1 Raja raja 17 : 8 - 24
Thema : Tetap Ukur Guna Nampati
1 Raja-Raja 17:8-24 (KARO)
Kenca bage nina TUHAN kempak Elia,
"To ku kota Sarpat, deherken Sidon, tadinglah i jah. Nggo Kuperentahken sekalak diberu balu-balu si ringan i jah mere kam man."
Emaka berkat Elia ku Sarpat. Kenca ia seh i gerbang kota idahna sekalak diberu balu-balu sangana muat ranting. Iperkuanken Elia nina, "Enta sitik lau maka aku minem."
Muatna lawes ngelegisa ilebuhken Elia ia, "Baba pe sitik roti man bangku."
Ngaloi diberu e, "I bas gelar TUHAN Dibatandu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. Eme pengkeri-kerinna kami man, janah kenca e mate la man me kami."
"Ula kam mbiar, " nina Elia. "Banci isikapkenndu panganndu, tapi ope denga si e bahan lebe roti si kitik, jenari baba man bangku. Kenca bage ibana banci itasakkenndu man panganndu ras anakndu.
Sabap bage nina TUHAN, Dibata Israel, 'Tepung bas mangkuk la keri-keri, minak bas botol pe la kurang-kurang seh Kupesusur udan ku taneh enda, ' bage nina TUHAN."
Lawes diberu balu-balu e ilakokenna bagi si ikataken Elia emaka cukup pangan kalak e guna paksa si ndekah sitik.
Sue ras si nggo ikataken TUHAN arah Elia, tepung si i bas mangkuk la keri-keri janah minak si i bas botol e la kurang-kurang.
La asa kai nari dekahna kenca si e, sakit anak diberu balu-balu ndai. Reh dekahna reh kelekna kedungenna mate.
Nina diberu e man Elia, "O suruh-suruhen Dibata, ngkai maka bage perbahanndu man bangku? Kerehenndu ku jenda erbahanca inget Dibata ka mulihken dosa-dosangku, erkiteken si e mate anakku."
"Enta anakndu ena, " nina Elia. Ibuat Elia anak e i bas ampun nandena nari, iangkipna ku kamar si inganina i das loteng ipepedemna i bas ingan medem.
Kenca bage ertoto ia alu sora megang nina, "O TUHAN Dibatangku ngkai maka IberekenNdu kiniseran si mberat man diberu balu-balu enda? Bage kal ulina perbahanna man bangku, tapi IbunuhNdu ka anakna!"
Kenca bage iamparkenna bana telu kali i babo anak e ertoto ia, "O TUHAN Dibatangku pegeluhlah mulihken anak enda!"
Ibegiken TUHAN pertoton Elia, emaka mulai anak ndai erkesah janah nggeluh mulihi.
Itegu Elia mulihken anak ndai ku teruh, iberekenna man nandena nina, "Nehenlah, anakndu nggeluh!"
Ngaloi nandena, "Genduari kueteh kam suruh-suruhen Dibata, janah tuhu-tuhu TUHAN ngerana arah kam!"
I
Fakta Dan Makna
1. Emaka berkat Elia ku Sarpat. Kenca ia seh i gerbang kota idahna sekalak diberu balu-balu sangana muat ranting. Iperkuanken Elia nina, "Enta sitik lau maka aku minem." Muatna lawes ngelegisa ilebuhken Elia ia, "Baba pe sitik roti man bangku."
Nabi Elia taatkal ndalanken perintah Tuhan man bana. Isuruh Tuhan Dibata Elia ku Sarpat, berkat ia ku je. I Sarpat me tercipta sada turin turin mengenai Elia si mengandung nilai teologis / iman si seh kal agung ras mulia na. I Sarpat me jumpa Elia ras sekalak diberu balu balu sanga ia kiranting.
Tercipta sada dialog si seh kal mendalam na secara iman antara Elia ras diberu balu balu e.
Elia : Mejuah juah bibi, enta sitik lau maka aku minem. Muat lawes diberu balu balu e nina Rlia tole : baba pe sitik roti man bangku.
Elia leben mperkuanken diberu balu balu e. Nggejapken Kekelengen Tuhan situhuna erbahanca sekalak kristen la mbiar mperkuanken ise pe, janah man ise pe kalak kristen la mbiar mindo penampat. Sebab adi mindo penampat kita man sekalak jelma, ise pe ia, la pe ia sitandai situhuna menegasken maka tek kita bahwa kerina manusia e iciptaken Tuhan. Mindo penampat man kalak sideban, situhuna mbereken kesempaten man bana erbahan si mehuli. Emaka ula kam mbiar mindo penampat man ise pe. Sebab radu tinepa Tuhan nge kita. Amin ?
2. Ngaloi diberu e, "I bas gelar TUHAN Dibatandu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. Eme pengkeri-kerinna kami man, janah kenca e mate la man me kami."
Mehuli kal cara diberu balu balu e njawab pemindon Elia, terus terang ia ngataken kai si lit bas ia ras uga kerna kelanjutan geluh na, bahwa lanai lit kai pe kari siman tanggerenna.
Tapi dungna ikutken kenna pemindon Elia, emaka ibereken na roti sikitik e ras lau man Elia / suruh suruhen Tuhan.
Teridah kepatuhenna. Janah kepatuhenna man Elia, belinen asangken kebiarenna lanai lit man panganen.
Perlu siukuri terbagesen... Elia labo itandai diberu e. Tapi reh Elia mindo inemen ras pangan ku ia. Simenarik kal, Elia pe mindo sitik si lit bas ia. Elia la mindo si la lit ibas diberu balu balu e. Emaka perlu kal sigejapken “ Tuhan la pernah mindo si la lit bas kita. Siukuri mbages mbages ras terbagesen .... Adi Tuhan la pernah mindo si la lit bas kita, maka bereken lah si lit denga bas kita man Tuhan. Janah ula kisat mbere man Tuhan. Mbere man Tuhan ngenca situhuna la pernah kita kisat, janah la kita mbiar, janah la kita tertaren taren ...
Mbere man Tuhan silakoken alu nampati kalak sideban. Sampatilah kalak sideban, sampatilah kalak si langa itandaindu. Sebab Tuhan si nuruh ia njumpai kam, lako mindo penampat.
Mari si latih dirinta gelah er rajinna kita nampati kalak silanga si tandai pe.
3. Sabap bage nina TUHAN, Dibata Israel, 'Tepung bas mangkuk la keri-keri, minak bas botol pe la kurang-kurang seh Kupesusur udan ku taneh enda, ' bage nina TUHAN." Lawes diberu balu-balu e ilakokenna bagi si ikataken Elia emaka cukup pangan kalak e guna paksa si ndekah sitik.
Ope denga ibahan diberu balu balu e roti sinipindo Elia, ikataken Elia man bana kai siisuruh Tuhan nina : tepung bas mangkuk la keri kerin, minak bas botol pe la kurang kurang seh kupesusur udan ku taneh enda, bage nina Tuhan.
Mis terbukti bagi janji Tuhan e. Tepung la keri keri, minak pe la habis habis.
Kepeken Tuhan enggo leben erjanji ope denga ipindoNA penampat bas kalak kristen nari. Janah, janji Tuhan e pasti terjadi.
Emaka ula mbiar mere man Tuhan. Tuhan pasti sungguh sangat pasti mbere simulihna man bandu.
Mujijat terjadi bas geluh kalak si nginget janji Tuhan, ras nggit mere man Tuhan alu nampati kalak sideban. Sampati kalak, si banci sampatindu.
Pengkenaina
• Ula mbiar jadi nabi, ula mbiar jadi serayan Tuhan. Lit lalap penampat bas Tuhan nari , janah ise pe banci ibahan Tuhan jadi perpanjangan tangan Tuhan lako nampati serayanNA. Emaka ula kita pernah mbiar ras Tuhan. Amin ?
• Sampati kalak sideban ise pe ia, la pe itandaindu. Sebab bage me situhuna Tuhan ngkelengi anak anakNA, isuruhNA sekalak jelma lako nampati. Emaka gejapken lah, bahwa sanga kita nampati kalak sideban e, si tuhuna kal Tuhan nge milih ras nuruh kita nampati kalak sideban e. Bagepe ka pe ku kita, adi kita perlu penampat Tuhan janah sitotoken ku IA, maka isuruhNA kalak sideban si cocok ras pas lako nampati kita. Amin ?
Bujur ras mejuah juah kita kerina.
Pt. Analgin Ginting.
Komentar