Catatan Tambahan PJJ 27 Agustus – 2 September 2023

 

2 Korinti 8 : 16 – 19 

Thema : Erdahin Guna Kiniulin Perpulungen  

2 Korinti 8 : 16 – 19 

Bahasa Karo

2 Korintus 8:16-19 (Pustaka Si Badia)

Bujur ningkami man Dibata si erbahanca maka bali ras kami ergiah-giah ukur Titus erdahin guna kiniulinndu.

Labo saja meriah ukurna ngaloken pemindon kami, tapi pe ergiah-giah ukurna seh maka alu ukurna ersuruh nggo itetapkenna ndahi kam.

Isuruh kami pe ikut ras ia sekalak senina si ipujiken perpulungen-perpulungen i japa pe erdandanken dahinna meritaken Berita Si Mehuli.

Labo e saja, tapi pe ia nggo ipilih dingen itetapken perpulungen-perpulungen jadi teman kami i bas perdalanen ndahiken dahin keleng ate e. Si e ilakoken kami guna kiniulin Tuhan dingen guna encidahken ukur kami ersuruh ndahiken dahin e.

 

Fakta Dan Makna 

1. Bujur ningkami man Dibata si erbahanca maka bali ras kami ergiah-giah ukur Titus erdahin guna kiniulinndu. Salah sada karakter Paulus siidah ibas perikop si jadi bahan PJJ ta minggu enda emekap, kinirajinenna ngataken bujur man Tuhan Dibata, bagepe mengapresiasi (memuji) kalak situtus erdahin guna Dibata.  Siidah maka ituliskenna surat na man kalak Korintus uga ia ngataken bujur man Dibata kerna kinitutusen ukur Titus erdahin guna perpulungen e.  Mengapresiasi tempa mesunah kal ilakukan, tapi situhuna melala kal kita kurang apresiasi, janah anak anak ta pe bertumbuh ibas suasana jabu si kurang apresiatif.  Sesama serayan pe kita kurang saling mengapresiasi, sesama pengurus PJJ pe bage kange, janah i tengah jabu pe kurang kal silakoken bagi kai siituduhken Paulus.  I apresiasina kal Titus sue ras kai sibahan Titus.  Kalak si kurang mengapresiasi emekap kalak si la kin lit pengalamanna ndatken apresiasi e ka.  Padahal apresiasi nina sekalak ahli, seri ras nakan pertendin.  Nakan guna kula, apresiasi guna pertendin. 

2. Isuruh kami pe ikut ras ia sekalak senina si ipujiken perpulungen-perpulungen i japa pe erdandanken dahinna meritaken Berita Si Mehuli. Isingetken Paulus pe tole, bahwa lit sekalak sinemani Titus e, si la tersinget gelarna, tapi ipujiken perrpulungen kal ia ibas ia ndahiken dahinna meritaken Berita Si Mehuli.  Dahin meritaken Berita Si Mehuli tentu maba kiniulin man kalak sienterem, janah enggo kin bage hukum na bas doni enda, bahwa kalak situtus maba kiniulin pasti ipujiken kalak ia.  Perpulungen pe mujiken kalak si bage.  Sienda isingetken Paulus man perplungen Korinti .  Sekalak ahli si tergelar Robert Cialdini ngataken tentang Prinsip Resiprositi;  kalak sideban cenderung ngelakoken perbahanen si mehuli siinanami bas kalak nari.  Contoh na : adi traktir kalak kam, maka kam berusaha nraktir ia ka sada paksa.   Adi bereken kalak luah na mulih kuta nari man temanna, maka temanna e pe cenderung maba luah ka pagi suatu saat.  Bagepe soal apresiasi enda ndai,  kerina kalak siipujikenndu pasti ka pagi sada masa ipujina ka kam.  Kerina kalak siisampatindu, pasti sada masa pagi isampatina kam. Amin ? 

3. Si e ilakoken kami guna kiniulin Tuhan dingen guna encidahken ukur kami ersuruh ndahiken dahin e. Enda me pengakun Paulus situhuna si paling dalam kal, nina ilakokenna dahin na e guna kiniulin Tuhan, guna encidahken ukur kami ersuruh ndahiken dahin e.  Perkataan Paulus man kalak Korinti enda, perlu kal si renungken mbages mbages senina ras turang, sebab enda me motif si paling tulus ibas kita ikut ngelai Tuhan ta e.  Kita nggit jadi pengurus, kita nggit jadi serayan, kita nggit berkorban labo gelah hebat kita i mata kalak si deban.  Tapi guna encidahken ukur siersuruh ndahiken dahin dahin Tuhanta.  Ula min nggit kita dahiken dahin e gelah mehamat ras terhormat kita idah kalak.  E hanya perasaan sementara.  E hanya kepuasan si kentisik ia.  Tapi adi sidahiken dahin e guna kemuliaan Tuhan, maka perasaan ermengkah ras persaan bersyukur lit lalap bas pusuhta, janah kita pe ersehatna.  Dahiken lah dahin pelayanan si enggo sialoken e alu ermeriah ukur ras ngataken bujur man Tuhan.  Sada kesaksian si pernah ibegi kami ibas Mama kami alm Pdt Thomas Budiman Sitepu nina, seh kal ulina Dibata e man aku, emaka kupindo sada berekenNa 9 tah 10 nina.  Emaka ope ia sekolah Pendeta, ia jadi Vice Presiden ibas PT INCO si penghasil Nikel i Soroako Sulawesi Selatan.   Aku sendiri pe kugejap kal bagi kai siisaksiken mama pendeta enda.  Kam gia ma bage nge pengalamanndu ?

Pengkenaina

• Adi isungkun kam, piga nge nilai na ketutusenndu ibas erbahan si mehuli nandangi perpulungen 9 atau 10, atau sisitikna 8 ? Atau baru 6 tah 5 ?  E kam metehsa, piga pe nindu kam ngenca situhuna ngetehsa ras Tuhan saja.  Pemindon Paulus mari sitingkatken nilai na jadi 9 tah 10. Amin?

• Gelah banci kita ertutusna mari dage lebe sigejapkenkal uga kin belinna kiniulin Tuhanta e nandangi kita, nandangi kam.  Adi Pendeta Sitepu ndai igejapkenna kal bahwa seh kal belinna kiniulin Tuhan e nandangi ia, emaka ikatakenna, kupindo 1 bereken Tuhan 9 tah 10 nina.   Paulus pe bage, maka pernah nge ikatakenna,  kenca ia iselamatken Tuhan Jesus nina, kerina sikuakap mbarenda si paling penting ras si mehergana kepeken sampah nge kerina nina.  Memang payo kal teman, bahwa la lit si lebih meherga bas doni enda selain keleng ate Tuhan Dibata man banta kerina.  Amin ??? 

 

Bujur ras mejuah juah kita kerina.  

Pt. Analgin Ginting.