Bahan Penelaahan
: Galatia 5 : 16 – 26
Thema : Pedauh
Sura Sura Ukur Manusia .
Galatia 5 : 16 – 26
5:16 Sura-surangku e me:
Kesah Si Badia min si negu-negu kegeluhenndu maka ola iikutkenndu perukurenndu
secara manusia.
5:17 Sura-sura ukur manusia
erlawanen ras Kesah Si Badia, janah Kesah Si Badia erlawanen ras sura-sura ukur
manusia. Si dua enda ermusuhen, janah si enda ertina maka la banci idalankenndu
peratenndu.
5:18 Adi Kesah Si Badia
negu-negu kam lanai bo kam iteruh Undang-undang.
5:19 Perbahanen-perbahanen
si erpalasken sura-sura ukur manusia tangkas kap. Si enda teridah i bas:
erlua-lua, si nggesuh, la meteh mela;
5:20 nembah man berhala ras
erbahan ilmu sihir; simusuhen, rubati, mecimberu, perampus dingen kepentingenna
saja ngenca iukurina. Erbahan perpecahen dingen erpihak-pihak.
5:21 Sician-cianen, mabuk,
pesta minem-minem seh mabuk ras si debanna. Kukataken man bandu genduari, bagi
enggo kukataken bandu nai maka, kalak si ndalanken perbahanen-perbahanen si
bagi enda labo banci dat bagin i bas Kinirajan Dibata si reh pagin.
5:22 Tapi ulih Kesah Si
Badia e me: lit kekelengen, lit keriahen dingen lit
kemalemen ate, lit kesabaren, idalankenna perbahanen si mehuli, mehuli ia,
setia.
5:23 Meteruk ukurna dingen
ngasup engkuasai diri. Kerna si enda la lit isingetken pe i bas Undang-undang.
5:24 Bage me kalak si enggo
jadi sikerajangen Kristus Jesus; perukurenna secara manusia enggo ibunuhna i
kayu persilang rikut ras kerincuhen dagingna bage pe sura-surana.
5:25 Erkiteken Kesah Si
Badia me si mereken kegeluhen man banta, e maka lagu langkahta pe arus rikutken
peraten Kesah e.
5:26 La banci meganjang
ukurta, ntah sitokoh-tokohen, ntah pe sician-cianen.
Sumber photo : https://twitter.com/ruthjohn1958
Fakta,
Arti Dan Makna.
1. Kesah Si Badia si negu negu kegeluhenndu, maka ola
ikutken perukuren secara manusia. Kesah Si Badia banci negu negu jelma, terlebih kalak
si tek ras si menghargai ras mindo ku IA .
Kesah Si Badia e emekap Tuhan, Tuhan si berkepribadian, si banci ngejap
ras rukur bagi manusia. Emaka banci Ia
negu negu manusia, ugakin kita negu negu temanta, orang tuanta. Adi sitegu tegu orang tuanta, tah kade
kadenta uga pe la ateta ia guling.
Bicara guling pe atena ia, leben nge kita nggulingken bana, gelah ia
sendiri la guling. Lebihen asangken kita
negu orang tuanta, bage ka me pe Kesah Si Badia e negu negu kita. Bahkan adi lit batu galang arah lebe dalanta,
langa pe she ku batu e, enggo leben kita teguna. Adi lit masalah arah lebenta, sada wari tah sada
minggu nari pe enggo ipersingetina dirinta.
Cara rukur Kesah SI Badia dem alu perukuren Tuhan Yesus, dem alu perukuren
Dibata, sebab Dibata kin Ia. Emaka
iambatiNa kita rusur adi perukuren tah sura suranta hanya sekedar sura sura
kedagingen nta. Emaka si payona ras si
mehulina bas geluhta la siikutken perukuren manusia, tapi si ikutken perukuren
Kesah Si Badia secara total, secara mutlak, tanpa syarat. Jenari maka geluhta tetap mehuli, tetap
bujur, tetap sehat, tetap berkualitas ras bernilai man kalak sideban.
2. Ulih Kesah Si Badia eme lit kekelengen, lit keriahen
dingen lit kemalemen ate, lit kesabaren, idalankenna perbahanen si mehuli,
mehuli ia, setia. Engkai maka akapndu nggit Kesah Si Badia e negu negu
kegeluhenta? Sebab keleng kin kal ateNa kita, janah gelah bas geluhta ta e lit
kekelengen, lit keriahen, lit kemalemen ate, lit kesabaren, ras pe lit kesetian
ta man Tuhan si Mada kerina si lit.
Itegu tegu Kesah Si Badia kita labo gelah kita tertaban, labo gelah kita
lanai bebas, labo gelah kita ndatken minimal ibas geluhta. Tapi sebalikna, itegu teguNA kita gelah geluhta
e erbebasna, er fleksibelna, er lincahna ras ercerdas na ibas mpratekken kerina
si mehuli ras si bernilai. I tegu tegu
Kesah Si Badia kita gelah geluhta maksimal jadi manusia si tuhu tuhuna
kal. Kerina kelimpahen ras kemalemen ate
nggeluh hanya baci sidat ken arah pemere Kesah Si Badia. Emaka mari si hamati ras si pindo penampat
man Kesah SI Badia saja. Amin ?
3. Kalak Si enggo kerajangen Kristus. Kalak si tek ras rajin mindo penegu negu Kesah Si Badia enggo jadi si
kerajangen Kristus. Kalak si enggo jadi
kerajangan Kristus ia me si sangapna bas geluh enda. Em sebab na Rasul Paulus ngataken bahwa… man
aku nggeluh enda Kristus, janah adi enggo mate ras Kristus, untung kal aku, nina.
Emaka marilah si kataken bujur man Tuhan Yesus Kristus ta ibas kesangapen
kegeluhenta. Ndalanken pedah Kristus
ibas geluh ta alu penegu negu Kesah Si Badia, eme pola kegeluhen si untungna,
si sangapna kal. Amin ?
Pengkenaina.
· Perlahan lahan
senina senina mamre sitadingken perukuren manusia alu ngikuti penegu negu Kesah
Si Badia. Kerina pemikiren lako ndatken
kesangapen ras kemalemen ate bas geluh enda, beluhen nge Kesah Si Badia e
ngaturkensa asangken kita sendiri. Labo perukuren
ta mbabai kita lako ndatken kesangapen ras kemalemen ate, tapi Kesah Si Badia e
nge si beluh. Emaka ku IA lah lalap kita
erpenalem.
· Mari si tingkatken
disiplin dirinta, ibas kita erkomitmen ngikutken kegeluhen bagi singena ate
Tuhan Yesus. Siikuti Tuhan ta Yesus alu
mbenaken wari warinta ertoto ras erpengendes ku Ia saja. Tuhan Yesus, tep tep wari sanga Ia nggeluh I doni
enda denga ertoto Ia rusur ibas pagi pagi si lampas man Bapa I Surga. Kita pe perlu kal ertoto ibas pagi pagi e
ngendesken geluhta ras ngataken bujur man Bana ope denga kita erbintuas. Amin.
Bujur ras
mejuah juah
Pt Analgin Ginting
Komentar