Efesus 4 : 7 – 16
Thema : Iranggut Dingen Ipersada
Sinergi dan Kolaborasi SDM Gereja
Efesus 4 : 7 – 16
Bahasa Karo
Man banta sekalak-sekalak nggo ibereken kengasupen si khusus sue ras baginta si patut si ibereken Kristus erpalasken lias AteNa.
Bagi lit tersurat i bas Pustaka Si Badia, "Asum Ia nangkih ku ingan si meganjangna, nterem ibabana kalak tabanen i bas barisen arak-ArakenNa; dingen IberekenNa pemere-pemere man manusia."
Kai kin ertina "Ia nangkih" e? Ertina eme: perlebe Ia nusur ku ingan si meterukna kal, i doni enda.
Ia si nusur e, Ia ka si nangkih ku ingan si ganjangen dingen dauhen asa kerina langit, gelah IdemiNa kerinana.
Ia si "mereken pemere-pemere man manusia. " Deba IbahanNa jadi rasul, deba jadi nabi; lit deba jadi perBerita si Mehuli, lit deba jadi si mpermakani perpulungen ras guru-guru.
Si enda IbahanNa gelah kerina anak-anak Dibata sikap ndahiken dahin pelayanen majekken kula Kristus.
Alu bage dungna ersada kinitekenta ras penandainta kerina nandangi Anak Dibata; kita dewasa, janah dungna seh kita ku tingkat kedewasan Kristus si serta e.
Alu bage lanai kita bali ras anak-anak, iombang-ambingken galumbang dingen ijole-joleken ku jah ku je alu angin pengajaren kalak penipu; ibabaina kalak si deban papak alu penebu-nebuna si guak.
Tapi alu nuriken si tuhu-tuhu alu dem ate keleng, reh belinna kita jenari seh ku tingkat kesempurnan Kristus. Ia kap takal janah,
ku Ia me kerina kula e irakut. Kerina ringring e iranggut dingen ipersada alu penampat urat si lit i bas ringring e.
Fakta Dan Makna
1. Man banta sekalak-sekalak nggo ibereken kengasupen si khusus sue ras baginta si patut si ibereken Kristus erpalasken lias AteNa.
Enda sada berita, ras sada fakta situhu tuhuna kal, bahwa Tuhan Yesus enggo mbereken kengasupen man banta sekalak sekalak secara khusus erpalasken lias AteNa. IberekenNa tanpa syarat, tanpa sipindo, tanpa sitotoken gelah kita ngasup nggeluh bas doni enda alu sukses, ras alu pendahin si ngena ate Tuhanta Yesus e. Emaka situhuna kal, si payo na kal, si benar na kal, Tuhan Yesus labo pernah mindo man banta, man bandu, man bangku sada hal si langa kin leben iberekenNA. Kai pe siipindo Tuhan man banta enggo leben iberekenNA, gelah kita ngasup ndalankensa ibas geluhta. Sada contoh si sangat sederhana, langa pernah ipindo Adam temanna nggeluh i taman Eden, tapi ieteh Tuhan perlu nge Adam e teman. Jenari sanga medem Adam, ijadikenNa sada teman na si sangat pas, sangat cocok, sepadan kal ras ia, emekap Hawa. Aku pe ku gejap kal gundari nora i rumah, enggo kin leben isediaken Tuhan jadi temanku nggeluh asa metua ope denga aku jumpa. Iooh, luar biasa kal keleng ate Tuhan ta Yesus e. Bujur melala Tuhanku. Jadi adi bage, adi lit simindo man kam, terlebih pemindon bas gereja nari, pemindon tenaga, pemindon waktu, pemindon pemikiren, pemindon sen , erta ras kai pe man bandu, ula mis simbak, ras ula ka mis ueken. Tapi ukurken lebe, totoken lebe, pindo penjelasan man Tuhan Jesus. Janah adi lit tergejap man bandu gelah uekenndu, ula mbiar, ula nolak, bereken alu tulus sebab situhuna na kal enggo kin leben ibereken Tuhan man bandu. Bagepe man kita kerina. Amin?
2. Alu bage dungna ersada kinitekenta ras penandainta kerina nandangi Anak Dibata; kita dewasa, janah dungna seh kita ku tingkat kedewasan Kristus si serta e. Enda me situhuna misi kerina kita ibas geluh enda, misi si khusus si perlu siantusi ras sidalanken ibas geluhta kerina emekap, ersada kinitekenta ras penandaita nandang Anak Dibata. Kiniteken si ersada ras penandaita ibarat ahli geologi, si alu ciri ciri tertentu ibas sada ingan iprediksi na bahwa lit kandungan emas ije (tapi langa bo ia jumpa emas e). Harus itambang, harus iusahaken, harus ilitken kerina peralatan, modal ras sidebanna. Janah perlu ia modal ras peralaten kerina si biaya na kataktennal 10 Juta Dollar. Sementara ia labo lit senna, tapi keyakinenna (kinitekenna ngenca megegeh). Surung kin taneh e itambangna lako njumpai emas e ? Uga akapndu bicara itandai anak muda ahli geologi ndai sekalak kalak bayak, si senna la ersibar buena, melias jelmana, ras bicara rugi pe ia 10 juta dollar la masalah man bana. Ma enggo pasti ijumpai anak muda ahli geologi ndai nge ia, jenari iturikenna isi pusuhna, janah mis kal isampati kalak bayak ndai ia. Jumpa emas e. Bage me pe kita, kinitekenta nandangi Tuhan Yesus e, pemilik kerina emas, pemilik Yerusalem si mbaru e isempurnaken alu penandaita nandangi Anak Dibata atau Yesus Kristus e. Uga carana gelah wari tambah wari ertambahna penandaita nandangi Ia tentu alu tiap wari njumpai Ia. Sijumpai Ia alu ndahiken dahin dahin siberekenNa. Labo banci sitandai kalimbubuta adi labo pernah sidahiken dahin kalimbubu ta e. Ma payo akapndu ? Bangsa Indonesia enda pe gundari enggo lebih itandaina Anak Dibata e, sebab mbarenda Isa Almasih nina, tapi gundari enggo sambarina jadi Yesus Kristus. Puji Tuhan.
3. Tapi alu nuriken si tuhu-tuhu alu dem ate keleng, reh belinna kita jenari seh ku tingkat kesempurnan Kristus. Ia kap takal janah, ku Ia me kerina kula e irakut. Kerina ringring e iranggut dingen ipersada alu penampat urat si lit i bas ringring e. Kedewasan sekalak kristen ibas doni enda teridah alu kemampuanna nuriken pengajaren situhu tuhuna kal. Labo pengajaren sibersumber ibas niat lako mpehaga diri (egoisme), tapi pengajaren situhu tuhuna kal emekap kerna Tuhan Jesus e. Adi enggo si tandai Ia, tentu pengajarenta kerna Ia pe lebih payo ras lebih tuhu (benar), janah lanai kita sangsi, lanai kita mbiar, lanai kita terombang ambing. Janah nina Paulus man kalak Efesus enda, adi erusurna kita nuriken alu dem keleng ate, maka kita pe situhuna kal reh belinna ka seh ku tingkat kesempurnaan Kristus. Turiken rusur Kristus e teman, maka kita lebih nandai Ia, janah kita nandangi seri ras Ia. Turiken lah Kristue e kuise pe alu kemampuan si lit bas kam, si enggo leben iberekenNa man bandu. Kita kula nge, janah Yesus Kristus kap takal. Kula adi la lit takalna labo banci nggeluh. Kalak kristen terlebih serayan si nandai takal e, labo kap nggeluh. Emaka kerina kita jadi sada ringring, si iranggut (ipersada) kubas takal gelah nggeluh kerina. Adi nggeluh kita kerina aminna pe erbage bage kita tapi sada ringring ras ersada, maka kita makin dewasa ras sempurna. Ertina, labo mungkin sempurna penandaiku Tuhan Yesus e adi la kin sampatindu teman, janah la mungkin ka sempurna penandaindu Tuhan Yesus e adi la ka kusampati bagepe isampati teman sideban. La sempurna tan sikemuhen e, adi la lit tan si kawes; la sempurna Adam e adi la lit Hawa, la sempurna serayan e adi la lit jemaat, la sempurna gereja e adi lakin ersada kerina ringring e ras ngakuken Yesus Kristus me kap takal e. Amin senina ras turang.
Pengkenaina
• Perlu kal sisadari maka kerina kebutuhenta sekalak sekalak enggo kin leben ibereken Tuhan erpalasken lias AteNa. Emaka Tuhan ta seh kal adil na, ras seh kal perkuahna. Adi mekuah ateNA, maka kai siipindoNa man banta, pasti si lit ibas kita. Adi sipindo man kalak sideban sada pemindon si la banci iberekenna, maka situhuna kal kita nge sinjureken e. Tapi Tuhan Yesus labo Tuhan si njureken sebalikna Ia me Tuhanta si meliasna kal. Amin?
• Perjelas talentandu, perjelas misi geluhndu sebagai kula ni Kristus. Jenari jumpai rusur Tuhan Yesus alu ndahiken dahin dahin pelayanan si isehkenNa man bandu. Pasti hasilna lebih sitandai Ia, janah kita pe makin sempurna seh ku kedewasaan Iman ras penandaita silebih tuhu tuhu. Pedasken dage ula lanai tertima tima, ula nai buang buang waktu. Amin.
Bujur ras mejuah juah kita kerina.
Pt. Analgin Ginting.
.jpg)
Komentar