Bahan Bacaan : Matius 5 : 13 – 16
Thema : Nggeluh Jadi Sira Ras Terang
Matius 5:13-16 (KARO) " Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, emaka iambekken jenari idedehi kalak.
Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.
Labo isagani kalak lampu kenca bage itutupina alu tumba; tapi isangketkenna, gelah terang iakap kalak kerina si lit i bas rumah e.
FAKTA Dan MANFAAT
1. Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, emaka iambekken jenari idedehi kalak.
Sira, termasuk sada komiditi si pasti lit ibas tiap rumah tangga i doni enda, tiap restorant, warung, cafe ras kerina ingan man pasti lit sira. Tanpa sira, pangan la ernanam. Lomok lomok tah pe cipera adi la lit sira la entabeh... Hambar, janah la lit siman sa. Kam pet kin cipera la sirai ? Adi sungkun kam pasti berjut mis ayondu. Cipera, la lit tuba na, la lit dawan na, tah la lit kentang na entabeh denga man pangan adi pas sira ra. Bahkan Cipera la lit ayam kampung na pe entabeh denga, adi pas sira na. Tapi legkap pe kerina dawan, kentang, manuk na adi la lit sira na, labo piga kita si merincoh. Sira seh kal perluna erbahan pangan entabeh. Entabeh pangen, meriah ras senang kegeluhen. Bagi sira e eme analogi/persamaan kerina kalak Kristen, terlebih Saitun.
Ersura pe kita jadi sira, geluhta lanai bo ndekah. Enggo jam 3, tah jam 4, lit deba enggo jam setengah enem, matawari e ibarat geluhta. Emaka man kita si langa pernah igejapken kalak kita “sira na”, gundari kesempatenta. Kita harus jadi sira, gelah ernanam ras ersenangna geluh kalak sideban arah geluhta e. Ma payo akapndu ?
Sira kegeluhen ertina, nggit kita melengas pe gelah geluh kalak sideban, anak anakta, kade kade ta, termasuk pasangannta semakin sukacita. Amin ?
2. Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.
Analogi sipeduaken kita ipindo jadi terang, terang seh kal perluna ibas gelap. Adi bas gelap la lit terang banci kita tertuktuk, banci kita jongkang, tah nampok kuteruh dingen suin, adi bas gelap la lit terang banci kita papak ku dalam si berbahaya ras la mehuli. Emaka harus lit terang bas gelap e.
Kalak Kristen khususna saitun ipindo jadi terang gelah banci kegeluhen si gelap bas kalak sideban terterangi, jenari lanai ia tertuktuk, ndabuh ras papak. Kadena kin si gelap si harus iterangi ? Tentu perukuren tah pe pusuh na. Perukuren si egois, perukuren si katawari mbiar, ragu ras la banci fokus eme perukuren si gelap. Janah e me siperlu iterangi.
Uga nerangi pusuh si gelap, tentu alu mpeseh kata Dibata, ersaksi kerna campur tangan Tuhan bas geluhta. Emaka saitun, enggo melala pengalaman geluhna, enggo melala kesaksinna, sibanci ipeseh lako nerangi pusuh kalak sideban.
Aminna pe hampir sama, tapi labo seri kal maksudna jadi Sira ras jadi terang... Adi jadi sira lebih umum ia erguna ku kugeluhen si tep tep wari, nampati kalak (erdiakonia)
Adi terang lebih khusus ia nerangi pusuh. Kalak sideban, ersaksi, motivasi ra. njelasken kata Dibata (ermarturia ras er koinonia). Ma enggo jelas akapndu ?
3. Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga."
Ipindo ersinalsal terang ta i lebe lebe kata kalak sienterem gelah idahna perbahanenndu simehuli (sira) alu bage ipujina Dibata, Bapandu i Surga. Memang payo kal janah logis kal, bahwa adi si saksiken (terang) kerina pengalamannta ndatken ras nggejapken perkuah ate Dibata, ma tentu ipujina Tuhan Dibata e... “Ersaksi kita, mehuli kal Ginting mergana ah ninta man kalak sideban, tentu kalak si deban pe ngaloi, payo kal aku me merincuh jumpa ras Ginting mergana si turikenndu e nina kalak”. Tah pe misalna mejile ras mehuli kal Beru Barus ah nindu, tentu enterem kal anak perana e erjabu atena ras beru barus, Ma setuju kam? Hahahaha.
PENGKENAINA
1. Saitun harus nggit jadi sira, nggit nampati kalak sideban gelah ernanam geluhna janah ngataken bujur ia. Malem atena nggeluh janah tersampati kal akapna ia. Saitun ula nai melalasa ertimbang, waktu ta bengkek ku Jerusalam Baru e lanai ndekah. Emaka mis lah jadi sira, kai lit bas kam bagiken ras kalak sideban.
2. Saitun harus jadi terang, nggit ras pang ersaksi kerna kiniulin Tuhan Dibata, gelah terterangi pusuh kalak sideban. Pusuh siterang bas kalak sideban nggit ia ku gereja, rajin ia PJJ, nggit ia nampati ras erpengendes ia man Dibata. Saitun jadi terang alu nggejapken ras nuriken kerina pengalamenna ipasu pasu Dibata. Ulanai pedekah dekah, enggom nandangi bengket kita ku bas ingan siisikapken Dibata .... ingan si dem alu sira simehulina ras terang si har har na. Amin?
Komentar