CATATAN TAMBAHAN KHOTBAH Minggu 15 Januari 2023

 

Minggu Ephiphanias II/ Dibata Mpetandaken DiriNA

 

Invocatio	Sabap Tuhan enggo nuruh kami alu kataNa, 'Enggo kutetapken kam jadi terang man kalak si la nandai Dibata, arah kam me keselamaten seh ku kerina doni!' 13:47
Ogen	Keluaran 34 : 29 – 35
Khotbah	Filipi 2 : 12 – 18
Thema	Bercahayalah Seperti Bintang”

 

Khotbah  Filipi 2 : 12 – 18

 

 

2:12       E maka, o teman-temanku, bagi tetap ikutkenndu katangku, asum aku ras kam, terlebih pe genduari ikutkenlah katangku asum aku ndauh i bas kam nari. Tetaplah erdahin alu mbiar dingen gentar enggenepi keselamatenndu.

2:13       Sabap Dibata pe tetap erdahin i bas kam gelah kam nggit dingen ngasup ndalanken si ngena ateNa.

2:14       Dahikenlah kerina dahin alu la jungut-jungut ntah nimbak.

2:15       Gelah kam la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa. Ersinalsal min kam i tengah-tengahna bagi bintang-bintang nerangi langit.

2:16       Asum iberitakenndu Berita Kegeluhen e man bana. Adi bage ibahanndu lit pagi dalanna megah kuakap kerna kam i bas Wari Kristus reh mulihken, sabap si e nuduhkenca maka kerina usahangku ras pendahinku la sia-sia.

2:17       Banci jadi mambur me darehku jadi persembahen i babo persembahen si ipersembahkenndu man Dibata alu kinitekenndu. Adi bage meriah ukurku, janah kerina kam kubahan ngenanami keriahenku e.

2:18       Bage pe min kam, meriahlah min ukurndu, janah bahanlah maka aku pe ngenanami keriahenndu e.

 

 Pembukaan

Syalom mejuah juah kita kerina turang senina, ras nande bapa kerina.  Selamat tahun baru pe man banta kerina. 

Sikataken Bujur man Tuhan Dibata, enggo si lewati tahun 2022 alu kerina suka duka na, janah simasuki ka me tahun 2023 enda alu tetap erpengendes man Tuhan Dibata.

 

Apai nge pentingen siakap mbereken pengajaran man kalak si mehuli tah man kalak si kurang mehuli ?

Apai ka si usur dalankenndu ?

Mari sipergermetken bas perikop khutbah ta enda gelah banci sidat jawabanna.

Sumber photo  : www.facebook.com/CCManado/photos/a.114901769896031/279624133423793

  

Fakta dan Makna

  

1.     Paulus empeseh penggejapenna tentang  jemaat Filipi “ikutken ndu katangku asum aku ras kam, bagepe tetap ikutkenndu katangku asum aku ndauh ras kam” Jenari nina Paulus tole “Tetaplah erdahin alu mbiar dingen gentar enggenepi keselamatenndu “   Berarti jemaat Filipi kalak se mehuli, ndalanken kai sikatakan Paulus je ras la je Paulus.  Tapi man kalak Filipi itekanken Paulus tole bahwa “tetaplah erdahin alu mbiar dingen gentar”.  Ternyata adi si renungkan mbages mbages, man kalak si mehuli tetap iebreken ajar, nasihat, petuah.  Man kalak si mehuli nge lebih penting ajar e sibereken.  Jadi adi lit anakta, janah ibas matandu lit si mehuli ras lit si kurang mehuli, duana peng perlu ajarken.  Ajarken si mehuli e, ajarken ka pe si kurang mehuli e.

 

2.     Sada Info si sangat teologis ipeseh Paulus ka man Jemaat Filipi “Sabap Dibata pe tetap erdahin i bas kam gelah kam nggit dingen ngasup ndalanken si ngena ateNa.  Dibata pe tetap erdahin njagai keselamatan kalak si enggo ndatken keselamatan e.  Sada pertanyaan si sangat teologis.  Adi bage, banci dengan kin bene keselamatan e? Em bukti belinNA keleng ate DIbata si enggo cidahkenNa arah kematen AnakNa Yesus kristus.  Tetap ijagaina keselamatan ta, tetap Ia erdahin, ras erdahin she pagi wari na enggo keri.  La cukup Nina Dibata , enda tambarndu pandu atendu pan, lang atendu kam metehsa. La bage nina Tuhan.  Tapi enda tambarndu anakkku, mis panken tah inemken, entaku ku buat lau aqua na.  Ioooh  maha pengasih engkau ya Tuhanku.

 

3.     “Dahikenlah kerina dahin alu la jungut-jungut ntah nimbak” Gelah kam la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa. Emaka la bo lit hak ta menuntut kasih sayang Tuhan. Labo lit hak ta jungut jungut ibas erdahin, ibas melayani, termasuk nggeluh bas doni enda.  Labo berjut perlu ipebue ibas ayota, tapi cirem  simbaba kemalemen ate man kerina Jelma.

 

4.    Ersinalsal min kam i tengah-tengahna bagi bintang-bintang nerangi langit.  Lebih dari sekedar cirem, ikataken pe, maka kerina jemaat Filipi ipindo gelah ersinalsal itengah tengah jelma sienterem bagi bintang bintang nerangi langit. Tentu labo man jemaat Filipi saja ipindo Tuhan jadi bintang bintang si ersinalsal, tapi pe man kerina kalak singikutken TUHAN.  Man kerina kalak si enggo iserapken Tuhan.   Termasuk kam ras ku , kita ipindo Tuhan jadi bintang si ersinalsal.  Adi kalak nangkoi, kita la ikut nangko bahkan mberekeb si lit bas kita, Eme maksudna terang si ersinalsal.

 

Pengkenaina/Target Prioritas

(Pemahaman minimal yang harus didapat jemaat setelah mendengar Firman yang dikhotbahkan)

 

1.       Kai pe sipindo Tuhan man manusia gelah iidalanken Manusia e, situhuna enggo leben idalankenNA arah Tuhan Yesus Kristus.  Bas perikop enda, lit siidah 4 point sipindo TUHAN man kerina kita.  Ndalanken PedahNA alu tetap konsisten, Dibata tetap erdahin menjaga keselamatan manusia, ndahiken dahin alu la jungut jungt, ras jadi bintang si ersinalsal.  Kerina e enggo leben idalanken TUHAN YESUS.  Ibas minggu ephiphanias enda pe hal sienda icidahken Dibata ku kita. 

2.       Emaka mari si evaluasi kegeluhenta ibas tahun 2022 si lewat

a.     Enggo me konsisten kita ndalanken pedah Dibata e ?

b.     Jungut jungut denga kita ibas ndalanken dahin ras tanggung jawabta ?

c.     Enggo kin kita jadi bintang si ersinalsilsal itengah tengah ekosistem ta, I tengah itengah lingkungan hidupta.

3.       Kesempatan jadi bintang si ersinalsal itekanken gereja ta GBKP ibas tahun 2023 enda, ija thema besar ta “jemaat jadi pelaku aktif” .  Dua hal si jadi persinget emekap

a.     Man jemaat ula kam mela mela, ula kam sangsi, ula kam mbiar erbahan si mehuli/pelayanan I tengah tengah gerejata.   Sebab uga ulina pe perbahanennta langa bo sebanding ras kiniulin TUhan ta e.

b.     Man kita serayan ras pengepkep, mari si bereken peluang man anggota an gelah ia banci ngelayani lebih bebas.  Siidah kami selama enda, melala dengan kita serayan mengambil sendiri dahin dahin pelayanan e padahal banci situhuna idalanken anggota jemaat ta. 

PENUTUP

Ibas manajemen lit sada keyakinan bahwa, kerina manager banci hebat erkiteken ia ibimbing atasenna si hebat ka.  Emaka bas gereja pe, kerina jemaat jadi bintang siersinalsal erkiteken pengepkenna Serayan Tuhan enggo leben jadi bintang si ersinalsal.

 

Amin. Bujur Ras mejuah juah kita kerina  

Pt Analgin Ginting