Wari/ Berngi 6 Catatan Tambahan Pekan Penatalayanan 2024

 

Thema : Aku Mengasihimu  

2Samuel 9 : 1-13 

Ibas sada wari nungkun Daud, "Lit denga nge tading keluarga Saul? Adi lit kucidahken ateku keleng ateku erkiteken Jonatan."

Lit sekalak pelayan keluarga Saul gelarna Siba janah idilo ia ndahi Daud. "Kam Siba?" nina raja nungkunsa. "Aku Tuanku, " nina njabapsa.

Isungkun raja ia nina, "Lit denga kang keluaga Saul tading? Adi lit ateku ncidahken kesetianku ras keleng ateku, bagi si kupadanken man Dibata. " Nina Siba njabapsa, "Lit sekalak nari eme anak Jonatan si dilaki. Cempang ia."

"I ja ia?" nina raja nungkun. "I rumah Mahir anak Amiel i Lodebar, " nina Siba.

Emaka isuruh Raja Daud gelah ia reh.

Kenca Mepiboset anak Jonatan kempu Saul nggo seh, erjimpuh ia i lebe-lebe Daud alu mehamat. Iperkuanken Daud ia, "Mepiboset. " Ngaloi ia nina, "Kai Tuanku?"

"Ula mbiar, " nina Daud. "Kukelengi ateku kam erkiteken bapandu Jonatan. Kuulihken man bandu kerina taneh sikerajangen ninindu Saul, janah kam banci tetap man i istana."

Erjimpuh ka Mepiboset janah nina, "La kap aku ulin asa biang mate, Tuan! Ngkai maka bage kal ulina kam man bangku?"

Kenca bage idilo raja suruh-suruhen Saul, Siba gelarna, jenari nina, "Kubereken man Mepiboset, kempu tuanndu kerina sikerajangen Saul ras keluargana.

Kam, anak-anakndu, ras suruh-suruhenndu arus nuani taneh e guna keluarga tuanndu Saul, janah pepulung ulihna man nakan keluarga tuanndu e. Tapi Mepiboset tetap kami ras man. " (Lit sepulu lima kalak anak Siba dilaki janah suruh-suruhenna lit dua puluh kalak.)

  Nina Siba njabapsa, "Kerina perentahndu tetap kudalanken raja. " Dage ras raja me si Mepiboset man, bali ras sekalak anak raja.

Lit sekalak anak Mepiboset dilaki nguda denga, gelarna Miha. Kerina anggota keluarga Siba jadi suruh-suruhen Mepiboset.

Dage Mepiboset si nahena duana cempang, ringan i Jerusalem tetap man i istana raja.

Fakta Dan Makna 

1. I bas sada wari nungkun Daud, "Lit denga nge tading keluarga Saul? Adi lit kucidahken ateku keleng ateku erkiteken Jonatan."

Hasil perenungen kalak si mehuli ras ernalem man Dibata emekap kiniulin.  KIniulin muncul ibas kita merenungkan kerina perbahanen si mehuli si enggo ibereken Dibata.  Sanga Daud ngerenungken sekalak temanna si enggo mate,  tergelar Jonatan teringet ia mis,  lit denga nge kesusuren raja Saul si nggeluh denga.  Jonatan anak Saul teman dekat Daud.  Luar biasa kisah pertemanen kalak enda.  Emaka nginget kiniulin sahabatna Jonathan, turah penungkunenna lako ngeteh lit denga nge kesusuren bapa Jonatan (Saul) singgeluh denga.    Adi lit dengan kesusuren Raja Saul e, “kucidahken ateku keleng ateku erkiteken Jonathan nina Daud.   Persahabatan Tulus Ternyata Tidak Dibatasi Oleh Kematian.  Luar biasa. 

2. Isungkun raja ia nina, "Lit denga kang keluaga Saul tading? Adi lit ateku ncidahken kesetianku ras keleng ateku, bagi si kupadanken man Dibata. " Nina Siba njabapsa, "Lit sekalak nari eme anak Jonatan si dilaki. Cempang ia.  

Raja Daud luar biasa, tuhu tuhu raja si mencerminkan keleng ate situhu tuhu.  La hanya penungkunen, tapi iseksekina seh maka jumpa ia ras sinidaramina.  “Ateku ncidahken kesetianku ras keleng ateku, bagi sikupadanken man Dibata.  Komitmen guna nehken keleng ate, hanya bisa  ijalanken adi erpadan ras Dibata.  Bageme Daud, idaramina seh ia jumpa kesusuren raja Saul erkiteken erteman ia ras Jonathan anak Saul. Pertemanan Daud Ras Jonathan mbabai ia duana si keleng kelengen bahkan  melewati batas kematian.  Idarami  Daud kesusuren Raja Saul , bapa temanna Jonathan.  Luar biasa keleng atena duana sapih sapih ia. Enda me contoh pertemanan situhu tuhuna kal.  Sitik terbalik adi ras kita kalak Karo, lit cakap adat singataken :  Ula kam mbiar bere bere, enterem kami mama ndu siap nampati kam,  amin gia bapandu lanai ras kita, ula kam sangsi kami mama mamandu enda kerina pasti nampati kam.  Kenyataanna jumpai mama ndai seh serana.  Jumpa saja pe mesera.  

3. Kenca Mepiboset anak Jonatan kempu Saul nggo seh, erjimpuh ia i lebe-lebe Daud alu mehamat. Iperkuanken Daud ia, "Mepiboset. " Ngaloi ia nina, "Kai Tuanku?" "Ula mbiar, " nina Daud. "Kukelengi ateku kam erkiteken bapandu Jonatan. Kuulihken man bandu kerina taneh sikerajangen ninindu Saul, janah kam banci tetap man i istana."Erjimpuh ka Mepiboset janah nina, "La kap aku ulin asa biang mate, Tuan! Ngkai maka bage kal ulina kam man bangku. 

Sura sura si mehuli, sura sura  erbahan kiniulin  ndatken hasil, sebab Dibata pe ikut erdahin.  Emaka jumpa Daud ras anak Jonathan sahabatna sitergelar  Mepiboset.  “Kukelingi ateku kam erkiteken bapandu Jonathan.  Kuulihken man bandu kerina taneh si kerajangen  ninindu Saul, janah kam banci tetap man i istana nina Daud man Mepiboset. Erjimpuh mepiboset  janah nina “la kap aku ulin asang biang mate.  Nggkai maka bage kal ulina kam man bangku o Raja?  Perbahanen si mehuli sekalak bapa bas doni enda, iterusken Tuhan beritana e ku kerina kesusurenna ras pe kerina kade kadena.  Emaka perlu kal sidalanken bas geluhta tep tep wari prinsip prinsip keleng ate.   Ula mbiar erbahan si mehuli, ula tanggungi erbahan si mehuli e.  Sebab perbahanenndu si mehuli e i balas Tuhan pagi man anak anak tah kempundu.  Tadingken sifat egois, tadingken kebiasaan la mpediateken, tapi mediate ras erpemere lah man kerina manusia. 

Pengkenaina

• Sura sura erbahan si mehuli bas geluhta  reh ibas Tuhan nari.  Emaka situhuna kal keleng ate muncul ku bas kesadaran manusia, adi ia pe leben enggo ncidahken kelang ate.  Ma payo ? 

• Ula tanggungi adi erbahan si mehuli, Terapken sebesar besarnya prinsip enda bas geluhta sekalak sekalak.  Sebab Dibata ka pagi mpesehsa/mbalassa man anak anak kempu ta. Bagi Mepiboset anak Jonathan. Terapkenlah prinsip Aku Mengasihimu ibas geluhta mulai gundari nari.    Amin ? 

Bujur ras mejuah juah kita kerina.  

Pt. Analgin Ginting.