Catatan Khotbah Minggu 12 Mei 2024

 Minggu Eksaudi : Begiken Min O Jahwe

Warna Mbentar

Invocatio        :  “(Pilipi 3 : 16)”

Ogen                 :  Perbahanen Rasul Rasul 1 : 1 - 5  (Tunggal )    

Khotbah          :  Masmur 31 : 1 – 5      (Responsoria )    

Thema              :  Pemindon Lako Iampang-ampangi Tuhan 

           

Khotbah : Masmur 31 : 1 – 5  

 Masmur Daud.

Ku Kam aku cicio o TUHAN ula pelepas aku kemalun. Kam kap Dibata si bujur, mindo aku, maka IkeliniNdu aku.

Begiken min pertotonku pedas min Kam reh mulahi aku. Jadi min Kam deleng batu inganku cicio, kubungku si nteguh inganku terkawal.

Kam kap ingan cebuni dingen bentengku, tegu-tegu dingen babai aku erkiteken GelarNdu.

Tegu-tegu aku maka ula aku kena siding itogeng kalak man bangku. Ampang-ampangi aku maka ula aku kena cilaka.

Pembukaan 

Syalomm mejuah juah senina ras turang, Kidekah nggeluh manusia ibas doni enda, lit lalap perbeben.  Lit nge lalap kiniseran, kiniseraan si mengancam keselamatan ta.  Tapi lit ka nge jalan keluar, lit solusi ras lit serpang luah man kalak si erlebuh man Tuhan.  Emaka labo perbeben e si perluna kal ibeneken, tapi kuja kam erlebuh tupung reh perbeben e.  

Kam sendiri, piga kali nge kam ngenanami perbeben tah kebiaren ibas geluhndu, janah ku  ja, tah ku ise kam erlebuh ? 

Fakta Dan Makna 

1. Erlebuh man Tuhan  

Arah Masmur 31 sijadi perikop ta enda icidahken man banta maka pemasmur e ku Tuhan ia erlebuh ibas ia kegogon, aru ate, kebiaren, ras ancaman ancaman si inanamina.  Respon alami manusia sanga suin, emkap erlebuh, berteriak, ndehereng.  La lit manusia si sinik ia adi sangana dat masalah, kebiaren ras sidebanna.  Kam gia, ma ndarat sora bas babahndu nari ibas paksana lit kesulitan e?  Pertanyaannya kai sora tah bahasa, tah pemindon, tah keluhan, si ndarat bas babahndu nari ?  Situhuna kal labo bas babah nari ngenca, tapi bas pusuh nari nge...   Adi kita kalak karo umumna respon spontan si darat bas babahta sangana suin tah kebiaren e  “ andiko nande” nita.  Jarang jarang nge si nderkuh, “andiko bapa” nina.  

Pemasmur enda negasken maka, adi sangana kina ibas suin ras kebiaren e, ku Tuhan lah endesken.  Erlebuh lah man Tuhan, nina pemasmur enda.    Andiko nande ndai si ganti lah ku, Sampati Aku Tuhan.  Sampati aku Bapa, mekuah min atendu aku Tuhanku.  Ninata.  Atau si lebih tajam ka ia “  Sampati aku Tuhan Jesus, ninta.  

Ku ise kita erlebuh ras uga pengelebuhta, situhuna  menggambarken ise si paling kuat sijadiken jadi ampang ampang kegeluhenta, ibas ukur simbagesna kal.  “ Sampati aku Tuhan ninta, erkiteken IA memang sijadiken, siniteki kita PENAMPAT situhu tuhu na kal.  Em maka spontan kal ku ia kita erbelas.  

2. Mindo man Tuhan gelah mbegiken pertoton.  Ertoto ertina na mindo man Tuhan, janah ertoto ku Tuhan mindo gelah mbegiken pertoton berarti, mindo dua kali, mindo alu tutus, mindo alu serius, mindo alu sungguh sungguh.  Enda terjadi erkiteken sigejap memang, lanai lit ise pe banci nampati selain Tuhan.  Enda me iman, kiniteken  ras keyakinan sipaling dalam, paling kuat, paling mendasar.  Emaka ibas kita ertoto ku Tuhan, nina pemasmur, labo babahta ngenca mindo, labo bibirta ngenca komat kamit, tapi pe pusuh ta yakin kal, tek kal, percaya kal.  Mindo ku Tuhan labo asal mindo, labo asal erbelas, tapi ibas kita mindo ku Tuhan e, terjadi penyerahan total man Tuhan. 

Nggejap kal pusuhta, bahwa tek kal kita ku Tuhan, bahwa ia ngenca penampatta, IA ngenca si ngasup nampati kita,  em sitek kal kita e. Pemasmur pe bage kin penggejapenna, sangan ia mindo ku Tuhan, seratus 100 geluhna e iendesken na man Tuhan, gelah Tuhan mbegiken peminndonna.   Janah,   kai pe siterjadi eme bekas pemindon ku Tuhan.   

Mindo kita Tuhan, sanga kita sakit e, janah tek kal kita maka Tuhan ngenca inganta mindo, jenari kaio pe pemere Tuhan man kita, eme simehulina.  Sebab pemere tah rancangan Tuhan e, berbeda ras rancanganta, tapi siingetlah maka racangan Tuhan ulin kal asangaken rancangan manusia. Amin ? 

3. Njadiken Tuhan benteng, ras ingan cebuni. 

Tuhan sijadiken ingan cebuni tah benteng enda me siinanami langsung emasmur.  Lit kin benda na benteng e, gunung batu.  Sanga ia ielis elis musuhna, ku gunung e ia kiam, ije ia cebuni. Jadi inanmina langsung perlindungan ibas gunung batu e.   Emaka pengalamenna ku gunung batu e ijadiken na analogi penampat Tuhan e.

 Kita adi sijadiken Tuhan benteng ras ingan cebuni ertina secara psikis ras iman nge, labo secara fisik.  Ertina Tuhan sjadiken benteng ras ingan cebuni, sijadiken IA si ngkawali kita.  Uga cara Tuhan ngkawali kita, labo sieteh kal, tapi lit sada keyakinan ras kepastian Tuhan enggo ngkawali kita.  

Wilayah pengkawali Tuhan e ibas pusuhta.  Emaka kalak si nggejapken pengkawalai Tuhan, kalak si nggejapken Tuhan jadi bentengna, percaya diri ia ibas situasi si kugapana pe.   Meriah ukurna ibas kesuliten e,  optimis ia ibas kiniseran e, rajin ia ibas kekurangenna e,  merian ukurna ibas la lit nakanna e.  Bagenda me situasi kalak singgejapken bahwa Tuhan jadi inganna cebuni, jagi bentengna.  La lit kebiarenna, la lit si erbahanca megogo atena, sebab lit sada kepastian ras keyakinanna maka ibas paksana, Tuhan tuhu tuhu reh nampati ia.  Emaka Daud pe sieteh nge maka labo ibas ia sangana mbiar e ia mate terbunuh, labo ibas perang ia kalah.  Sebab kai, Tuhan bentengna, Tuhan inganna cebuni, Tuhan singkawali ia.  Jadi  Tuhan nge si nampati Daud arah mereken Gunung Batu i padang gurun sangana ia kiam cebuni.  Amin senina ras Turang ?     

           Pengkenaina

1. Masalah, kiniseran , kebiaren, kegogon ras sidebanna labo terbeneken ibas doni enda nari.  Lit nge lalap sinanggel, lit nge lalap koiniseran, penderitaan,  penakit, ras sidebanna.  Tapi labo si ngatur geluhta, labo e serbahannca kita dat masalah, tapi ku ise kita erlebuh, ku ise kita ngadu ngadu, ku ise kita mindo ampang ampang?  Kedewasaan iman ras pemahaman teologista ngajari kita gelah ngadu ku Tuhan. 

2. Emaka ku Tuhan lah kita ngadu, ku Tuhan lah kita mindo ampang ampang ras perlindungan.  Tuhan ngenca si ngasup nampati kita ibas ermeriah ukur ibas kesulitan e, erbahan kita optimis ibas kinilalitennta, erbahanca kita megegen ibas kekotenta.  Jadiken ingan Tuhan ibas pusuhta simbagesna kal,   jadiken lah Tuhan inganta ngadu ibas persoalan sipaling rahasia na kal bas pusuhta.  Amin senina ras turang.   Mari sibelasken ras ras “ Begiken min aku o Jahwe” ninta. 

Bujur ras mejuah juah  kita kerina

Pt Em Analgin Ginting.