Thema : Jadi senina man senina
Nas : Kejadin 45 : 1 – 9
Nas Renungen
Lanai tertahan Jusup ukurna i lebe-lebe suruh-suruhenna kerina, emaka isuruhna kalak nadingken ingan e. La lit ise pe si deban ras Jusup sanga iturikenna man senina-seninana ise kin ia si tuhuna.
Perban gangna sorana tangis kalak Mesir pe nterem megisa, janah berita e ipeseh ku istana raja.
Nina Jusup kempak senina-seninana, "Aku kap si Jusup. Nggeluh denga nga nge bapangku?" Tapi perban biarna senina-seninana e megi si e lanai ia ngasup njabapsa.
Emaka nina Jusup man kalak enda, "Mari terdeheren ku jenda. " Ideheri kalak enda ia, emaka nina Jusup, "Aku kap seninandu si Jusup si dayakenndu ku Mesir.
Genduari ula aru atendu, ula isalahkenndu bandu erkiteken idayakenndu aku ku jenda. Si tuhuna Dibata nge si erbahan maka aku leben seh asang kam ku jenda guna nelamatken kalak si nterem.
Enda pedua tahunken denga nge kelihen i negeri enda. Lit lima tahun nari la lit kalak si nenggala tah pe rani.
Dibata si erbahanca maka aku leben seh asang kam, guna nelamatken kam alu cara si luar biasa enda, gelah alu bage kam ras kesusurenndu selamat.
Erkiteken si e si tuhuna labo kam si erbahanca maka aku seh i jenda tapi Dibata nge. IbahanNa aku jadi penungkunen raja. IberekenNa man bangku kuasa nandangi kerina negeri enda; aku me si merentah kerina negeri Mesir.
Genduari pedaslah mulih ku bapangku; kataken man bana, maka bagenda nina anakna Jusup, 'Nggo ijadiken Dibata aku jadi si merentah belang-belang negeri Mesir; minterlah kam reh.
Fakta dan Makna
1. Lanai tertahan Jusup ukurna i lebe-lebe suruh-suruhenna kerina, emaka isuruhna kalak nadingken ingan e. La lit ise pe si deban ras Jusup sanga iturikenna man senina-seninana ise kin ia si tuhuna.
Enda me salah sada rahasia situhu tuhu lit bas geluhta, bahwa labo terbuniken kita ate tedeh man seninta, keluargata. Jusup pe bage, sanga idahna kerina seninana reh ndahi Mesir lako ndatken nakan, labo sitek pe nggejap bahwa senina na kandung nge situhuna penguasa Mesir e. Sitik pe la tandaina, tapi Jusup mis kal tandaina kerina abang abangna e, sebab itamaken Tuhan kin situhuna kekelengen bas pusuh kalak ersenina. Emaka isuruhna kerina pegawaina ndarat, lawes tading ia nari ngenca ras 10 kalak seninana e (sekalak agina Benyamin, la baci ikut sebab la bere Jakub bapana) emaka nina ilebe lebe abangna e, ia nuriken ise kin ia situhuna,janahna ngandung. Ngandung kerina jelma sangana nggejapken keleng ate kalak man bana. Kam usur ngandung senina ras turang, perban keleng ate sigejapkenndu. La kin naktak iluhndu adi gejapkenndu keleng Ate Tuhan Yesus e ?
2. Nina Jusup kempak senina-seninana, "Aku kap si Jusup. Nggeluh denga nga nge bapangku?" Tapi perban biarna senina-seninana e megi si e lanai ia ngasup njabapsa.
Aku kap Jusup, nggeluh denga kin nge bapangku? Nina Jusup, La terbuali, lit lap tedeh ate man bapanta. Labo Jusup ngenca si erkeleng ate, tapi kita pe kerina, aku pe, kam pe, pasti lit atendu tedeh man bapandu senina ras turang. Oh Haleluya. Keleng ate si gejapken kita sebab kita nandangi bapanta, nandangi nandeta, nandangi seninata. Adi la lit gejapndu keleng ate ndu nandangi seninandu, nandangi turangndu berarti ada sesuatu yang salah. Ada yang tidak pas , tidak klop dalam hidupndu. Sebab adi seninanta, turangta, nande ta, bapanta tentu keleng kal ateta. Kila Kalak Karo tempa segan kita ngerana ras bapanta, ras seninanta, tapi situhuna kal keleng dingen metedeh nge ateta nandangi seninata. “ Nggeluh denga nge bapangku?” Kalimat si sangat kuat menggambarkan kasih sayang dengan bapa/ayahanda kita. Aku yakinkal, Tuhan Yesus pe metedeh kal akapna tiap wari nandangi BapaNA i surga. Emaka la pernah sadawari pe lupa IA ertoto man BAPA i Surga. Sangana Yesus i kayu pesilang, seh kupuncakna tedeh ate TUHAN YESUS nandangi BapaNa i Surga, emaka nina “ Eli Eli Lama Sabahtani”...
3. Dibata si erbahanca maka aku leben seh asang kam, guna nelamatken kam alu cara si luar biasa enda, gelah alu bage kam ras kesusurenndu selamat.
Enda me bukti bahwa Jusup lebih dewasa secara iman ras kekelengen, ija ngasup ia memahami lebih lanjut penderitaan sinialamina. Sebab adi singet maka situhuna itamaken senina na e ia ku sumur, sebab segat kin atena ia. Reh Nina Jehuda abangna si nomor 4, tah pangen nge sidayaken Jusup e ku kalak mesir ah ? Emaka iangkatna Jusup bas sumur kering nari, idayakenna ku kalak Mesir, ibaba me Jusup alu itarik erdalan ibas gurun pasir seh ku Mesir, sekitar 1000 an km. Mesui kal akap Jusup, ipenjaraken ka ia i Mesir... seh maka ia iangkap jadi penasehat Firaun.... Tapi nina, Dibata kap si erbahanca aku seh leben asangken kam i Mesir enda, lako nelamatken kam alu cara si luar biasa, gelah kerina kesusurenndu pe selamat. I Siksa kam, tapi nina nindu, Dibata kap si ngaturkensa.
Isiksa kalak kita, tapi Dibata kap Singaturkesa. Jadi ise dage si menyiksa kita, musuhta tas seninata ? Emaka nina Tuhan Yesus, kelengi lah musuhndu.
Wooow luar biasa kal. Jadi senina ras turang, la jelas situhuna kalak si sianggap musuh e. Adi si pake kaca mata Dibata, entahpe sinen kerina jelma alu cara Dibata ngenen kerina jelma, maka labo lit sada pe musuhta.
Sada pembelajarenta bas berngi si pe 5 enda, “ada rencana Indah Tuhan di balik semua penderitaan kita” Amin ?
Pengkenaina
1. Senina nge maka senina, mari kita kerina si jadiken dirinta senina man senina nta, si jadiken dirinta senina man kalak sideban. Ibas konsep Sangkep nggeluh bas peradatan kalak Karo, jadi senina tah kalimbubu, tah anak beru emekap dalanta lako nuduhken kekelengenta. Situhuna Dibata pe bage nge sura suraNa maka ipakemkenna Sangkep Nggeluh e bas perukuren ras batin kalak Karo. Metenget ersenina, metami man anak beru, mehamat man kalimbubu. Amin ?
2. Jadiken lah kerina pengalamenta subuk si meriah bagepe si la meriah, subuk si sukacita bagepe dukacita sebab arah e nge Tuhan Dibata nuduhken rancanganna nandangi geluhta. Ula pernah jungut jungt, ula pernah mengeluh, ula pernah putus asa, ula pernah nalahken seninanta, terlebih ula sekali pe erbahan picet ukur orang tuanta. Amin ?
Pt Em Analgin Ginting
Bujur ras Mejuah juah kita kerina.
Komentar