Catatan Tambahan PJJ 29 Oktober – 4 Nopember 2023

Thema : Mediate Erkade Kade

Jop 42 : 11

Bahasa Karo 

 Kerina senina-senina Jop ras turangna, bage pe teman-temanna si mbarenda, reh ndahi ia, janah ras ia man-man i bas rumah Jop. Iapulina Jop, janah ikatakenna maka ia pe kerina ikut rate ceda i bas kiniseran si nggo irehken TUHAN man bana. Sekalak-sekalak ia mereken duit ras sada cincin emas man Jop.

 

Fakta Dan Makna 

1. Kerina senina-senina Jop ras turangna, bage pe teman-temanna si mbarenda, reh ndahi ia, janah ras ia man-man i bas rumah Jop. Sada ayat ngenca bahan PJJ nta ibas minggu enda, aminna pe hanya sada ayat, tapi ayat Firman Tuhan enda seh kal lengkapna terlebih adi siterapken guna perkade kadenta.   Bagin si pertama, igambarkan maka tupung Job lit ibas keadaan si mesera akapna, reh me kerina senina ras turang Job ndahi ia, bagepe teman teman na si mbarena. Reh kade kadena enda, babana nakan pangan jenari  radu ras ia man man kerina i rumah Job.  Tentu ibas paksa e, meriah ukur Job, la ia sisada ngukuri keadaanna.  Meriah memang adi kita ndahi kade kadenta, tah pe reh kade kadenta ku rumah.   Kam gia ma meriah ukurndu adi reh kade kadendu?  Emaka tandana erkade kade, saling mengunjungi kita kerina.  Teman temanta si labo lit hubungen dareh ras kita pe jadi kade kade ta adi reh kita ku rumahna, bagepe adi reh ia ku rumahta.  Sebalikna, perkade kadenta, lit hubungan darah pe, banci er sirangna adi labo kita pernah reh ndahi ia, tah ia reh ndahi kita.  Ibas kita adat Karo pe, sangap kal anakberu e adi reh kalimbubuna, janah mehamat kal kalimbubu e adi reh anak beruna ndahi ia.  Biak ersenina/ersembuyak pe bage nge, ergegehna kiniersadaan ersenina adi usur kal saling mengunjungi.   Enda me pedah sipemena, dahi kade kadenta. 

2. Iapulina Jop, janah ikatakenna maka ia pe kerina ikut rate ceda i bas kiniseran si nggo irehken TUHAN man bana.  Biasa kal bas bahwa percakapan percakapan iterusken kenca dung man.  Bas kita kalak Karo pe bagenge, emaka lit penungkunen “Kai Kata Nakan”.  Sebab nakan, pangan, adalah pembukaan ibas percakapan. Nini Kalak Karo sinai pe, man ras ras lebe maka ngerana ngerana.   Senina ras turang Job ndai pe seri kal kepe,  kenca ia man ras ras, jenari isehkenna kata apul apul man Job, ituduhkenna rasa empatina ibas Job ngenanami kiniseraan nina, ia pe kerina ikut rate ceda ngidah  Job ibas situasina.  Percakapan ibas kita Kalak Karo si Kristen mehuli kal, adi ope denga cakap cakap, Si bacaken lebe sada ayat tah dua ayat Pustaka Si Badia, jenari maka siterusken ercakap cakap.  Uga akapndu, ma mejile ? 

3. Sekalak-sekalak ia mereken duit ras sada cincin emas man Jop.  Kepeken la kepe cakap ngenca ituduhken kade kade Job si reh ndahi ia.   Kenca iapulina Job, emaka sekalak sekalak ia berarti kerina, mereken duit ras sada cincin emas man Job.  Tiap kalak si reh mbereken duit ras cidi emas.  Nandei, piga nge enggo cincin Job ndai teman teman?  Ngapuli erkata kata, mebreken duit sada perbahanen.  La reh saja, la cakap saja tapi perbahanen pe segera menyempurnakansa. Luar biasa.   Sanga aku kitik nai i Siki, kuinget sada mama kami Tarigan mergana reh ku rumah kami i Tanah Jawa Siantar nari, janah muat mulih mama ndai ieberekenna Sen Telu Ratus Rupiah man aku ras agi agi.  Megah kal kuakap ngaloken sen mama e, galangkal.  Sebab pada masa e, Rp 5 rupiah pe mahal kal, dat sada piring mi gomak dengan sambal tomat pake daun salam ka.   Emaka asa gundari pe kuinget mama e, bahkan bajuna tupung e tergambar denga seh asa gundari.  Celana jeans mama kami e, bajuna kaos mentar janah pake topi tekab ia.  

Erkade kade bagi senina ras turang Job, lit luah na, lit pemerena.  Nini Iting kami Buntu nari, reh ia usur maba beras mbaru, kenca dung ia rani.  Kuinget asa gundari.  Kade kade ibas Adat Karo, mbere luah ia.  La padah emas bagi kade kade Job ndai, tapi lit sibereken ibas kita jumpa ras kade kade.  Emaka situhuna kal lengkap kal pelajarenta ibas sada ayat bas Job 42 : 11 enda. Teman. 

 

Pengkenaina

• Kualitas perkade kadenta banci ipegegehi Pustaka Si Badia. Sebab melalakal contoh pengalaman si meneguhkan cara nta erkade kade.  Tapi nina Tuhan Yesus, Ia me kade kade nta situhu tuhuna kal.  Amin. 

• Lit telu tahap banci seterapkan ibas kita mediate erkade kade emekap, ndahi, ngapuli, ras mere man kade kadenta e.   Erkade kade ertina saing mendatangi (ndahi) entahpe sidahi dahin, erkade kade mbereken pengapul, tah pe ercakap ercakap simehuli ras memotivasi serta empati, erkade kade ertina mere tanda kiniersadaan ras kekelengen.  Amin. Senina Ras Turang? 

Bujur ras mejuah juah kita kerina.  

Pt. Analgin Ginting.