Minggu XII kenca Trinitatis/Minggu Mamre
Warna Stola UNGU
Invocatio : Ibas sada wari Tuhan encidahken Bana man Abraham deher sada batang kayu si galang i Mamre (Kej 18 : 1a)
Ogen : 1 Timotius 3 : 4 – 5 (tunggal)
Khotbah : Kejadian 17 : 1 – 8 (tunggal)
Thema Ngelakoken Bagi Ate Dibata Ngena
Khotbah : Kejadian 17 : 1 – 8
Sanga umur Abram 99 tahun, icidahken TUHAN BaNa man Abram, janah nina, "Aku kap Dibata si Mada Kuasa. Patuhlah man bangKu, janah bahanlah lalap rikutken ateKu ngena.
Kubahan perpadanen ras kam, janah Kubereken man bandu kesusuren si lanai lang-lang teremna."
Nembah mungkuk Abram, ayona seh ku taneh, janah nina Dibata,
"Kupadanken bandu: maka kam jadi nini nterem bangsa-bangsa.
Gelarndu lanai Abram tapi Abraham, sabap Kubahan kam jadi nini melala bangsa.
Nterem kubahan sinursurndu, janah lit i bas sinursurndu e nari jadi raja. Perban teremna denggo sinursurndu, dungna jadi piga-piga bangsa ia.
Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata sinursurndu.
Kubereken man bandu ras man sinursurndu taneh enda, i ja genduari jadi kalak pertandang kam i je. Kerina taneh Kanaan jadi sikerajangen sinursurndu rasa lalap, janah aku jadi Dibatana."
https://alkitab.app/v/f17faf2d9629
Pembukaan/Lead
Mejuah juah syaloom nande bapa turang senina ibas kekelengen Tuhan ta Yesus Kristus. Lit nge akapndu jelma si la merincuh jadi terkenal ? Atau kerina nge manusia ingin terkenal ? Jelma siaktif bas media sosial la kin salah sada sura surana gelah jadi kalak terkenal ?
Abraham labo sura sura na jadi terkenal, tapi jadi terkenal ia bas doni enda dari masa ke masa, selama masa ada. Sebab Tuhan erbahanca. Jadilah terkenal erkiteken perbahanen Tuhan Dibata...Jadiken keterkenalenndu jadi pujin man Dibata. Mari sinen uga maka Abram (Abraham) jadi kalak si peling tekenal bas kegeluhen enda ...
Fakta Dan Makna
1. Sanga umur Abram 99 tahun, icidahken TUHAN BaNa man Abram, janah nina, "Aku kap Dibata si Mada Kuasa. Patuhlah man bangKu, janah bahanlah lalap rikutken ateKu ngena. Tuhan Dibata ncidahken diriNa man Abram sanga umurna 99 tahun. 1 tahun nari enggo genep 100 tahun. Icidahken Tuhan Dibata diriNa man Abram labo la lit tujunna, tapi seh kal belinna situhuna tujun Dibata engkai maka icidahkenNa diriNa. Sada penjelasan si sehkal pentingna ikataken Dibata man Abraham nina, Aku Kap Dibata si Mada Kuasa, Patuhlah man bangKu, janah bahanlah lalap rikutken ateku ngena. Dibata ersura sura man Abram gelah ia patuh man Dibata. Tole nina Dibata, bahanlah lalap rikutken ateku Ngena. Dibata nge pemenana kal si ersura sura gelah Abram patuh man Ia. Kepatuhen Abram jadi sada hal si penting akap Tuhan, labo akap Abram. Emaka ipilih Abram sebab itandai Dibata ia, janah arah Abram me pagi kepatuhen manusia man Dibata seh rasa lalap arah kerina sinursurna. Nggeluh bas doni enda, manusia bebas erbahan kai sura surana, kai akapna meriah. Perbahanan sikai pe, sikugapa pe banci ibahan manusia nggeluh bas doni enda. Tapi Nina Tuhan man Abram, bahanlah lalap singena ateKu. Manusia i ciptaken Dibata, gelah patuh man IA, gelah tetap ngelakoken kai si ngena ate Dibata. Kepatuhen enda labo man Abram saja ngenca ipindo Tuhan, tapi man kerina manusia. Kerina manusia, kam ras aku pe ersura sura kal Dibata gelah kita kerina tetap erbahan kai si ngena Atena.
2. Nembah mungkuk Abram, ayona seh ku taneh, janah nina Dibata,"Kupadanken bandu: maka kam jadi nini nterem bangsa-bangsa. Dibata si reh encidahken diriNa man Abram seh kal mehagana. La pang Abram natapsa, emaka nembah mungkuk ia, ayona seh ku taneh. Ibegiken Abram kal alu tutus kerina siikataken Tuhan Dibata e man ia. Bagem kinihagaan Dibata, la ngasup manusia natapsa, la ngasup manusia nulaksa kai siikatatekan Dibata. Janah kita si nggeluh gundari banci mpepayo jadi tah lang janji Dibata ku Abram. Ternyata jadi. Emaka kerina janji Dibata jadi ibas kegeluhen manusia. Kai pe siikateken / ijanjiken Dibata man manusia ibas waktuna jadi. Emaka kita pe kerina harus seri ras Abram, patuh man Dibata si enggo ndilo kita kubas keleng ateNa. “Kupadanken bandu ; maka kam me jadi nini enterem bangsa bangsa”, nina Tuhan. Jadi bage, gundari pe siidah lit telu agama terbesar bas doni enda si jadi arah kesusuren Abram. Yahudi, Islam, Kristen (Katolik, Protestan, Injili / Kharismatik) Janah kerina agama si jadi kesusuren Abram enda tersebar i belang belang doni enda. Persis kal bagi si enggo ikataken Dibata man Abram. Cikep janji Tuhan man bandu pasti iwujudkenNa sada paksa pagi, indah pada waktuNya. Tuhan erjanji man manusia, labo perban ipindo manusia e janjiNA, tapi Ia nge kin si mula mula erjanji man manusia, sebab keleng kin kal ateNa nandangi manusia kerina si tek man bana. Emaka mari nembah mungkuk kita man Dibata, terlebih ibas pusuhta. Sibereken kinihamaten si mbelinna kal man Dibata, sipesikap amak mentar si mejilenakal man Dibata. Amak sini bayu arah lembaran lembaran kepatuhenta man Tuhan ta si melias e. Amin?
3. Gelarndu lanai Abram tapi Abraham, sabap Kubahan kam jadi nini melala bangsa.
a. Nterem kubahan sinursurndu, janah lit i bas sinursurndu e nari jadi raja. Perban teremna denggo sinursurndu, dungna jadi piga-piga bangsa ia.
b. Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata sinursurndu.
c. Kubereken man bandu ras man sinursurndu taneh enda, i ja genduari jadi kalak pertandang kam i je. Kerina taneh Kanaan jadi sikerajangen sinursurndu rasa lalap, janah aku jadi Dibatana."
Iganti Tuhan gelar Abram jadi Abraham, janah ibas gelar simbaru e lita dasarna, lit makna na emekap nini melala bangsa . Labo asal iganti Tuhan gelar Abram, tapi perban lit misi si sangat penting ras mulia man Abraham emekap jadi nini melala bangsa. Lit misi khusus man Abram si enggo iganti Tuhan gelarna jadi Abraham. Lit misi khusus man manusia si enggo ipilih Tuhan jadi anak anak kesayanganNA. Kam ras aku situhuna banci jadi kalak kristen erkiteken enggo icidahken Tuhan diriNA man kam ras aku, ras kita kerina alu cara cara si unik, si berbeda, si mon mon la sigejap. Tapi perlu siinget labo mungkin kita jadi Kristen adi la bage sura sura Tuhan. Emaka bagi icidahken Tuhan diriNA man Abraham, bagepe ka me situhuna kita kerina enggo leben icidahken Tuhan diriNa man kita alu erbagai bagai cara emaka banci kita jadi kalak kristen. Jadi kalak Kristen, eme sada pendahin Dibata ibas dirinta sekalak sekalak. Janah selanjutna lit ka misi ta khusus. Setiap kalak kristen si enggo ipilih Tuhan, lit tugas khusus na si khusus kal gelah idalankenna ibas geluhna. Aku ibere Tuhan sada misi khusus i tengah tengah gerejanta, lako menyemangati (motivasi) ras ngajar kerna Keleng Ate Dibata. Meriah kal kuakap ndalankensa, Ermengkahkal kugejap kegeluhenku ngenanami janji Tuhan e. Adi man Abraham ibereken Tuhan kesusuren, ibereken Tuhan padanNA si la erkerin kerin janah ibereken Tuhan tanah iangan kerina kesusuren Abraham tading seh asa gundari. Man kam pe, man aku, man kerina kita ibereken Tuhan padanNa si la erkeri kerin. Amin
Pengkenaina.
1. Labo si Abraham ngundang Tuhan reh ku inganna, tapi inisiatif Tuhan nge reh ku ingan Abraham, jenari ibelasken Tuhan kai siarus ibahan Abraham. Ertina labo lit kai pe upaya manusia lako ndeheri Tuhan, tapi Tuhan sendiri nge reh ndeheri manusia e. Inisiatif Tuhan nge lako mereken padanNa ras kerina janji janjiNa. Ngataken bujur lah man Tuhan.
2. Tuhan ta seh kal mehagana, emaka tugas manusia mpertahanken kinihagan Tuhanta e. Sihamati ras si kelengi lah Tuhan. Tuhan e sendiri ncikep janjiNA. Pasti iberekenNa kerina si enggo ijanjikenNa man manusia.
3. Abraham lit misi khusus sibereken Tuhan man ia. Janah idalanken Abraham kerina misi si reh bas Tuhan nari e. Bagepe kam ras aku kita kerina, lit situhuna misi khusus si ibereken Tuhan man kita kerina. Tugas ta emekap mperjelas kai misi siibereken Tuhan man kita. Uga cara mperjelas sa, emekap dialog langsung ras Tuhan, oge pustaka si Badia, sebab melala kal jelma si misi na bas kegeluhen enda reh bas Tuhan nari. Perjelas lah misi ndu e lebe, nande bapa turang ras senina kerinana.
Bujur Ras mejuah juah kita kerina
Pt Analgin Ginting
.jpg)
Komentar