.
1 Tesalonika 1 : 2 – 10
Thema : Jadi Usihen Nandangi Kerina Jelma
1 Tesalonika 1 : 2 – 10
Tetap kami ngataken bujur man Dibata erdandanken kam kerina, janah lalap pe kam inget kami i bas pertoton.
Sabap asum kami ertoto man Dibata Bapanta inget kami kuga kam ncidahken kinitekenndu arah perbahanenndu, kuga kam latih erdahin erdandanken keleng atendu, janah kuga tetapna ukurndu erpengarapen man Tuhanta Jesus Kristus.
Ieteh kami nge o senina-senina, maka keleng ate Dibata kam janah nggo IpilihNa jadi SikerajangenNa.
Sabap Berita Si Mehuli e ibaba kami nai man bandu, labo saja alu kata, tapi pe alu kuasa ras Kesah Si Badia, ras alu kiniteken si tetap nandangi pengajaren si tuhu-tuhu e. Ietehndu kap kai si ibahan kami asum kami ringan i tengah-tengahndu; si e guna kiniulinndu kap.
Nggo iusihndu kami bage pe iusihndu Tuhan. Janah aminna pe melala kiniseran inanamindu, ialokenndu Berita Si Mehuli e alu keriahen si reh i bas Kesah Si Badia nari.
Bage me kam nggo jadi usihen nandangi kerina kalak si tek si ringan i daerah Makedoni ras Akaya enda.
Sabap Berita Si Mehuli kerna Tuhan nggo mbar i bas kam nari labo saja ku belang-belang daerah Makedoni ras ku Akaya, tapi berita kerna kam erkiniteken man Dibata e nggo mbar ku japa pe. Lanai lit si perlu man katanken kami.
Icakapkenna pe kerna kuga kam nimai kerehen AnakNa i Surga nari, e me Jesus si IpekekeNa i bas si mate nari, dingen si mulahi kita i bas ukumen si nandangi reh i bas Dibata nari.
Fakta Dan Makna
1. Sabap asum kami ertoto man Dibata Bapanta inget kami kuga kam ncidahken kinitekenndu arah perbahanenndu, kuga kam latih erdahin erdandanken keleng atendu, janah kuga tetapna ukurndu erpengarapen man Tuhanta Jesus Kristus.
Rasul Paulus ibas perikop enda eme sekalak si tinggi kal interpersonal skills na, sebab ia sangat mengapresiasi (muji) perpulungen i Tesalonika. “sebab asum kami ertoto man Dibata Bapanta, inget kami kuga kam ncidahken kinitekenndu arah perbahanenndu dingen tetap ukurndu erpengarapan man Tuhan Jesus Kristus. Mengapresiasi adalah menyebutkan lagi kebaikan orang lain. Jadi la mesera muji. Muji beda ras mecat, entahpe mengkritik atau pe sarkas man kalak si deban.
Apakah muji muji kalak sideban banci erbahanca kalak sinipuji e puji pujin ? Bagem rusur pembelaan kalak si mesera kal muji kalak sideban. Tapi Paulus ngataken pujin na man perpulungen i Tesalonika dalam upayana berteologi. Ertina pujin e tujuanna labo gelah kalak siipuji senang ras sombong, tapi muji kalak sideban sekaligus mengingatkan bahwa semua perbahanan si mehuli e rehna ibas Tuhan Jesus nari. Tetap kam erpengarapan man Tuhan Jesus nina Paulus.
Jadi adi bage, pujin ta nandangai kalak sideban seh kal perluna, gelah kerina kita tetap erpengendes man Tuhan Yesus saja.
2. Nggo iusihndu kami bage pe iusihndu Tuhan. Janah aminna pe melala kiniseran inanamindu, ialokenndu Berita Si Mehuli e alu keriahen si reh i bas Kesah Si Badia nari. Bage me kam nggo jadi usihen nandangi kerina kalak si tek si ringan i daerah Makedoni ras Akaya enda.
Enggo iusihndu kami bage pe iusihndu Tuhan. Erbahan perbahanen si mehuli bas doni enda, perlu kal kita usihen. Usihen ta emekap Tuhan Jesus seniri, bagepe anak anakNA si enggo ipilih ras itetapkenna.
Usihen e perlu kal sebagai inspirasi ras si mpegegehi ibas menghadapi kiniseraan ibas nagaloken Berita SI Mehuli. Kesah SI Badia penampat situhu tuhu, janah sigejapken penampat e adi lit usihenta.
Adi kita pe ateta jadi usihen, maka kita pe nggit ngusih kalak Si Deban.
Enda me wacana teologis si ipeseh Paulus nandangai kalak Tesalonika, bagepe nandangi kerina kalak belang belang doni enda, dari masa ke masa. Ibas kita ngusih kalak sideban e, lit je kerendahan hati/ukur meteruk sekaligus pengarapen nandangi Tuhan Jesus Kristus. Jadilah usihen man kalak sideban ibas perbahanen si mehuli, perbahanen si mehuli e em keleng ate ras pengarapen nandangi Tuhan Yesus.
3. Kerina kalak ncakapken kuga nai kam ngalo-ngalo kami asum kami reh ndahi kam, janah kuga kam nadingken sembah-sembahenndu guna ndahi Dibata, jenari nembah man Dibata si nggeluh dingen si tuhu-tuhu.
“kerina kalak ncakapken kuga nai kam ngalo ngalo kami asum kami reh ndahi kam, janah kuga kam nadingken sembah sembahenndu guna ndahi Dibata’. Motivasi ta erbahan lagu lagu langkah si mehuli labo gelah kita icakapken (ipuji) kalak si enterem, tapi gelah inget kalak Dibata, ras imuliakenna Tuhan ta si melias e. Labo perlu kita icakapken kalak, gelah megah siakap ras kita siakap si hebatna, tapi perlu kal kita icakapken kalak gelah ipujina Tuhan Dibata si mehuli e. Emaka adi icakapken kalak pe kam ibas perbahanenndu si mehuli e, bas pusuhndu kataktenlah “kerina e erkiteken perkuah ate Tuhan Yesus Kristus nge”.
Kalak si mengaharapkan pujian kalak sideban untuk dirina tok, untuk kehebatanna tok, untuk kemegahen dirina tok, situhuna kalak si langa nandai dirina, langa nandai Tuhan, ras kalak si pengarapen geluhna hanya doni enda saja.
Kita lanai bage, kita enggo ipilih ras iserapken Tuhan jadi sikerajangenNA. Icakapken kalak kita erkiteken ipeganjangna atena Tuhan ta si melias e. Amin ?
Pengkenaina
• Mehulikal kita mewujudkan thema ta enda bas geluhta, kita jadi usihen kerina jelma. Janah adi ateta jadi usihen kerina jelma, maka kita pe leben nggit ngusih Tuhan ta ras pe ngusih kerina suruh suruhen tahpe serayan Tuhan. Ise serayan e jadi usihenndu ? Ise pendeta e jadi usihenndu, ise nabi/rasul/penginjil e jadi usihenndu? Aku erpala pala kal ngusih Paulus ibas geluhku, gelah adi lit kalak singusih aku maka lit datca nilai na ibas ia ngusih aku e.
• Pengataken Bujur ta man Tuhan emekap adi sibaba dirinta jadi usihen kalak sideban. Jadi adi kita icakapken kalak ras ijadikenna usihen, labo egelah megah siakap, tapi gelah ipermuliakenna Tuha Jesus Kristus. Ibas Paulus muji perpulungen Tesalonika e, ingetna kiniulin Tuhan Jesus ras Kesah Si Badia. Bage ka pe lah min kita kerina, adi iinget kalak kita, mis ia ngataken bujur man Tuhan Jesus. Amin ?
Bujur ras mejuah juah kita kerina.
Pt. Analgin Ginting.
Komentar