Catatan Tambahen Untuk Khotbah Tanggal 13 Mei 2012.

Mejuah juah Impalku Pertua. Tuhan simasu masu persiapenndu lako nehken kataNa ibas Minggu tanggal 13 enda. Enda piga piga pokok sibanci kutambahken ibas persiapenndu.

Ku bahas ayat per ayat gelah ermantapna kata Dibata isehken man Jemaat. 1 Joh 5 : 1 Isesi tek man Jesus eme Mesias ia me kap anak Dibata, janah ise singkelengi Bapa ikelengiNa pe anak Bapa e. Jelas ije ikataken, menjadi anak Dibata emekap tek man Jesus Kristus.

Uga tandana tek man Jesus emekap ngaku ia Jesus e Tuhan. Kenca bage, iperidiken ia bas Lau janah iikutina lakon persadaan Sibadia ija lit simbol anggur e jadi dareh Tuhan Yesus sini inem kita. Kata kunci ijenda emekap Tek Man Jesus. Gampang tempa menjadi anak Dibata, sebab syaratna hanya Tek saja. Tapi ibas ayat enda pe itambahken ka ngkelengi Bapa ras ngekelengi Anak.

Uga caranta ngekelengi Bapa ras Anak e ? Ijelasken ibas ayat 2 ras 3. Ayat 2 ikataken bahwa si tek Man Jesus ikelengina anak Bapa e. Ijenda lit ka itulisken ngkelengi Anak Anak Dibata.
Anak Dibata--> Jesus Kristus
Anak anak Dibata --> kerina manusia.
Emaka kita si tek man Jesus patut ka ngkelengi kerina Manusia sideban ise pe (kaitken ras Solidaritas internal ta)

Ngkelengi Dibata ertina patuh man perentah perentah Dibata. Sikelengi Dibata adi siikutken perentahNa. nci ka pe sibuat Contohna i tengah jabunta. Adi sikelengi ndeharanta maka sibegiken janah siikutken ka katana. Anak anak ta e bageka nge, keleng atena orang tuana adi iikutkenna kata orang tuana e. Emaka patuh ertina taat. Patuh ertina disiplin. Adi keleng ateta man Tuhan berdisplin kita, siikutken kataNa. Janah bas ayat 3 e lit ikataken ngikutken/patuh man perentah Tuhan labo mberat. Labo mberat e perlu igali lebih dalam. Engkai maka ikataken labo mberat?

Adi menurut penggejapennku memang labo mberat, sebab lit berekenNa penampat ta eme Kesah Sibadia. Aku sitik pe la kuakap mberat ngikutken Tuhan e, beraten ndauh la ngikutken Tuhan. (tambahi je kesaksian pribadi tah pe pengalaman Bengkila ndube simupus kam sangana ia er PI si sada tah ras kam nai)

Ayat 4 Labo mberat ngikutken Tuhan e erkiteken kerina anak anak Dibata enggo naluken Doni enda. Naluken Doni enda ertina tetap patuh man Tuhan aminna pe melala tantangan ras percubaan. La tergoda, la mbiar, la ragu ragu . Paksa itulisken surat enda melalakal kalak kristen ibunuh, itutung, isiksa, iadu domba gelah tadingkenna kinitekenna man Jesus. Tapi kalak Kristen ndai pangen ia ibunuh daripada nadingken Yesus Kristus.

Contoh si e iban Johanes ngataken maka Patuh Man Tuhan e labo mberat. Janah Johanes sendiri pe enggo ialamina uga ia ngikutken Tuhan Jesus.

Uga maksud naluken doni ibas kegeluhenta sigundari? (e si perlu ibahas ndu terbagesen Pt). Adi menurut aku, tetap menomor satuken kepatuhen man Tuhan aminna kai pe sinialami kita. Sakit kita, banci ku dokter, banci ku dukun banci ka sitotoken man Tuhan Yesus. Adi ku dokter ras notoken man Tuhan Yesus. Biasa si lakoken. Adi ku dukun ras totoken ka man Tuhan Yesus e lanai banci ipersada, la banci isinggur.

Bagepe ibas pengalamen pengalamen sideban. Tetap kita ku gereja, janah mbereken kolekte ras persembahen tah pe janji imanta. Lit sen ta Rp 10.000 nari ngenca. Perlu kita nukur keperlun ras kolekte. Apai siutamaken. Adi tek ras patuh man Tuhan, maka bereken lebe kolekte ta. Keperlunta e, Tuhan Yesus kari ngelengkapisa. Pasti. Tek man Tuhan Yesus labo gelah sangap kita nggeluh bas doni enda saja. Janah adi kegeluhen doni ngenca perayakenta erDibata, labo lit ertina. Pangen kita ndarami dibata dibata sideban. Tapi situhuna Tek Man Yesus ras patuh ngikutken perentah perentahNa ertina siutamaken kegeluhen si rasa lalap, emekap kegeluehn i Surga pagi.

1. Apai pangen sangap kam nggeluh 75 tahun tapi dungna bene rasa lalap? 2. Tah mesera 75 tahun, tapi dungna ku ingan senang rasa lalap. 3. Atau 75 tahun nggeluh ras Yesus, dungna senang ka rasa lalap?

Kalak Kristen si enggo naluken doni e, perayakenna situhu tuhuna kal kal kal emekap sipeteluken enda ndai. Sanga kita nggeluh ibas doni enda, adi tek ras patuh kita man Bapa bagepe man anakNa Yesus Kristus, itemanina kita. Janah adi enggo seh sibarna kita nggeluh bas doni enda 75 tah 90 tahun, mis kal kita ku Firdaus.

Sanga kita ngeluh bas doni enda, tetap kita ikawali Tuhan. Payo nge? Mari sinen ku ayat 6 nas ta sekalenda. Ijelasken mulihi maka Tuhan Yesus e enggo reh ku doni enda. Ia reh alu lakon peridinNa ras Dareh KematenNa. Ia reh labo arah lau saja, tapi alu lau ras dareh. Janah Kesah e jine naksiken maka si enda tuhu tuhu, sabab Kesah e kebenaren kap. Lalit sada pe agama sideban ibas doni enda nai nai nari seh asa ndigan pe, dibatana NYATA bagi Tuhanta e. Jadi adi tek kita man Tuhan, Tuhanta e tuhu tuhu lit. Lanai mbera mbera, ataupun semoga.

Nyata, jelas. Pernah ia tubuh janah iperidiken (lau) Ence mate ka Ia Mbincar darehNa. Lau e bukti bahwa Tuhan Yesus eme jelmana. Labo kalak sideban. Ia iperidiken Johanes Pembabtis. JOhanes Pembabtis tandaina secara sangat meyakinkan Jesus e. Kenca bage : Tupung enggo dung Jesus iperidiken talang langit lit ka sora i Surga nari : “Enda me anakKu si kukelengi, ngena ateku Ia". Janah Tuhan Yesus siniperidiken e ka nge si mate ras mbincar darehNa. Lit darehNa.

Adi patung tah kayu, tah batu, tah gana gana sembah sembahenndu, lalit darehna. Dareh kambing, tah dareh manuk tah dareh menci ka nge bereken bana. Enda, kita, aku ras kam ras kerina kalak kristen si enggo ipilih TUhanta e tek Man Tuhan Yesus si enggo mbincar darehNa. La lit bentuk sembah sembahen man dibata dibata tah pe man dewa dewa sibelinen asangken mempersembahken dareh. Umumna jelma bas suku kai pe ipersembahkenna dareh man dewa dewana, termasuk si meganjangna ras sipaling menyeramkan dareh singuda nguda (perawan) ipersembahkenna.

Tapi kita kalak Kristen persembahen man Bapa lako nebusi dosanta emekap arah Dareh Yesus Kristus e sendiri. Emaka Tuhanta e enggo reh alu lau ras dareh. Jelma si lalit bas dagingna lau ras dareh pasti mate. Emaka lau ras dareh nge erbahanca manusia nggeluh. Janah lau peridin ras dareh Tuhana Yesus nge sierbahanca kita banci nggeluh rasa lalap ibas kekelengen Tuhanta Yesus.

Kesimpulenna. Tugas sipaling utama man kerina kalak kristen nggeluh i doni enda emekap tetap memelihara lau ras dareh Tuhan Yesus ibas pertendinna. Ibas Gerejanta GBKP hanya lit dua sakramen. Peridin (lau) ras Lakon persadaan Sibadia (Dareh Tuhan).
Lau--> peridin cukup sekali untuk selamanya.
Dareh--> Lakon persadaan Sibadia (anggur yang berubah secara substansia/simbol) perlu silakoken beberapa kali setiap tahun.

Naluken doni enda dage, tetap nginget peridinta si ertina kita enggo mate ras Tuhan tapi nggeluh ka mulihi ras Tuhan. Asa digan pe kita ikawaliNa. Ras pe tetaplah kita reh ku lakon (persadaan) sinibahan gerejanta. Adi siinget peridinnta, janah sipelimbarui secara terus menerus perukurennta arah Dareh Tuhan Yesus tentu banci kita naluken doni enda.

Labo aku ngatakensa, tapi Kesah si ngatakensa. Janah Kesah e la banci erbohong, sebab la lit kai pe sura sura Kesah selain mengataken kebenaran. Puji Tuhan.

Bujur bas aku nari impalndu ras teman sepelayanenndu