Oleh
JARTO TARIGAN,
Alumni 1976 SMAN 1 KabanJahe
Ya..luar biasa ibas kalak karo penghargaan man kalimbubu. Sini kueteh memang kerina nge kuidah etnis etnis mereken kehamaten si lebih man kalimbubuna. Tapi kehamaten sini ikataken bagaikan Dibata/ Tuhan yg nampak kuakap ibas budaya kalak karo ngenca bage. Teman tetangganta kalak toba iberekenna kehamaten man kalimbubuna ikatakenna sebagai RAJA. Sebagsi raja pe enggo tuhu tuhu mehamat ras mehaga. Tapi kalak karo iberekenna kehamaten ras kinihagaan sebagai Dibata ni Idah. Luar biasa sekali. Tapi bage gia tentu perlu lit pahamennta kai kin makna Dibata Ni Idah e. Aku berusaha mereken sada pendapat sini sifatna dalannta erdiskusi entah pe arih arih.
Perlu sieteh maka awalna antara adat ras keyakinan entah pe kepercayaan menyatu sebagai satu kesatuan. Adi ibas kegeluhen sehari hari sidalanken adat maka ibas kegeluhen i akhirat pe dat kemalemen ate. Erkiteken sie maka zaman sinai kerina jelma ras keluarga bage pe masyarakat luas mbiar kal ngelanggar adat. Adat enda emkap aturen aturen nggeluh sini Ibahan nini opungta ndube . Aturen enda menyangkut kerina uga aturen enggeluh ibas kerina bidang kehidupen. Bage ka pe ibahanna merga silima , rakut sitepu ras tutur siwaluh.
Luah Kalimbubu. Sumber photo : https://www.youtube.com/watch?v=jjQk_7nz4Ng
Ibas rakut sitelu enda masing masing lit posisina baik ibas kegeluhen sehari hari bage pe bas kerja adat entah pe ibas a acara peradaten. Rakut sitelu enda emkap Senina , Kalimbubu ras Anak Beru. Kerina ibas inganna pasti jadi senina, kalimbubu ras anak beru. Kalimbubu posisina sebagai orang yg paling ihormati ras rusur pe ianggap sumber berkat. Erkiteken sie maka pindolah pasu pasu ibas kalimbubu nari ningen rusur. Emaka rusur lit pedah pedah gelah min kerina mehamat erkalimbubu. Kalimbubu la danci togani ras sidebanna. Tapi si luar biasana uga maka sampai sampai kalimbubu ikataken Dibata Ni Idah.
Menurut pemahamenku maka setidaknya lit 2 dasar pemikiren maka ikataken kalimbubu Dibata Ni Idah. Dasar pemikiren enda emkap :
1. Dibata ibas kepercayaan kalak karo sumber kehidupen. Kai pe lit dat kita sumberna ibas Dibata nari. Sebagai sumber kehidupen maka adi la berekenna sumber kehidupen maka rejeki enggo me pasti seret. Bage ka pe ibas kita kalak karo.maka awal kehidupen sumber kehidupen ibas kalimbubu nari. Sumber kehidupen enda emkap berupa juma entah pe sabah. Bagi sini sieteh maka Sesuai adat kalak karo anak diberu la dat warisen tapi bage gia adi mereken perjumaan entah pe sabah mbue nge ndalanken bage. Apai ka adi nai, seh buena bage. Jadi waktu nai rata rata anak diberu lit ibereken perjumaanna entah pe persabahenna. Erkiteken e maka kalimbubu enda ianggap jadi sumber kehidupen. Kalimbubu enggo tempa penjelmaan Dibata simereken sumber kehidupen man anakna sidiberu
2. Kekelengen Dibata man tinepaNa la erbaleng. Uga bentuk ras prilaku jelma lalap keleng ate Dibata. Bage pe ibas kehidupen sehari hari maka anakta sidiberu labo kita sampai hati adi ia mengalami kesuliten ibas geluhna. Lebih kal cedana ateta ngenen anak diberu kurang jore entah pe kurang sikap geluhna. Emaka nai pe adi lit kesuliten ibas anakna sidiberu berusaha nge gelah ula tulpak. Jadi umumna kekelengen kalimbubu man anak beruna labo erbaleng. Kekelengen ngenca lit ibas kalimbubu nari man anak beruna. bage me uga kin perkelengna ate Dibata man jelma ibabo pertibi enda.
Erdandanken sidua enda me maka kalimbubu ikataken Dibata Ni Idah. Erkiteken sie kita selaku kalimbubu enggo me lit sidalanken dua hal.enda man anak berunta ?. Tentu saja siterutama kal man anak berunta Batangna kal. Ise kin anak berunta e tentu batangna turang kandunngta, beberenta ras seterusna. Kalimbubu pe batangna kal turang nande, impalta anak mamanta, turang ndeharanta ras sidebanna.
Salah sada menurut aku bentuk kekelengen sipenting kal man anak berunta (turangta) emkap ibas pembagian waris. Ibas pembagian waris enda me salah sada sini teridah kal uga kin situhuna perkelengta man anak berunta (turangta,).
Tapi bage gia kekelengen man anak berunta labo harus dalam bentuk harta saja. Kekelengen danci ibas bentuk perhatian, adi erkerja anak beru hadir alu lengkap ras ngiaksa dung kita ije. Pokokna mbue kal cara menunjukken uga kekelengen man anak beru.
Posisi anak beru emkap mehamat man kalimbubu. Adi Posisi kalimbubu emkap erkeleng ate man anak beru.
Kita kerina sekali waktu ibas posisi kalimbubu ras sekali waktu ka ibas posisi anak beru.
Bujur ras mejuah juah kita kerina .
Komentar