Thema : Kekelengen Nandangi Undang Undang Tuhan
Masmur 109 : 97 – 104
Bahasa Karo
Lanai tanggung keleng ateku man undang-UndangNdu, kukusur-kusur i bas ukurku gedang-gedang nu wari.
Kerina PerentahNdu tetap kuinget katawari pe, emaka pentaren aku asangken imbang-imbangku.
Pengertinku ngelebihi pengertin guru si ngajari aku, erkiteken kupekusur-kusur PerentahNdu i bas ukurku.
Belinen kepentarenku asangken orang-orang tua, erkiteken kuikutken kerina PerentahNdu.
Kerina perbahanen si jahat kusilahken, sabap kuikutken ateku KataNdu.
AturenNdu la kupersilahang, erkiteken Kam jine gurungku.
Andiko, entebu kal AturenNdu, tebun asangken tengguli.
Fakta Dan Makna
1. Lanai tanggung keleng ateku man undang-UndangNdu, kukusur-kusur i bas ukurku gedang-gedang nu wari.
Lit pengertin si lebih mendalam ibas diri pemasmur kerna Undang Undang Tuhan. Pengertin si muncul erkiteken Undang Undang Tuhan e la sekali begiken ngenca. Tapi nina kesaksin pemasmur enda, kukusur-kusur ibas ukurku gedang gedang nu wari. Oge, pahami, kaitken ras pengalaman geluh tep tep wari, refleksiken jenari terbit pemahaman ras pengalaman kerna Undang Undang Tuhan e. Kita usuren gagal bas tahap pertama, labo si si oge/baca alu tutus, sebab talu iban perukuren si lit. Emaka la nai baci pe kita kosentrasi ngoge pedah Dibata. Point paling penting ibas bagian sipertama enda, sioge lah usur Undang Undang Tuhan e alu dem kosentrasi, jenari sikaitken ras pengalaman geluhta. Jenari kari dat kita kesimpulen, pengalaman geluh (senang ras gulut) emekap penjelasan ras bukti man Undang Undang Tuhan si sangana si baca ras siukuri. Akibatna, kai pe pengalaman e jadi penambah man pengangkanta. Wah... luar biasa kal ya.
2. Andiko, entebu kal AturenNdu, tebun asangken tengguli.
Adi bage sibahan mekanisme kegeluhen ta, emaka payo kal kai kata masmur enda bahwa AturenNDU tebun asangken tengguli. Sebab adi kerina pengalaman geluhta, pengalaman erdahin, pengalaman nghamati sangkep nggeluh, pengalaman nampati ras isampati kalak sideban, pengalaman erlajar, ikut kursus ras pengalaman pengalaman sideban adalah benar benar / riel penjelasan kerna Undang Undang Tuhan maka TUHU kal bahwa Aturen Tuhan e entebu, tebun asangken tengguli. Adi Undang Undang Tuhan sijadiken palas tahpe fondasi ibas kerina pilihen ta bas geluh, tentu entebu kerina kai sinialami. Kesenangan hidup adalah bergerak, move on, tentu adi tiap wari kita melakukan move on ma tentu senang kal geluhta ?
3. Dat aku kepentaren i bas undang-UndangNdu nari, emaka ciga kal ateku kata la tuhu.
Akhirna nina Pemasmur, adi enggo sidat kepentaren / kebijaksanaan ibas Undang Undang TUHAN nari, tentu kata la tuhu enggo cigakal ateta. Sebab adi ngikutken ras ngantusi Undang Undang Tuhan e mabai kita ngeteh rahasia rahasia terbesar ibas Tuhan nari, janah enggo siidah alu mata iman ta, emaka ranan kalak sideban sieteh tuhu tah lang. Usuren nge sieteh pe kata kata la tuhu bas kalak sideban nari. Tentu ciga kal ateta dungna. Misalna, tanggal sienda kam tubuh nina kalak man banta, padahal salah sikatakenna e, janah ngotot ka ia, ma ciga kal ateta ari. Undang Undang Tuhan mabai kita ngidah rahasia rahasia Tuhan. Bagi Abraham si mbegi rahasia Tuhan asum nina, “nen min bintang bintang bas langit ah, bagem pagi buena kebereken kesusurenndu, Nina Tuhan.” Pada hal tupung e, langa tubuh anak Abraham si Ishak. Gundari, banci sirenungkan, tuhu tah lang janji Tuhan e man Abraham? Tuhu kal ari. Rahasia nggeluh bas doni enda baci sidat ken, adi nggit kita ngoge ras ngukuri Undang Undang Tuhan e suari ras berngi. Si kususr-kusurlah ukurta. Amin?
Pengkenaina
• Perikop ta enda situhuna kal menuju ku Tuhan Yesus, (sekitar 700 tahun nari pagi reh) sanga Masmur enda itulis. Baca Masmur enda, ence inget uga kegeluhen Tuhan Yesus. Seri tah lang ? La kin akapndu Tuhan Yesus nge singataken bahwa Undang Undang Tuhan tebun asangken tengguli?. Tuhan Yesus umur 12 tahun nari pe ia, “tebun” akapNa i rumah bapaNA asangaken kai pe. Ertina, gelah Undang Undang Tuhan e entebu,ajarken lah man anakta kitik kitik nari ia. Gelah pengalaman ngoge Undang Undang Tuhan terisi bas pusuhna kitik kitik nari.
• Mari sisungkun dirinta sekalak sekalak, Tuhu kin keleng ateta nandangi Undang Undang Tuhan e ? Adi keleng ateta, janah janah buktina pe mesunah siakap nuduhkensa, puji Tuhan. Adi mesera siakap njawab penungkunen enda, salah sada sebabna, bas dirinta lalan undang undang doni enda. Lalan taki pacik, egoisme siringan ibas pusuhta. Emaka perlukal siukal isi pusuhta e, pedarat kerina si la payo e, jenari siisi alu Undang Unang Tuhan. Undang Undang simaba kepentaren ras mbuka rahasia rahasia Tuhan man geluhta. Amin ?
Bujur ras mejuah juah kita kerina.
Pt. Analgin Ginting.
.jpg)
Komentar