Mejuah-juah ras Shalom man banta kerina,
Wari
enda ras nderbih enggo enterem pengungsi mulih ku kutana masing-masing.
Tapi pengungsi i kuta-kuta: Sukameriah, Bekerah ras Simacem langa ibere
mulih ku kutana, erkiteken teluna kuta e ibas lingkaran 3 Km i Sinabung
nari. Bagepe enterem i Sigarang-garang nari, pagi maka mulih. Pengungsi
ibas kuta si telu enda ndai kerina tading ras ipindahken ku Posko
Pengungsi si ikelola GBKP, e me i Posko Utama i Kantor Klasis Kabanjahe /
Gereja Kabanjahe Kota, teremna 353 kalak ras Posko GBKP i Payung
teremna 381 kalak. Jadi lit denga pengungsi 734 kalak nari, langa eteh
ndigan iijinken mulih ku kutana, mungkin seh ku tanggal 28
September akhir masa Tanggap Darurat. Sitimai, janah pelayanan man para
pengungsi tetap mehuli amin pe enggo iidah para relawanta agak latih,
terutama si erdahin i dapur umum bagepe ibas Pos Utama.
Tuhu letusen deleng Sinabung eme sada malapetaka, tapi lit hikmahna ibahan Dibata:
1.
Arah kejadin enda teridah kuga hebatna buah kiniteken perpulungen GBKP,
i ja nari pe la erndobah, arah partisipasina nampati pengungsi. Kuidah,
"tidak ada orang yang terlalu miskin untuk mampu memberi". Lit deba
naruhken jambe, pucuk ropah, pangan-pangan anak-anak (semacam Chitato
rsd). Asa ngasup ras si lit ibas ia. Sekalak Pertua i Peria-ria
nari nurikenca ibas Sidang Klasis, maka sekalak pernanden merawa
perbahan la ipindo kai pe man bana guna itaruhken ku Kabanjahe. Perbahan
sanga ipepulung bantuan sangana ia i juma. Kesah si Badia erdahin
itengah-tengah perpulungen, teridah arah perbahanenna.
2.
Para pengungsi si tading ibas Posko-posko GBKP merasa senang ibas
pelayanen kerina relawan GBKP, subuk anggota perpulungenta bagepe ibas
agama sideban nari. Erkiteken kerina pengungsi iperlakukan sebagai teman
sesama manusia, la iperlakuken sebagai pengungsi. Enda pengakuan
pengungsi si pindah ku Posko GBKP ibas Posko sideban nari.
3.
Para pengelola Posko-posko
sideban ngakui janah mujiken kai si ilakoken ibas Posko GBKP, si
ikatakenna ibas rapat-rapat Koordinasi, siipimpin Danrem i Sibolga nari.
Kerjasama Posko GBKP ras Posko Utama Pemkab cukup mehuli, teridah ibas
sisampat-sampaten, memang pengelolana pe Pt/Dk nta ka nge umumna.
4.
Ibas Erupsi Sinabung sekali enda, teridah maka Media Massa, subuk Media
Cetak bagepe TV agak enggan menyoroti kai siilakoken GBKP, enggo pe
idilo guna siaran Pers, labo ndarat ibas koran. Heran kita sitik, kai
penyebabna. Tapi enda labo pentingsa man banta, sipentingna erbahan
simehuli arah nehken kekelengen. Dibata njagai kita gelah ula kita
terpancing mementingkan 'popularitas'. Sikataken bujur man Tuhan.
5.
Peningkatan Solidaritas Eksternal GBKP sebagin enggo ilakoken arah
letusen Sinabung, janah teridah maka kerina anggota perpulungen,
simegegeh ras si kurang megegeh enggo empersada gegeh nampati si perlu
isampati, janah hasilna: 'luar biasa'. Tapi sekali nari ula e erbahanca
kita meganjang rukur.
Bagem lebe sekali enda, Tuhan simasu-masu ras simakeken kita kerina jadi alatNa.
Pdt.M.P.Barus/
Selasa 24 September 2013
Komentar