2 Timotius 1 : 11 – 14
Thema : Erberita, Erkiniteken Ras Erkekelengen
2 Tim 1 : 11 - 14
Bahasa Karo
Aku nggo iangkat Dibata jadi rasul dingen guru guna pembarken Berita Si Mehuli.
Janah erdandanken si me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku Ia ngasup ngkawali aku ras si nggo IendeskenNa man bangku seh ku Wari pendungi e.
Tagangilah alu nteguh kata si kuajarken man bandu, jadi usihen si man ikutenkenndu. Janah tetaplah kam i bas kiniteken ras kekelengen si idat kita erkiteken persadanta ras Kristus Jesus.
Jagalah erta-erta si mehuli si nggo iendesken Dibata man bandu arah Kuasa Kesa h Si Badia si ringan i bas kita.
Fakta Dan Makna
1. Aku nggo iangkat Dibata jadi rasul dingen guru guna pembarken Berita Si Mehuli. Janah erdandanken si me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku Ia ngasup ngkawali aku ras si nggo IendeskenNa man bangku seh ku Wari pendungi e.
Enda me sada pengakuun Rasul Paulus kerna dirina, kerna uga igejapkenna Tuhan ngengkat ia jadi rasul ras guru lako pembarken Berita Si Mehuli. Tole pe iturikenna kai risiko ibas pengakunna e, ija ia ngenanami kiniseran, tapi tetap Paulus tek sebab itandaina ise penalemenna. Adi siuraiken sitik maka bagenda ia
a. Kai Jabaten Paulus : Enggo iangkat Dibata jadi Rasul ras Guru
b. Tujunna : guna pembarken berita si mehuli
c. Konsekwensina : melala Paulus ndatken kiniseraan
d. Tindaken Paulus ibas kiniseraan : tetap ia tek sebab itandaiNa penalemenna.
e. Uga kedungenna : Paulus tek kal maka man Tuhan seh pe wari pendungi.
Hal siperlu sipelajari ras sirenungken mbages mabges, lit tujun si kongkrit ras jelas ibas kerina jabaten gereja. Lit ka kiniseraan, janah arah kiniseraan e timbul kinigenggengen sebab tek kal man Tuhan Yesus. Amin. Emaka kita pe situhuna lit tugas ta secara umum emekap nehken berita si mehuli. Janah lit ka tugas khusus ta emekap sue ras jabatennta bas gereja. Ketua lit tugas na khusus, sekretaris pe, bendahara pe janah teluna tugas umumna pembarken berita si mehuli. Ula kari tutuskal atendu ndahiken tugas pelayanenndu, tapi lupa kam tugas umumna emekap pembarken berita si mehuli. Amin?
2. Tagangilah alu nteguh kata si kuajarken man bandu, jadi usihen si man ikutenkenndu. Janah tetaplah kam i bas kiniteken ras kekelengen si idat kita erkiteken persadanta ras Kristus Jesus. Pengakun Paulus si arah datas ndai ipakekenna guna bahanna ngajari Timotius. Iajarken Paulus kai sienggo iputuskenna ras inanamina. Ialamina lebe maka iajarkenna, gelah la hanya teori siikatake Paulus man Tomotius, tapi enggo leben inanamina. Ibas proses sibagenda harus lit komitmen si khusus, mbelin ras tulus. Emaka kerina kita, kita leben nggit erberita, nggit nambahi kiniteken (mpegegehi) bagepe turah keleng ate bas pusuhta. Mpeturah keleng ate gelah ermburak mburak ibas pusuhta emekap tek man Tuhan Yesus, janah lit ka tugas tah pe tanggung jawabta. Emaka megati siidah, Man kalak si nggit ertanggung jawab ibereken ka tanggung jawab si terbelinen ka. Rutang pusuh kalak si tutus, eme tanggung jawab ibas wawasan kalak Karo.
3. Jagalah erta-erta si mehuli si nggo iendesken Dibata man bandu arah Kuasa Kesah Si Badia si ringan i bas kita. Ijenda siidah maka ipindo Paulus man Timotius kesetianna. Kesetiaan = njagai erta erta si enggo iendesken Tuhan man Timotius arah Kuasa Kesah Si Badia. Memang adi siukuri pe mbages mbages sada kekurangen kal adi la kita ngasup setia man Tuhan Dibata, melala tawaren doni tapi ujung ujungna ego pribadi. Kesetiaan man Tuhan Dibata eme erta simehergana kal. Njagai erta erta Dibata e labo sevara pasif silakuken, tapi secara aktif ras proaktif eme erberita alu dasar kiniteken ras kekelengen. Amin ?
Pengkenaina
• Perlu kal sihayati ras si renungken kai ngenda status tah jabaten gerejawi sienggo ibereken ras itetapken Dibata man kita sekalak sekalak, janah adi enggo iangka ras ialokenndu status tah jabaten e, maka siap siaplah ngenanami kiniseraan. Pasti lit kiniseraan e, janah kiniseraan banci itambari labo arah nadingken tugas tah tanggung jawab e, tapi arah kiniteken ras kekelengen. Kiniseraan emekap ujian lako mpegehi kekelengen
• Kedewasaan dirinta erkiniteken terbukti arah kesetiannta nandangi Tuhan singgo leben setia ngkelengi ras nelamatken kita kerina. Emaka bicara setia kal pe kita ku Tuhan, pasti lah melala kal bolong bolongna kesetiaan ta e. Tapi Tuhan aras kesah Si Badia pasti setia nampati kita kerina, kai pe masalah ibas dirinta. Emaka penting ras eme simehergana kal erta bas doni enda, kesetiaan man Tuhan. Amin ?
Bujur ras mejuah juah kita kerina.
Pt. Analgin Ginting.
Komentar