Catatan Tambahan PA Mamre 6-12 Maret 2022, Ulanai Numpang Celup

 Bahan Penelaahan  : Epesus 4 : 17 – 24

Thema :  Orat Nggeluh Simbaru

Tujuan : 1. Meteh identitas selaku manusia simbaru

 2. Ngasup ncidahken orat nggeluh simbaru ibas ngalaken kegeluhen sinihadapina

Epesus 4 : 17 – 24

4:17    I bas gelar Tuhan kukataken man bandu gelah itengetindu enda: olanai kam nggeluh bagi kalak si la nandai Dibata, si la erguna perukurenna,

4:18   dingen gelap pengertinna. La lit baginna i bas kegeluhen si ibereken Dibata, sabap lanai kal lang-lang ia bodohna, dingen mersik ukurna.

4:19   Lanai sitik pe ia meteh mela; ipelepasna dirina italuken sura-surana si jahat, janah ilakokenna kerina si la mehuli alu la alang-alangen.

4:20    Labo e si ipelajarindu i bas Kristus.

4:21   Ma enggo ibegindu kerna Kristus, janah selaku ajar-ajarNa, ma enggo kam iajari kerna si mehuli si lit i bas Ia?

4:22  Dage tangtangilah manusia si male, si erbahanca kam nggeluh bagi si nggo-nggona. Manusia si male si meneken bana alu sura-surana si nipu.

4:23   Pusuh peratenndu ras perukurenndu kerina arus ipelimbarui.

4:24   Pakelah manusia si mbaru si itepa rikutken tempas Dibata, dingen encidahken bana i bas kegeluhen si tuhu-tuhu adil dingen badia

Fakta

1.     Paulus secara afirmatif /positif namun tegas mindo man perpulungen Epesus ibas kata gelar Tuhan DIbata, ola nai nggeluh bagi kalak si la nandai Dibata. Kalak si la nandai Dibata nina Paulus la erguna perukurenna ras dingen gelap pengertianna. Itambahi Paulus, maka kalak si La nandai Dibata la meteh mela, janah ipelepasna dirina erbahan sura sura si jahat, emaka la lit inganna ibas kegeluhen si ibereken Dibata.

2.     Kalak si nandai Dibata, arah Yesus Kristus nggeluh bagi Yesus Kristus, dem pengertin ras kekelengen. Kerina kalak si jadi ajar ajar Kristus njadiken Yesus Kristus jadi panutanna ibas ia nggeluhken kegeluhenna.

3.     Paulus mindo gelah jemaat I Epesus nangtangi manusia male singajari bentuk kegeluhen si enggo enggona, sebab sura sura manusia male nipu.

4.     Pusuh peraten ras perukuren kerina harus ipelimbarui nina Paulus, gelah nggeluh selaku tempas Dibata gelah nggeluh adil ras Badia.

 

Sumber Photo : https://endofthematter.com/

Arti Dan Makna.

1.     Paulus mindo man Kalak Epesus melakukan perubahan ibas carana nggeluh.  Ulanai ngikutkan cara cara si male, si la banci rukur ras  la lit pengertianna.  Sebab sura sura na hanya sura sura doni, si ujung ujung na nipu bana.  Kerina kita memang harus berubah, janah bersedia melakukan instropeksi ras evaluasi personal.  Adi riahen denga siakap kede kopi asangken PA Mamre, perlu kal sidarami sebabna.  Engkai maka riahen siakap kede kopi asangken PA MAMRE?  La lah perban sura sura ras perukurenta hanya sekedar segelas kopi susu ras meriah meriah saja?   Nggeluh memang perlu meriah, tapi labo meriah meriah saja.  Adi siakap nggeluh hanya guna meriah meriah saja, berarti langa dat kita makna nggeluh situhu tuhuna kal.  Adi bage, berubah lah kita kerina mamre.

2.     Perlu kal sitandai Kristus Yesus gelah sieteh kai kin tujuan, ras makna nggeluh situhu tuhu.   Ringkas na, nggeluh situhu tuhu na kal emekap mpermuliakan TUhan Dibata arah kegeluhenta. Kai ertina ras uga carana mpermuliakan Dibata?  Adi bingung denga kita berate payo ras tuhu bagi kata Paulus, maka bodoh kal situhuna perbapan si lang ngetehsa e.  hahahaha Tabik tabik , senina mamre.  Mpermuliakan Tuhan emekap ngkelengi Tuhan asa gegehta lit, ras ngkelengi teman manusia bagi kita ngkelengei dirinta jine. Contoh na : Lanai kita numpang celup ku kopi  susu kalak sideban, tapi si pindo kopi  susu nta gelah kalak sideban banci numpang celup.  Janah la kita ku kede kopi bas acara Mamre e, ras bas hari minggu ikut kita ku gereja.  Ma payo akapndu ?

3.     Ipindo Paulus gelah kerina kalak Epesus nantangi kegeluhen si male e, tangtangi jenari lupaken ulanai bage perbahanen.  HARUS LIT UPAYA KALAK SI PENTAR lako nantangi ras ngambekkensa kegeluhen si male e.  La ia nangtang bage bage saja.  LIT USAHA lit upaya, janah la kabo mis.  Lit prosesna.    Bagi pesawat nandangi tinggal landas… harus empetkenna lebe kiam bas runway, janah kerina tenaga I fokusken gelah banci kabang.  Lampu lampu pesawat pe harus ipenimpet lebe.  Sangat pesawat enggo kabang, janah enggo lit bas ketinggian jelajahna maka banci ka lampu lampu ndai ipegara mulihi.  Ertina nangtangi manusai male e, harus lit kerja keras ras sungguh sungguh maka banci.  Adi setengah setengah ngenca, mulihi kang pagi dungna, seri ras lagu Rinto Harahap … “ Aku masih seperti yang dulu…. Nina. Hahahahha

4.     Perbahanen manusia ngikuti kai perukurenna, kai sora pusuhna.  Situhuna kal sora pusuh e mehuli kal nge, sebab ije me Tuhan Dibata erkuasa.  Tapi perukuren ras sura sura manusia male dominan, lenih megegeh asangken sora pusuh.  Nangtangi manusia male, erbahan perubahan ibas diri, ertina kita ngikuti sora pusuhta asangken sura sura ras perukurenta.  Enda me situhuna.  Pebelin sora pusuhta, ikutken sora pusuhta, ulanai sura sura ta tah pe perukurenta.  Contoh enggo kam siap siap ku kede kopi, minum kopi ras cakap cakap mbahas serangan Rusia ku Ukraina,  ope berkat reh berita bas WA ndu, PA Mamre kita sekalenda nina sekretaris Mamre.  Iaaahhhhhh, PA MAmre kin sekalenda nindu la gejapndu.  Ue PA mamre kam nina sora pusuhndu, tapi kede kopi saja, ketadingen berita kam nina perukurendu.  Apai ikutkenndu? Adi manuisa male dengan, pasti ku kede kopi kam, daramindu alasan njawab WA sekretaris Mamre, “ aku sekali nari silih, la kuakap aku sehatnsa nindu, janah kam berkat ku kede kopi.  Hahahahha” Em ciri manusia male.  Tapi adi idalankenndu ciri manusia mbaru maka nindu,  Oh Siap Silih PA MAMRE kita.  Ma lit nge kari kopi susu isediakan tuan rumah PA Mamreta… njawab sekretaris mamre,  enggo sikap kerina silih sebab sekalenda isediaken tuan ruman pangan ras inemen sintabehna kal guna kula ras pertendinta.  Sebab pas kepe ulang tahun perjabun tuan rumah mamre, emaka isediakenna cipera ras gule ikan mas, si lit pira na.  Ertina pangan ras inemen I PA Mamre ndauuuuuuh kal tabehen asangken I ingan sideban.  Nipu kalak ingan si deban e.

Numpang Celup : Sumber photo : https://sorasirulo.com/

Pengkenaina.

·       Selaku Mamre si jadi Imam I tengah jabu, kita kerina harus nggit ras berusaha sekeras keras na nadingken manusia maleta.  Perukurenta harus idemi kekelengen ras sura sura mpermuliken Tuhan.  Adi e sidalanken, maka tergejap kal man banta kekelengen ras pasu pasu Tuhan e.  Janah anak jabunta pe ikut ngenanamisa kerina.  Ibas suasana selepas covid, ras ibas kerina permasalahen ta pe ikawali Tuhan kita janah iberena jalan keluar.

·       Ula pedekah dekah, janah ula pemersik ukurta adi lit undangen gelah reh ku acara kebaktian Mamre.  Labo perlu kal pertimbangken alu melaun laun, mis lah ikutken adi ietenhken kita kubas kegiaten kegiaten bas Mamre ta.

·       Radu ras kita kerina ngukurisa, gelah banci erjilena sibahan program program mamre I bas runggun tah pe sektorta masing masing.  Mamre si rajin muji Dibata itambah tambahi Dibata kap pikiran kreatifna ras inovasina.

Amin ras mejuah juah kita kerina.

Pt Analgin Ginting