Catatan Tambahan PJJ 19 – 25 Juni 2022, Kami Ngulihkenca Ngenca.

 

1 Kronika 29 : 10 – 14

Thema : ERTA RAS KEBAYAKEN IBAS TUHAN NARI

1 Kronika 29 : 10 – 14

 29:10    I adep-adepen kerina perpulungen e ipuji Daud TUHAN nina, "TUHAN Dibata nu nini kami Jakup, terpujilah Kam asa lalap seh rasa lalap.

29:11     Kam kap si mbelin, Kam kap si terberita, Kam kap si mulia, Kam kap si mehulina dingen Kam kap si Mada Kuasa. Kerina langit ras doni Kam si madasa, Kam kap raja, pemerentah i babo kerinana.

29:12    Kerina erta-erta ras kebayaken rehen i bas Kam nari nge; Kam merentah kerinana alu kuasa ras gegehNdu. Janah Kam ngasup erbahan kalak jadi si mbelin dingen erkuasa.

29:13    Genduari O Dibata kami, ikataken kami bujur man baNdu dingen ipuji mulkami gelarNdu si Mulia!

29:14    Sabap bangsangku ras aku tuhu-tuhu la ngasup mere man baNdu, sabap kerina ialoken kami i bas Kam nari nge, janah kami ngulihkenca ngenca man baNdu kai si enggo iberekenNdu man kami

.Fakta

1.    Iade-adepen kerina perpulungen ipuji Daud Tuhan alu kata kata si she kal jilena.  Pujin si ipeseh Daud man Tuhan sekaligus pengakun nandangi kemuliaan ras kinihagaan Tuhan, sekaligus pe pernyataan uga belinna keleng ate Tuhan e man bangsaNa… Mejile kal kata kata si irangkai Raja Daud e…

TUhan Dibata nu nini kami Jakub, terpujilah Kam rasa lalap she rasa lalap

Kam kap si mbelin

Kam kap  si terberita

Kam kap si mulia

Kam kap si mehulina

Dingen kam kap si mada kuasa

…

La lit sada pe raja si beluh ngerangkai kata bagenda jilena

2.    Iakui Daud bahwa, kerina arta arta ras kebayakenna, ras kebayaken bangsana reh ibas Dibata nari.

3.    Pengakun enda me dasar ikataken Daud bujur, (rasa syukur dan terima kasih) man Tuhan Dibata.

4.    Ibelasken Daud kata kata si sangat super teologis nina, “sabab bangsaku ras aku la ngasup mere man Bandu, sabab kerina ialoken kami ibas Kam nari nge. Kami ngulihekensa ngenca man bandu kai si enggo berekenNdu man kami”.

Sumber photo : https://sermons.faithlife.com/

Makna                                                     

1.    Daud memang Beda.  Aktivitas utama, program paling besar di kerajaannya  labo erperang tah erbahan pesta pesta 7 wari 7 berngi, tapi ngataken bujur Tuhan.  Catat, program si galangna ibas kerajaan Daud emekap, erbahan pengakun ras ngataken bujur man Tuhan. Enda ilakokenna alu mpepulung kerina perpulungen bangsana, janah iadep adepen bangsana enda ilakokenna.   Ipepulung bupati Kabupaten Karo, kerina kalak karo si iwakili 17 kecamatan ras 274 desa se Tanah karo I lapangan bola Samura, jenari ipimpin bupati  ende enden ras pengataken bujur man Tuhan Dibata, Dibata Nu Israil, Nibata Nu Daud terus ku kesusurennna, seh ku Jesus Kristus.  Bagenda me ilustrasina.  Adi e jadi, kai kap ndu ulihna???

2.    Ipuji Daud TUhan, Iakuina kemuliaan ras kiniulin Tuhan, ikatakenna bujur, ras itambahina ka “ kami ngulihkenca ngenca” à Enda me sada bukti bahwa Daud tuhu tuhu nandai Tuhan e, labo perbahan turi turin sibegikenna ngenca.  Tapi pengalamenna sendiri si sanga ia naklukken Goliat sang raksasa pilistin 2,3 m gedangna.  Muji labo asal muji, ngaku labo bas babah ngenca…. Janah labo erbahan pencitraan maka kita muji Tuhan, sekalipun kam raja, presiden, gubernur, bupati, camat, kepala desa… tah bapa I tengah jabu.  Muji ras ngakui kinihagaan Tuhan reh ibas penandai ras pengalaman nggeluh isampati Tuhan.

3.    Mereken pengataken bujur ibas pesta panen, kerja rani, labo ritual kosong si la berlandar ibas pusuh.  Mbereken pengataken bujur ibas kerja rani e, harus dasar na tuhu tuhu nandai ras nggejapken keleng ate Tuhan  (ise kin Tuhan e, ras uga kin Ia) ibas kegeluhen nta sekalak sekalak. Kata kata si paling menggambarkan nandai ras nggejapken keleng ate Tuhan emekap… kami ngulihkenca ngenca, aku ngulihkenca ngenca.    Pang kam mbelaskenca “ aku ngulihkenca ngenca”. Iangkandu nge ku ise ras kai siulihkenndu e?   Enda me voucher ras ticket kubas ibadah kerja rani ta tahun 2022 enda. 

Pengkenaina

·       Mari si alo alo ras si suksesken kerja rani ta ibas tahun 2022 enda, alu dasar pengakun si reh bas pusuh si mbagesna nari… kami ngulih kenca ngenca.  Ertina kinisertanndu  ibas kerja rani tahun enda mbabai kam lebih nandai ras tek ku Tuhan si melias ras si mehuli e.

·       Ula kita rahan-ahan tahpe hitung hitungen ras Tuhan, bagi nina Daud ndai “bangsaku ras aku labo ngasup mere man Bandu”.  Lang la kita ngasup sitik pe mere ku Tuhan.   Oksigen, sinar matawari, lau, ras sidebanna la kap ipajak Tuhan man bandu ras man aku, bagepe man kita kerina.   Ngkira pajak oksigen, sinar matawari, ras lau e saja pe seh kal sera na, apai ka nggalarisa.   La terkira, emaka labo tergalari.  Saja perlu si gejap “ igratisken Tuhan man aku ras anak anakku”. Bujur Tuhan ku. Amin.

Pt. Analgin Ginting.