SIMAN UKUREN
SEH me paksana sirang kita ras Jusup. Teran sora ras teran rupa kita nandangi pahlawan simbisa e. Adi lit kita sierbekas pusuhna kerna Jusup si enggo erbahan simehuli ku sebelang-belang doni; ula sitangis-tangis, bage kin kegeluhen, erpaksa-paksa.
Lit paksa tubuh, lit paksa erjabu, lit paksa ngidah anak ras kempu, lit paksana sirang kita ras kerina kekelengenta e. Lit ka pagi paksana sitadingken isi doni enda bagi Jusup.
Teringet ndube perdalanen erlajang tahun 1983. Pelabuhen Belawan bagi perkis buena jelma. Siman taruhken sada kalak, sinaruhkensa dua motor galang.
Sembuyak, kalimbubu, anak beru, teman meriah, ikut kerina naruhken kekelengenna erlajang ngepari lawit simbelang ku Taneh Jawa.
Bage erdengung sora kapal Tampomas 1 empersingeti awak kapal angkat tali sauh, rempet si datas kapal ras si naruhken ndai teriluh.
Sumber photo : https://www.youtube.com/watch?v=pvEL59GZF4U
Sora erdengung sipeduaken erbahan tangis erdire-dire. Kurang meganjang iakap endadahken tan. Lagu Teluk Bayur iendeken perkolong-kolong kapal.
Andiko lanai langlang perpanna ku pusuh. Selamat tinggal Teluk Bayur Permai... Selamat tinggal Pelabuhan Belawan…
Selamat tinggal Tanah Karo Simalem… Selamat tinggal Sumatera Utara… Selamat tinggal ateku jadi… timai kal pagi aku, ula kal kam leben erjabu.
Reh me sora erdeso sipeteluken tanda berkatna me kapal ku tengah lawit. Buuummmmm… Lanai teralang erdisona kearun ate. Si datas kapal ras si ibas pelabuhen radu serko, tempa-tempa lanai lit perjumpan.
Kenca tading setitik nari teridah keluarga sinaruhken i pelabuhen, dungna bagi remang erpagi-pagi, nese-nese sitik kearun ate. Lawit teridah la ersuki. Ku ja pe lau simbages. Lanai banci mulihken.
Jusup mate ibas usia 110 tahun. Sempat denga iidahna anak-anak ras kempu-kempu si Eperaim, janah sempat denga pe ialokenna anak-anak si Mahir, kempu Manase, jadi keluargana (Kejadin 50:23).
Anak Jusup dua ngenca eme Eperaim ras Manase. Cawir metua kal Jusup, sabab la hanya idahna anak kempuna erjabu, tapi seh pe ku cicitna.
Lit sada pemindon Jusup sope lenga peltep kesahna eme gelah ibaba tulan-tulanna ku taneh si ipadanken Dibata.
“Erpadanlah man bangku, maka adi itaruhken Dibata kam ku taneh siipadankenNa e, tulanku pe ibabandulah ku jah,” pedahna man kesusuren Jakub (Kejadin 50:25)
Mate Jusup i Mesir. Itama rempah-rempah ku dagingna, jenari itamaken maitna ku bas peti. Selamat jalan Jusup simelias dingen perkeleng.
Kita sienggo rate ngena man bana, apusi iluhta. Lit denga dalanta jumpa ras Jusup. Adi tedeh ateta ia banci sioge turi-turinna ibas Pustaka Sibadia bindu Kejadin 37-50.
Cawir Jusup metua. Usiana 110 tahun. Gundari reh urakna usia jelma. Adi 70-80 enggo meriah ukur. Kune lebih asa sie, 90-95, puji-pujin simbelin man Dibata. Tapi gegeh enggom surut ras melala silanai banci miser ibas ingan medemna nari.
Uga kita? Tading sikurangken ku usia sidalani kita gundari enda. Lit si 20 tahun nari, lit ka 5 tahun, lit ka sekali nari ngenca ernatal. Erbage-bage. Kenca sie ku ja ingan pengadi-ngadinta??
Kematen pasti reh. Dibata pasti mindo kesahNa ibas paksana. Oratna min mulihken ku sinepaSa. Tapi perbahan sedekah i doni la jelas kal penandaina ise Dibata, emaka la itehna dalan mulih ku rumah Bapa.
Ibas doni kematen lanai banci gunaken Google Map. Enggo pe meganjang kal satelit e ku duru langit, maun-maun babana denga kita papak gia jelas kal penuratken alamat tujunta.
La lit simeteh pasti tujun pengadi-ngadin sirasa lalap seakatan Jesus Kristus. “Aku kap dalan nandai Dibata dingen ndatken kegeluhen. Ise pe la banci ndahi Bapa adi la arah Aku,” nina Jesus bagi siisuratken Johanes 4:6.
Kalak sitek ras nandai Jesus ietehna dalan mulih ku Rumah Bapa Sinepa ia ndube. Tempas rumah e seh kal jilena. Asa belangna doni enda lenga pernah lit kuta megahna bagi sienggo isikapken Bapa e.
Kuta e ersinalsal bagi permata, mirip-mirip batu jaspis, meciho bagi kaca kristal. Ganjang tembokna 72 meter, lit 12 pintu gerbangna erlapisken mutiara, segi empat bentukna, bali gedangna ras bertengna.
Kuta e ibahan ibas emas tulen nari. Palas tembokna sipemena batu jaspis meratah, sipeduaken nilam biru, peteluken kasidon abu-abu, sipeempatken Jamrud simeratah, sipelimaken sardonic si meruntik.
Andiko la kal teralang jilena kuta kemulihen e. Lapisen ke-6 sardion simegara, si-7-ken kerusolit si megersing, si-8-ken beril simeratah biru, si-9-ken topas simegersing, si-10-ken kerosoperas meratah-ratah, si-11-ken huakin biru nguda, si-12-ken ametis bunga terong. Kerina 12 lapis corakna, lenga pernah lit kuta sibagenda mehagana.
Matawari ras bulan la perlu nerangi kuta sigedang ras bertengna seri 2.400 kilometer e, sabab kemulian Dibata sinalsalisa, janah Anak Biri-Biri/Jesus Kristus jadi lampuna.
Sitik denga kal sitersuratken kami ibas Siman Ukuren enda. Selaku anak Dibata siibas sada paksa pagi reh ku kuta kemulihen sirasa lalap enda, perlu nge sipetangkasi sekalak-sekalak alu ngoge Ketangkasen 21:10-27.
Salam Pt Mathias Brahmana (4/2/2022)
.jpg)
Komentar