SIINGET denga gelar Kyrzayda Rodriguez. Iakap kami pernah
sibegi gelar penulis si termurmur enda gia la lit beru kalak Karo sinibabana.
Selain talentana nulis itandai ku sebelang-belang doni,
diberu sirupana pe seh jilena enda ihamati erkiteken rancangen busanana idarami
kalak si bayak namura.
Sope lenga diberu ketubuhen 18 Agustus 1978 ras nadingken
doni enda 9 September 2018 i New Jersey, Amerika Serikat, erkiteken kanker, lit
morah-morahna siman tengeten segelah reh beluhna kita pehagaken Dibata.
Kai pe kehagan manusia, lit si kerajangen Kyrzaida, tapi
ibas paksana kai pe kerina si lit ndai lanai ngasup nampati ia.
Kyrzayda Rodriguez Semasa Hidup. Super Photo : https://www.instagram.com/p/BnhsNZZDLAW/?utm_medium=copy_link
Mobil simehergana kal lit ibas garasina, tapi pinakit nahan
ia ku ja pe erkursi roda.
Rumahna dum uis rancangen simbaruna, bage pe erderet sepatu
ras barang-barang si inipiken kalak. Tapi selembar uis rumah sakit nari ngenca
terpakena.
Senna i bank oncah-oncah tapi la erkepek pepalem pinakitna.
Rumahna banci ibandingken ras istana raja tapi la termiserken ibas ingan medem
rumah sakit nari.
Waktu megegeh denga, perdalanen wari-warina ibas sada negara
ku negara sideban, ibas hotel bintang lima nari ku hotel bintang lima
sidebanna.
Tapi ibas usiana lenga seh 40 tahun terpaksa ia endalani
wari-wari ibas sada lab ku lab gelah ieteh uga perkembangen kankerna.
“Lit 7 kalak ahli kecantiken si rusur ngaturken bukku, tapi
gundari sada lembar buk pe lanai lit sitading. Aku mekatep lawes ku ingan
sindauh alu jet pribadi tapi gundari sikuperluken dua kalak singgit nampati
segelah banci cilas i halamen rumah sakit,” nina.
Pangan siuga pa pe banci tukurna tapi sibanci belgek dua
tablet per wari ras piga-piga taktak sira cair nari ngenca ibas berngi wari.
Rumah, jet pribadi, mobil, furnitur, melala rekening bank
rikutken isina pe tebal, gelar termurmur ku sebelang-sebelang, sijadi perayaken
jelma; siniakap ndube banci erbahan meriah ukur ras pertendin, ibas paksana
lanai kepe sada pe erguna.
Kegeluhen Kyrzayda e ngingetken kita nandangi persinget
Tuhan Jesus, “Lit kin gunana man sekalak jelma, adi man bana gia kerina
erta-erta doni enda tapi bene kegeluhenna situhu-tuhu? Tentu lang! Kai pe labo
banci ibahan manusia gancih kesahna.” (Matius 16:26)
Kesah la tertukur. Kyrzayda enggo endalanisa. Ibas pendungi
geluhna, Kyrzayda mereken kesaksin sierbahansa melala kalak ngamburken iluh.
Nina, ibas nahanken simesuina, icubakenna rusur mereken kata
pergegeh man pasien sideban segelah kalak e cirem.
Dirina kote tapi ia erban cirem kalak si kote. Waktu kalak
kote cirem man bana, idatna nanam kemalem ate, ibas kemalemen ate e, lanai
igejapna simesuina.
Kyrzayda enjumpai cara si pentar ibas ndungi masalahna emekap
alu nampati kalak si deban ndarat ibas masalahna nari.
“Tetaplah kam erkemalangen man Dibata janah bujurlah
perbahanendu man kerina manusia. Burakenlah e ibas kerahungndu dingen suratken
ibas pusuhndu.” (Kuan-Kuanen 3:3)
Persinget sitadingken Kyrzayda: kematen e kinata janah waktu
si lit kentisik ngenca. La lit man sombongenken, usahaken rusur pehuli
kiniteken sabab la sieteh ndigan Dibata erdilo.
Pehuli kiniteken sinimaksudkenna tentu bagi pendalankenna
ibas perpudi geluhna emekap erdiate, uga erbahansa maka kalak cirem. “Bahan
maka kekelengen nge sijadi perayakendu.” (1 Korinti 14:1A).
Ise siengkelengi idatna kekelengen. Ise sierbahansa kalak
cirem, lanai ingetna simesuina.
Salam Pt Mathias Brahmana (16/3/2022)
.jpg)
Komentar