3 Johanes 1 : 5 - 8
Thema : Ikut muat bagin ibas pembarken berita si mehuli
3 Johanes 1 : 5 – 8
Bahasa Karo
Temanku si kukelengi, tutus kal atendu ndahiken dahin si ilakokenndu guna senina-seninanta kalak Kristen, aminna gia pe ia la itandaindu.
Nggo isaksiken senina-seninanta e i lebe-lebe perpulungen si i jenda kerna kekelengenndu e. Mehuli kal adi isampatindu ia rikutken si ngena ate Dibata i bas ia nerusken perdalanenna.
Sabap kalak enda lit i bas perdalanen guna Kristus, alu la ngaloken kai pe i bas kalak perbegu nari.
Dage kita kalak Kristen rutang nampati kalak si bage, gelah kita pe ikut muat bagin i bas pembarken Berita Si Mehuli i bas Dibata nari e.
Fakta Dan Makna
1. Tutus kal atendu ndahiken dahin si ilakokenndu guna senina-seninanta kalak Kristen, aminna gia pe ia la itandaindu. Ipujiken penulis kitab Yohanes enda kal sekalak si tergelar Gayus, erkiteken tutus kal atena ndahiken dahin siilakokenna guna senina senina kalak Kristen, aminna pe labo itandaina. Engkai maka banci tutus kal ate Gayus, sebab bagekin situhuna erdahin ibas nampati kalak sideban, bagi sinipedahken Tuhan Yesus. Paulus man jemaat Kolose ngataken “kai pe idahikenndu dahikenlah alu tutus tempa tempa man Tuhan labo man manusia”. Erdahin guna Tuhan, si enggo erdahin alu tutus kal ibas IA njadiken kerina si nasa lit. Tuhan ngajarken erdahin alu tutus, jadi adi lit ajaren erdahin alu kurang tutus berarti e labo bas Tuhan nari. Emaka kita kerina, perlu kal erdahin alu tutus kal, janah eme perlu siterusken ku anak anak ta. Siajarken lah anak anakta gelah ia erdahin alu tutus. Lit sekalak dokter terkenal i Amerika keturunan India si tergelar Deepak Chopra, ngajarken ku teluna anakna, nina “ La kupindoa kena masuk jurusan siapai, tapi jurusen apaipe pilih kena, jadilah si terbaik ije”. Bagus kal...
2. Sabap kalak enda lit i bas perdalanen guna Kristus, alu la ngaloken kai pe i bas kalak perbegu nari. Ijelasken Yohanes makna teman si sada kiniteken ras kita bahwa, eme kalak si lit ibas perdalanen guna Kristus, kalak si ndarami pemahaman ras ketetapan ukur ngikutken Kristus. Kalak sibage eme kalak sinadingken kegeluhen ras harapan si lama, ibas kalak perbegu nari. Labo kai pe datna ibas kalak perbegu nari e, selain keuntungan jangka pendek. Keuntungen di depan, tapi dungna engkeriken ia. Emaka kalak si lit ibas iketen perbegu e mekuah kal aten, sebab ia kena tebu tebu geluh geluhen. Hahahahaha.
3. Dage kita kalak Kristen rutang nampati kalak si bage, gelah kita pe ikut muat bagin i bas pembarken Berita Si Mehuli i bas Dibata nari e. Emaka man kita si enggo tek ras yakin nandangi Jesus Kristus, eme kalak si bayak, kalak si pentar, kalak si ngeteh kai si pentingna, ras perayaken situhuna kal bas doni enda. Sangap kal kita adi enggo ipetangkas Jesus Kristus e ise IA man kita, maka kita tek BANA, ras inganta pe enggo pasti deher ra IA. Emaka nina Yohanes, kita rutang nandangi kalak si bage (kalak si tek ras iiket perbegu e). Si pulahi ia alu pembarken berita Si Meria, berita si Mehuli. Si gejapken Berita Si Mehuli e, emaka lanai kita mbiar kai pe bas doni kegeluhen enda. Puji Tuhan. Luarbiasa. Mari dage ikut kita muat bagin ibas pembarken berita si mehuli e, berita Injil e, berita Jesus Kristus e. Ku jabuta, ku sangkep nggeluhta, ku kade kade ta, ku teman teman sada pendahinta, teman teman grup WA ta, teman teman alumni na, bagepe kerina jaringan pertemanannta. Amin ?
Pengkenaina
• Mari sigejapken bahwa kita enggo ipilih Tuhan Jesus gelah tek man Bana. Janah kita si tek man Bana, enggo iserapkenNA bagin ta bas doni enda, bagepe bas Surga. Mesera kal tek man Tuhan Jesus adi la kin IA sinampati kita gelh tek man BANA. Emaka sangap kal kita adi enggo kita tek man Tuhan Jesus e. Amin ?
• Kita sienggo tek "rutang" lako pembarken berita Si Mehuli man kerina senina turangta si langa nggejapken kiniteken nandangi Tuhan Jesus. Ia iiket begu denga, nina Yohanes. Emaka mari ikut kita kerina pembarken Berita Si Mehuli e alu tutus ras alu penggejapen ngataken Bujur man Tuhan ta Jesus Kristus. Amin ?
Bujur ras mejuah juah kita kerina.
Pt. Analgin Ginting.
Komentar