Perbahanen 16 : 1-5
Thema : Erteguhna Kiniteken Perpulungen
Kisah Para Rasul 16:1-5 (KARO) Seh pe Paulus ku Derbe ras ku Listera. I Listera lit sekalak ajar-ajar gelarna Timotius. Nandena kalak Jahudi si nggo tek man Jesus tapi bapana kalak Junani.
Kerina kalak si tek man Jesus si ringan i Listera bage pe i Ikoni ngataken maka Timotius kalak si mehuli.
Ate Paulus maba Timotius jadi temanna, emaka isunatkenna ia. Isunatken Paulus ia perbahan kerina kalak Jahudi i daerah e meteh maka bapa Timotius kalak Junani.
Jenari berkat kalak e niari kuta-kuta. Ipesehna kai si nggo itetapken rasul-rasul ras pertua-pertua i Jerusalem gelah ipatuhi perpulungen-perpulungen.
Alu bage erteguhna kiniteken perpulungen. Janah tep-tep wari reh teremna anggota perpulungen e.
Fakta Dan Makna
1. Seh pe Paulus ku Derbe ras ku Listera. I Listera lit sekalak ajar-ajar gelarna Timotius. Nandena kalak Jahudi si nggo tek man Jesus tapi bapana kalak Junani. Kerina kalak si tek man Jesus si ringan i Listera bage pe i Ikoni ngataken maka Timotius kalak si mehuli.
Tempa secara kebetulan Paulus jumpa ras Timotius. Sanga Paulus ku Listera i kota eme ia jumpa ras Timotius. Ijelasken maka Timotius e nande na kalak Jahudi si enggo tek ma Jesus Kristus, janah bapana kalak Junani. Tambah si e Timotius itandai kalak Listera selaku kalak mehuli. La isiasiaken Paulus perjumpanna ras Timotius janah imaksimalkenna pertemanenna ras Timotius e. (Bas kalak Jahudi lit sada norma seha asa gundari, bahwa adi nandena Kalak Jahudi sekalipun bapana la kalak Jahudi maka ia ianggap / iterima sebagai kalak Jahudi. Tapi adi bapana kalak Jahudi nande la kalak Jahudi, maka langa terterima langsung selaku kalak Jahudi)
Aku pe tek senina ras turang, bahwa labo lit perjumpannta ras sekalak si sada visi pelayanan perjumpaan secara kebetulen. Tapi perjumpaanta ras sekalak jelma lit ibas rancangan Tuhan Dibata. Emaka teridah bahwa Paulus pe mempunyai rencana ras Timotius.
2. Ate Paulus maba Timotius jadi temanna, emaka isunatkenna ia. Isunatken Paulus ia perbahan kerina kalak Jahudi i daerah e meteh maka bapa Timotius kalak Junani.
Ate Paulus maba Timotius jadi temanna. Gelah ula lit sandungan bas kernina perpulungen, emaka isunatken Paulus Timotius gelah ieteh si enterem maka Timotius e enggo full kal Jahudi. Sebab kebiasaan Jahudi emekap nunatken kerina anak dilaki. Rukur Paulus, maka perban bapa Timotius kalak Junani, langa bo ia isunat. Emaka kenca Timotius i sunat, ia iterima baik Kalak Jahudi bagepe Kalak Junani selaku kristen si lanai lit sitik pe sandungenna.
Makin jelas teridah bahwa ise pe banci ipake Tuhan lako perberita si meriah.
Makin jelas pe bahwa keselamatan e labo hanya man kalak Jahudi, tapi pe man kalak Junani, kalak Romawi, kalak Jerman, Kalak Inggris, kalak Belanda, kalak Indonesia terus kerina kalak. Kai pe suku bangsa ras negarana. Amin ?
3. Jenari berkat kalak e niari kuta-kuta. Ipesehna kai si nggo itetapken rasul-rasul ras pertua-pertua i Jerusalem gelah ipatuhi perpulungen-perpulungen. Alu bage erteguhna kiniteken perpulungen
Jenari berkat Paulus ras Timotius niari kerina kuta daerah perpulungen e. Ipesehna kai si enggo itetapken rasul rasul ras pertua pertua i Jerusalem gelah ipatuhi perpulungen perpulungen e. Alu bage erteguhna kiniteken perpulungen e. Teridah kal man banta, Tuhan make kalak si tutus ngajar perpulungen. Sada kesimpulen maka perlu kal pengajaren siisehken kalak situhu tuhu serius nehken pengejaran. Isunatken Paulus lebe Timotius ope iajakna ras, bukti bahwa dahin esangat serius.
Sada si kurang kal i tengah tengah gerejanta GBKP, kurang serius kita ngajar ras erlajar. Uga perdalenen Katekisasi i runggunndu, tuhu tuhu ipersiapken alu matang ras menarik, atau gelah enggona saja ?
Mari situtusi merespon keleng ate Tuhan e alu mbereken pengajaran tahpe erlajar si mehuli. Amin?
Pengkenaina
• Kerina bangsa bangsa pasti pagi iselamatken Tuhan Yesus nge, sebab Tuhan Yesus me juruselamat man kerina bangsa bangsa.
• Keputusen lako ngikutken Tuhan Jesus, eme keputusen si paling penting, ras simehergana sibanci ilakoken manusia bas geluhna. Erkiteken nggit Timotius nemani Paulus, emaka gelarna itandai kalak sebelang belang doni sedekah dekahna.
• Keputusen ngikut Tuhan Yesus erteguhna ibas kita mbegiken pengajaren ras kesaksian kalak sideban. Amin?.
Bujur ras mejuah juah kita kerina.
Pt. Analgin Ginting (Magister Ministri)
Komentar