Catatan Khotbah Minggu 3 September 2023

 Minggu XIII Kenca Trinitatis/Minggu Pluralisme 

 Warna Stola Meratah 

Invocatio “Bahanlah man kalak sideban bagi ngena atendu ibahanna man bandu. Enda me ertina Undang Undang si isuratken Musa ras kai si nggo isuratken nabi nabi (Matius 7 : 12 ) 

Ogen Jesaya 43 ; 10 – 13 (Tunggal)    

Khotbah Roma 13 : 8 – 14    (Responsoria )    

Thema Nampati teman alu kekelengen          

Khotbah : Roma 13 : 8 -14

Ula kam rutang man ise pe--seakatan rutang sikeleng-kelenglah sapih-sapih kam. Kalak si erkeleng ate nandangi kalak si deban, ia nggo nehken Undang-undang.

Sabap pedah "Ula erlua-lua; ula munuh; ula nangko; ula mengga ate; "--kerina si enda ras pedah-pedah si debanna ipersada i bas pedah si sada enda, eme, "Kelengilah temanndu manusia bagi kam engkelengi dirindu."

Kalak si erkeleng ate man temanna manusia asa ndigan pe labo ibahanna si jahat. Dage alu nehken kekelengen nggo kap bali ras nehken kerina Undang-undang.

Si enda arus idalankenndu, sabap ietehndu maka enda me paksa si menentuken man bandu. Nggo seh jamna maka kam medak. Sabap warina kita ikelini Dibata deheren genduari asangken asum tangtangna kita tek nai.

Sabap berngi lawes ku siangna me, janah nandangi terang me wari. Emaka sitangtangilah perbahanen si gelap, janah sipakelah senjata guna erperang i bas terang.

Mehulilah min lagu langkahta, bagi kalak si nggeluh i bas terang wari; ula erpesta minem-minem mabuk-mabuk; ula erlua-lua ntah la meteh mela; ula rubat ntah pe mecimberu.

Tapi cidahkenlah biak Jesus Kristus i bas geluhndu. Janah ula asuhi i bas ukurndu sura-sura guna ngikutken dingen pepuasken biakndu si erdosa.

https://alkitab.app/v/93c39fcb8724

Fakta Dan Makna 

1. Ula kam rutang man ise pe--seakatan rutang sikeleng-kelenglah sapih-sapih kam. Kalak si erkeleng ate nandangi kalak si deban, ia nggo nehken Undang-undang. Enda sada penjelasan Firman Tuhan   lintas ilmu sini peseh Paulus man jemaat Roma. Ula kam rutang man ise pe (rutang adalah ekonomi,) seakatan rutang si keleng kelengen (teologi, ilmu komuniksasi, ras human relation).  Sangat kaya dan mendalam penjelasan rasul Paulus.  Janah berikutna ikutipna penjelasan Yesus Kristus, bahwa erkeleng ate emekap menjalankan undang undang.  Keleng ate ibas pengalaman empirik manusia, hampir berbeda bahkan berlawanan ras Undang Undang.  Ankat kal, tapi salah ras melanggar hukum ia.  Harus penjaraken.  Selaku bapa si sangana berkuasa uga nge ningen menyikapisa.  Penjaraken ningen anak kandung, bebasken ningen, enggo melanggar hukum ia misalna korupsi.  Situhuna, keleng ate e, lebih deher sifatna ibas langkah langkah antisifatif atau preventif.  Keleng ate nandangi kalak si deban ibas konteks enda iajak kita melakukan tindakan tindakan proaktif.  Emaka payo janah enggo siidah benang merahna bahwa keleng ate (proaktif erbahan simehuli man teman ) enggo nehken Undang Undang.   Amin senina ras turang ? 

2. Sabap pedah "Ula erlua-lua; ula munuh; ula nangko; ula mengga ate; "--kerina si enda ras pedah-pedah si debanna ipersada i bas pedah si sada enda, eme, "Kelengilah temanndu manusia bagi kam engkelengi dirindu." Ijelasken Paulus lebih detail, ibuatna piga piga contoh ibas hukum taurat nari (hukum pedah sepuluh).  Ula erlua lua... adi keleng ateta ndehara ta ras anakta, labo kita nggit ras tergoda erlua lua.  Ula munuh, tentu adi lit kekelengen bas kita labo ate munuh kalak sideban (uga Daud ielis elis Saul lako munuh si Daud e, tapi Daud nge ndapeti Saul sanga menem.  Tapi la nggit Daud munuh Saul, salah sada sebabna erteman kal Daud ras anak Saul si tergelar Jonatan.  Ula nangko, ula ermengga ate enda kerina sidalanken adi lit keleng ate bas kita, sebab nangko mbuat benda kalak alu terpaksa , padahal penting kal ku ia.  Adi lit perasaan empati, ras keleng ate bas kita tentu la kita nggit nangko, la si pediat ukurta ermengga ate nandangi barang kalak si deban, nandangi ndehara tah perbulangen kalak sideban.  Jadi enggo jelas kal siidah bahwa Undang Undang banci idalanken adi lit keleng ate.  Keleng ate kai ?  Nina Paulus ijenda, ndalanken man kalak sideban kai siidalankenndu man dirindu jine. Bahasa kerenna, “kelengilah temanndu manusia bagi kam ngkelengi dirindu jine”.  Sederhana tempa kalimat enda, tapi eme intina kal.  Ngkelengi kalak bagi kita ngkelengi diri sendiri, labo terdalanken adi la kin lit sumber energi bas dirinta.  Energi si la erkeri kerin, emekap nggejapken perkuah ate Tuhan Yesus.  Kesadaran bahwa kita enggo ikelengi Tuhan Yesus e me pendorong utama man kita lako ngkelengi kalak sideban ?  ise kin kalak sideban bas geluhta enda seri jawabanna ras penungkunen ise kita, ise kin aku, ise kin kam maka ikelengi Tuhan Yesus ? 

3. Tapi cidahkenlah biak Yesus Kristus ibas geluhndu. Janah ula asuhi ibas ukurndu sura sura guna ngikutken ras pepuasken biakndu si erdosa. Ibas ayat si terakhir enda iinformasiken Paulus bahwa  biak manusia biak kalak perdosa.  Enggo kin kerina manusia enda perdosa, janah biak perdosa e sura sura na si paling dalam emekap pepuasken diri, ngikutken sura sura kinierdosaan, janah enda intina kal la lit keleng ate, sebab ia hanya ingin pepuasken dirina e saja. “Uga ka ninta nampati kalak adi kita pe man sampaten denga”, enda me penjelasan logis kalak perdosa. Kebaliken statement enda, “Man sampaten denga pe aku la bo dalih kam lebe kusampati yah”, enda logika kalak si dem keleng ate.   Apai lebih logis dage ?  Apai lebih ilmiah dage, logika kalak perdosa atau logika kalak si erkeleng ate. Adi penggejapenku senina ras turang, sama sama logis, saja memang logika kalak perdosa lebih mudah diterima doni enda, janah lebih melala jelma si setuju.  Tapi logika kalak perkeleng, enda hanya banci idalanken kalak si erkemalangan man Tuhan Yesus.  Em sebab na ikataken Rasul Paulus, maka Cidahkenlah biak (mindset, prilaku, kebiasaan, biak/tabiat/karakter) Yesus Kristus ibas geluhndu.  Ula cepat termakan logika doni enda kita, tapi sidaramilah logika Yesus Kristus Tuhan ta si melias dingen dem perkeleng ate e.  Amin ? 

Pengkenaina

1. Lit utang ku bandu, lit ka utangndu bangku, radu rutang kita duana, rutang sikeleng kelengen.  Rutang aku bandu, erkiteken Tuhan Yesus  enggo mbereken simeherganakal man aku, rutang kam bangku erkiteken Tuhan Yesus pe enggo mbereken si meherganakal man bandu.  La mindo igalari Tuhan Jesus, tapi ipindoNa kiat gelah sikeleng kelengen. 

2. Undang Undang emekap motivator, sinuruh kerina kalak sitek lako sikeleng kelengen.  Undang undang adi hanya sebagai undang undang erbahanca kegeluhen enda terbatas, menjemukan ras ngkurangi ukur dame ras mehuli.  Emaka labo lit ertina, labo lit gunana ndalanken Undang Undang adi la kin lako ndalanken entahpe mpeseh kekelengen. 

3. Kekelengen dasarna kuidah biak Tuhan Jesus ibas kam, emaka kuinget dosa ku enggo itebusi. Jenari maka kubereken sinasa lit ibas aku, perbahanen, pengerana, pendahinku guna kiniulinndu.  Kiniulinndu erbahanca aku pe mehuli, emaka kubah simehuli man bandu, gelah igejapndu kekelengenku e ibas kam ngekelengi aku. Amin.

Bujur ras mejuah juah  kita kerina. 

Pt Analgin Ginting