 8.000 triliun eme Rp80 juta x 100.000 Km.
La bias ertana e. Adi sibayak namura pe la ngasup, sikelengilah pembuluh darehta alu ngurangi lemak, minak, ras adumna simelket.
Emaka biasana adi kalak enggo pasang 5 – 7 cincin ibas pembuluh darehna, ianjurken segelah bypass.
Bagem mehergana dirinta ibahan Dibata. Pembuluh dareh denga pe regan asa erta Elon Musk. Lenga ka jantungta, paru-paru, ginjal, ate/hati, syaraf, sel, ras melala denga kal organ sideban.
Bage kal regana tapi Dibata la pernah ertaktak apai ka mindo galar. Sada kal rusur sipersingetiNa man banta segelah erkeleng ate bagi IA engkelengi kita.
“Kelengilah temanndu manusia bagi kam ngkelengi dirindu.” (Matius 22 : 39b).
La menukah engkelengi. Mbiar, mela, ntah la kin kita erdiate. Bagi dokter ndai, labo ia nggit adi la kin itanggung asuransi.
Tapi wari enda, bagem perentah Tuhanta Jesus Kristus man banta: mesikel lah engkelengi.
Adi melket perdalanen temanta, sipasang lah ringna alu empersingeti ibas kekelengen, segelah geluhna la kena serangen jantung.
Salam Pt Mathias Brahmana (11/6/2022)
.jpg)
Komentar