SURAT WASIAT PA BELO

Oleh Jarto Tarigan

Turi turiin tentang Pa Belo ibas kita kalak karo enggo cukup terkenal. Pa Belo enda terberita jelmana mbue kal akalna. Sekali enda kari siidah uga buena akal pa Belo ibas kisah SURAT WASIAT PA BELO.

Ibas sada kuta lit sada perbapaan sini tergelar Pa Belo. Pa Belo enda adi inen penampilenna tempa tempa labo kalah beluh. Banci nge tempa tempa itebu tebu. Tapi situhuna Pa Belo enda seh kal beluhna sini cenderung cerdik kal jelmana. 

 Pa Belo enda telap kal jelmana. Kai sisuanna usuren mejile perturahna ras kena erga nge rusur. Erkiteken sie maka Pa Belo enda termasuk nge kalak jore ibas kutana. 

Lit lima anak ipupusna ras limana dilaki. Anakna enda pe jore jore kerina pergeluhna. Kerina nge i sekolahken Pa Belo emaka lit nge anakna e enggo erdahin i kota Medan ras Kabanjahe.  Sada anakna enda dung tamat SMP lanai ndehaksa mis erjabu emaka ia tading me i kuta. Bicara i kuta pe anakna  enda tapi kegeluhenna termasuk nge kalak jore. lit nge jumana ras sabahna, lit ka nge gereta lembuna. Sinuan sinuanna pe rusur nge kena erga. Jadi bicara i kuta pe ia labo ndauhsa bedana perjorena ras senina sini ibas kota erdahin. Kerina anakna jore enda tentu bekas pengajarken ras pemere Pa Belo me kerina, rikut pe ras totona ku Dibata. 

Perban Pa  Belo jore kal kegeluhenna ras anak anakna pe jore kerina maka Pa Belo enda enggo me rusur jadi contoh teladan uga kin kalak sini sangap kal ibas kegeluhen itengah tengah pertibi  enda. Tambah sie Pa Belo enda pe mekacar mekade kade ka jelmana maka rusur jelma sienterem meriah akapna ercakap.  Adi ibas kede kopi la ije Pa Belo tambah kal iakap lungunna tapi adi enggo ije Pa Belo bicara teh ketep kin inemen meriah kal nge iakap perbapaan e. Bagem me tep tep wari kegeluhen Pa Belo ibas kuta enda. 

Ini bukan Pa Bello, tapi hanya ilustrasi. Sumber photo : https://www.riau1.com/

Nggeluh enda danci lit nge rusur terjadi bagi sila ukur. Bage ka pe Pa Belo enda ibas sada wari kemberahenna idilo Dibata. Persakitna pe labo lit ieteh kal sebab selama enda pe sehat sehat saja nge ia.  Tapi entah  uga rempet mesui kal akapna dadana ras la dekahsa mis mate

 Emaka mate rempet me ningen janah igelari me perpatena enda alu  mate sada wari. 

Enggo bage maka Pa Belo me sada sada ibas rumahna. Umurna pe reh tambahna ras adi jelma reh tuana tentu enggo me lit rusur  penakit penakit  sini ibabana. La gejap dungna seh me umurna lebih 70 tahun. Erkiteken sie enggo reh rusurna lit penakit. Emaka lit me sada impalna kalimbubuna ngatakenca man bana . Nina bagenda ,adi enggo bagena kam rusur kurang sehatna bicara i rumah anakndu ah min kam tading ma enggo lanai akapndu susah. Itambahi kalimbubuna enda ka maka nina adi  enterem nge bebere kami anak ipupusndu ma banci kam keliling ganti ganti inganndu tading. Adi bage kari ma enggo teratur perpandu ras pertambarndu.  Mis nge kam kari reh sehatna  nina kalimbubuna enda ka tambah tolena. Ue impal, nina Pa Belo sebab payo kal akapna saran kalimbubuna impalna enda. 

 Emaka ibas sada wari berkat me ia ku rumah anakna sini i medan. Seh ia i medan mis ia ialo alo anak ras kempuna alu mehuli. Emaka meriah tuhu akapna enggo seh i medan. Adi ras permenna perban la banci ngerana labo ieteh kal uga periahna ukurna. Tapi inen uga persikapna banna ingan medem ras pangan maka permenna enda pe meriah kal nge ukurna. 

Tapi bage gia enggo piga minggu lanai bo akap pa Belo enda sikapsa ibas rumah anakna enda. Kurang enggo akapna penami.nami ras pengurusen tentang tambarna ras sidebanna pe enggo.akapna lanai bagi.ukurna. Apai ka pernah piga piga kali ibegina sora piring ndabuh e mis kal lesek atena. Adi bagenda ku anak sidebanlah aku atena ka . Pamit me ia  man anakna maka ku anakna sideban ka me ia.

Seh me ia ibas rumah anakna sidebanna ras anakna sienda pe tuhu tuhu meriah akapna ngalo ngalo bapana reh. Tapi enggo ka piga piga minggu mis ka nge akap pa Belo lanai ka akapna sikap. Pindah ka ia kuingan anak sideban tapi bage ka nge dungna siterjadi. 

Kedungenna mulih me ia mulihi ku kuta ku rumahna sendiri. Seh i rumahna mis ipala  palaina erdakan ras nggule. La pe akapna entabeh bagem ipala palaina ka man gelah banci man tambar. Dungna seh me tengah berngi maka reh me atena gogona ingetna kemberahen sienggo leben.idilo Dibata. Tangis me ia la igejapna  janahna rende erlebuh.  Nande sianu .., metami , turang mesayang bicara ras denga min ndai.kita labo bagenda pergeluh kubaba. Ei ei ei...eieh..eih nina janahna erkesi kesi. La gejap nircir iluhna erdire dire ndabuh ku ayona. Tuhu tuhu megogo ras ceda  kal atena. Ingetna kerina uga selama enda ia  dua dua ras kemberahenna sini sentudu nge lalap arihna. Labo pernah lit begi lit perjentikenna. Memang kemberahna terkenal kal merupa, .metami, ngerana medati , la perjungut, lalit ringesna bicara lit gia iakapna la payona perbulangenna. Emaka  waktu ia idilo Dibata bagi sibombang nge akap pa Belo doni enda. Kai pe atena lang, man nakan pe la terpan ,.njingkangken.nahe  e pe bagi sila tandes akapna ku babo taneh. Erkiteken  sie labo ate mamang adi  ingetna kemberahenna mis  iluhna naktak erdire dire janahna tangis erkesi kesi. Megi megi tangisna e mis ikut ateta megogo. Oh andi.ko kal.pengindo pa Belo enda ateta mis.  Bage me rusur sigedang gedang wari adi  enggo reh wari berngi simbages. 

Ibas sada wari lit penyuluhen hukum ku kutana. Penyuluhen hukum rnda iban ibas losd. 

Tutus kal atena megi megi penyuluhen hukum.enda. ibegina me ije uga hubungen anak ras orangtua, uga pembagian waris ,, uga surat wasiat ras sidebanna. Enca dung bage maka siterpikir kal ia tentang surat wasiat enda. Berbekal pemetehna lit sitik datna ibas penyuluhen enda  maka turah me ukurna erban surat wasiat man.kerina ansk.ipupusna.

Pagina suari ibahanna me surat wasiat man sekalak sekalak kerina anak ipupusna. Surat wasiat enda itulisna sendiri bicara la gia mejile  tulisenna tapi tangkas teroge kal tulisen e. Dung bage itulisna maka itempelna matere ras itanda tanganina kerina surat kuasa enda. Dung itanda tanganina maka imasukken kubas amplop alu merari. 

Piga piga piga wari nari dahina me sekalak sekalak anakna enda. Pertama reh ia ku medan dahina anakna sintua. Enggo dua berngi ia ije idilona anakna gelah ercakap cakap dua dua saja. Reh nina anakna kai kin.pa maka idilondu kal aku gelah kita ercakap dua dua. Nina pa Belo,, kesah labo kita metehsa aku enggo.metua emaka sura surangku lit enggo kubuat surat wasiat man bam. Surat wasiat enda man bam ngenca kubereken sebab engkau ras permain ngenca kuidah sirate keleng kal man bangku maka man bam kal ateku  surat wasiat enda. Surat wasiat enda engko  ras permain ngenca dorek ngetehsa isina. Emaka tuhu tuhu rahasiaken surat wasiat enda. Ula kal sempat ieteh seninam sideban lanai kari lit inganku. Bagem nina pa Belo man anakna sintua. Emaka reh nina anakna , kai kin isi surat wasiatndu e pa  maka bagena kal nindu . Baca ko  saja lebe nina ka pa Belo. Emaka mis i oge anakna.  Maka seh kal senggetna lanai teralang anakna enda. Maka nina anakna enda mulihi enggo.me iukurindu mbages mbages maka bagenda bandu isi surat wasiatndu enda. Enggo anak engko kin  ras permain kal.kuakap si rate keleng man bangku. Emska reh nina anakna adi enggo bage nindu pa bage me kualo alo.

Dung bage mis icidahkenna surat wasiat ndai man ndeharana. Maka ndeharana pe sengget lanai teralang

Enca bage maka idahina ka me sada persada anak ipupusna  janah Iberekenna sada persada surat wasiat enda. Ras pecakapen mirip mirip me bagi percakapen ras anakna sintua ndai. 

Ras anakna singuda ngenca lit me sitik perbedaanna percakapen . Enca enggo enggo ibaca anak singuda  surat wasiat endai maka reh nina anakna singuda enda , la kal kusangka bapa , aku kal kepeken  atendu sikelengna, kitik kitik.nari memang situhuna tergejap.kal nge ibas pusuhku maka aku .nge atendu sikeiengna. Bagem nina janahna tangis terisak isak ras erkesi kesi penuh rasa haru bahagia.  Maka sengget kal  kemberahenna mis idahina uga maka perbulangenna tangis erkesi kesi ras terisak isak. Idahna lit ije surat ras mis ibacana. Maka ia ka pe mis ka tangis erkesi kesi janahna erlebuh lebuh man bibina simetuana sienggo idilo Dibata. 

Enca anak anakna enda enggo dat surat wasiat kerina maka anak anakna ndai erlumba ngerawat  pa Belo. Kai pe pa Belo.merincuh enggo erlomba anak anakna  merekennca. Erlumba ka gelah min bapana tading ras ia saja. Reh ka me rusur kerina ku kuta ngenen keadaan.pa Belo. Malem kal ate pa Belo enggeluh ibabo pertibi enda.

Kejadiin sibagenda rupana dungna enggo jadi buah bibir ibas kuta malahen  seh pe dungna ku kuta sideban. Kerina jelma mujiken pa Belo ras anak anakna. Enda jadi contoh ningen.usur ibas cakap cakap kede kopi , cakap aron i juma.bage ibas mereken nasihat ibas nereh empo pa Belo enda me  rusur iban jadi contoh. 

Tande me piga piga  tahunna maka seh me pudun pa Belo ras Dibata. Emaka mate me ia alu mehuli lalit kekurangen kai pe. Prosesi penguburen pa Belo enda iban me alu adat cawir metua ras kerja simbelin  iban seh kal metunggungna. Ipotong me piga piga kerbau sigalangna ras erkata gedang sarune lengkap. Tambah sie rikut pe itenahken me kerina kade kade si asa litna baik ikenjahe nari terus ku kenjulu  bage ka pe sider ku bertengna. Maka tentu enterem kal tuhu kade kade si reh. Langa pernah ibas kuta bage teremna jelma reh ibas sada kalak kepateen. Tentu erkiten kerja enda kerja simbelin maka enggo mbue kal tuhu  biaya sini ipedarat. 

Erkiteken mbue biaya prosesi penguburen maka tentu cukup.mbue biaya man tomboken . Tapii ije pe anak anak pa Belo erlomba gelah ia saja nomboki kekurangen biaya sini cukup.galang enda.  Erkiteken erlomba kerina anak anakna maka sienda pe dat pujiin kal itengah tengah kade kade kerina termasuk anak kuta. Ooh ate kalak sientetem bicara bagah min anakta malem kal ateta nina ka deba . Engkai maka bage nina sienterem sebab rusur ka terjadi ersoal anak  e ibas pedarat sen prosesi pemakamen tapi rebuten ibas warisen. 

Bicara erlomba gia anak anakna lako nomboki kinikeriin tapi anak beru ras kalimbubu bijak. Reh nina anak beru ras kalimbubu etkiteken jore nge kam kerina idah kami maka ula kam sigelut gelut seri nge tanggung jawadnu ibas kinikeriin biaya penguburen bapandu. Emaka lanaii beluh anak anakna enda erlomba gelah ia saja nomboki kinikeriin . 

Dung bage pagina kade kade enggo lanai lit i rumah. Anak anak pa Belo.nari ngenca i rumah ras kemberahena sekalak sekalak. Enca man ciger maka reh nina anak sintua kuakap.ercakap.nge kita kerina erkiteken bapanta enggo lanai lit. Uga ngenda sikupudi wari termasuk tentang erta erta sini itadingken bapa nina anak anak sintua. Adi enggo dung sicakapken maka kita pe mulih ku rumahta sekalak lanai lit rongketna. Uga akap.kena ngerana kena sekalak sekalak.nina nambahisa. Isungkunina me sekalak sekalak agina ras kerina ngataken setuju iarihken.kerina gelah enggo erkedungen. 

Ise dage mulai mereken pendapat nina ka anak sintua. Sinik lebe kerina lanai.lit sora kai pe sebab sekalak sekalak enggo lit ibas ukurna ngataken surat wasiat sini enggo ialokenna sekalak sekalak. Perban sinik.kerina maka reh nina anak sintua uga aku.nunjuk.ise lebe ngerana ? . Anak sintua enda pe  enggo situhuna atena ngerana ngataken enggo lit surat wasiat ibas ia. 

Perban idesak.lalap.maka dungna ngerana anak sintengah . Nina anak sitengah ersentabi kal aku  man bandu kerina man  katua ras agi agingku kerina

Aku ersentabi erkiteken piga piga tahun sienggo lewat bapanta langa idilo Dibata aku enggo iberekenna surat wasiat. enda surat wasiatna sini isina iberekenna.man bangku emkap juma 10 ha, sabah 5 ha, lembu 200, kerbau 100 ras rumah enda. Dung ia ngerana ndai mis gejek sebab kerina kepeken anakna dat surat wasiat sini isina seri lalit erndobahna. Perban gejekna maka enggo man damenken .

Erkiteken seh kal enggo gejekna perarihem anak anak.pa Belo  maka mulihi  reh anak beru ras kalimbubu lako encakapken tentang pembagian warisen enda. Ipindo anak beru me kerina surat wasiat sini.lit ibas sekalak sekalak anakna pa Belo. Dung bage maka inen kalimbubu ras anak beru me kerina surat wasiat enda. Tuhu tuhu mamang atena uga maka kerina  surat wasiat  enda seri kal kerina isina. Ooh impalku pa Belo atena ka deba ibas ukurna. 

Emaka arih me anak beru ras kalimbubu uga me simehulina. Lit dungna kesimpulanna adi seri isi surat wasiatna maka berarti seri atena kerina kelengna. Jadi adi seri atena kelengna maka pembagian warisen pe seri ka iban kerina.

 Begenda dungna iban pembagian warisen, tapi bage gia surat wasiat pa Belo enda enggo jadi buah bibir sibelang belang kuta terus ku kuta sideban. Jadi kuan kuan sibenterem. Ula kari bagi surat wasiat pa  Belo ningen ije janah tawa tawa jelma sienterem. Ibas nasehat nereh empo pe enggo ka me surat wasiat pa Belo enda isinget isinget. Terlebih lebih ibas encakapken kata Dibata pe rusur isingetken ula bagi perkeleng surat wasiat Pa Belo. Bagem me ningen usur. 

Bujur