Hari/Berngi 5. Catatan Tambahan Pekan Penatalayan GBKP 2024

 

Kotbah      :  Matius 5 : 13 – 16    

Tema         :  Jadi Terang Dalam Budaya Politik/Pemilu

 

Matius 5 : 13 – 16    

 

5:13        "Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak.

5:14        Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.

5:15        Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e.

5:16        Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.

 Fakta Dan Makna

1.    "Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak. 

Bagi Sira ertina labo sira,   sira erguna erbahan gulen entabeh.  Kata kunci na erguna.  Pribadi si bagi sira, emekap pribadi si mbereken kegunaan man kalak si deban.  Kegunaan, penampat, makna entahpe nilai.  Tuhan Yesus mengharapkan man kita kerina gelah kita erguna man kalak sideban, man kerina manusia.  Emaka perlu kal ijenda si canangken man dirinta,   gelah lit sada hal ibas dirinta si erguna man kalak sideban.  Endam ertina bagi sira.

Kai dage sira ndu ?  Ibas kai kegeluhen ndu erguna man kalak sideban ?  Tentu enda berkaitan ras keterampilenndu, berkaitan ras pemetehndu.

 

Penungkunen si lebih mbages ka,  kai atendu ilatihndu / ikembangkenndu bas dirindu  gelah kam ndatken sada keterampilen tah pe pemeteh si banci berekennndu man manusia sideban gelah alu bage kam erguna (jadi sira) man kalak sideban ?

 

Enda me penungkunen si pentina senina ras turang.  Jadilah Sira nina Tuhan Yesus, ertina berlatih ras berinvestasi lah guna ndatken sada pemeteh si erguna man perpulungen ras man gereja ta.

 

2.    Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.       Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e.

Sejajar ras siikateken Tuhan Yesus kerna jadi sira,  maka ikataken Tuhan Yesus kita harus jadi terang, terang labo lampu.  Tapi jadi jelma si sifat na menerangi  kalak sideban.   Menerangi tentu kalak sibas kegelapen.  Kalak sibas kegelapen emekap kalak si langan nandai Tuhan Yesus Kristus.  Emaka adi si pergermetken jadi sira, erguna ibas kegeluhen enda, tapi nerangi jadi pembawa berita si meriah (berita Injil) man kalak sideban.  Syaratna geluh kita baci jadi terang emekap, kita harus enggo nandai terang situhu tuhu e, ras kegeluhenta sendiri pe (jabu ta ) enggo nggeluh ibas terang.  Ertina enggo lit pemahamennta ras mampu njelaskensa man kalak sideban Ise kin Tuhan Jesus e, ras engkai maka kerina kalak harus mbegi ras ngaloken Tuhan Jesus sebagai terang (sebagai Juru Selamat)

 

3.    Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.

Enggo ertangkas na ijenda kai kin ukurenna kalak sienggo ndatken terang e?    Ersinalsah lah min turangndu I lebe lebe kalak si enterem gelah adi idahna perbahanenndu si mehuli, ipujina Dibata si  I Surga.  Enda me makna ras ukuren terang si enggo igejapken kalak sideban.  Kalak sideban enggo iterangi adi ipujina Tuhan DIbata.  Oh haleluya.

Pengkenaina

·       Labo jadi sira kita ipindo Tuhan, tapi jadi pribadi si erguna man kalak sideban.  Emaka ibas suasana Pemilu enda  jadilah kalak sierguna.  Ula nggit ngaloken sen (money Politic)  Jadi lah kalak seierguna, si erbahanca masyrakat sideban  ndatken makna, kegunaan ibas geluhta nari.   Pikirkan sada hal, bas bidang kai atendu kam erguna man kalak sideban .  latih lah erlajarlah, ula sia siaken waktundu .  ?

·       Belajar lah gelah kita banci jadi terang, nerangi kegelapan kegeluhen kalak si deban.  Kita, kam ras aku harus mempunyai kemampuan njelasken  konsep iman kristiaani man kalak sideban.  Jadiken enda target ta ibas tahun 2024,   mari siikuti PJJ , PA PA ras kegiatan kegiatan iman I tengah tengah gerejanta gelah alu bage, sada tahun enda enggo tambah pemeteh ta kerna iman/kerna injil/ kerna berita simeriah. Gelah alu bage,  kita banci jadi terang si nerangi kalak sideban janah buktina ipujina Tuhan Dibata. Amin.

Bujur ras mejuah juah kita kerina.

Pt. Analgin Ginting