Kejadian 50 : 1 – 14
Thema : Ngelakoken Pedah Orang Tua,
Kejadian 50:1-14 (KARO) Idampesken Jusup bana ku babo bapana, itangisina, iemaina.
Kenca bage iperentahken Jusup gelah itamaken rempah-rempah ku mait bapana.
Bagi biasana empat puluh wari dekahna adi ngerempahi mait. Itangisi kalak Mesir Jakup pitu puluh wari dekahna.
Kenca nggo lepas paksa erceda ate nina Jusup man pegawai-pegawai raja, " Peseh lah berita enda man raja,
'Nandangi bapa mate, isuruhna aku erpadan man bana gelah kukuburken ia i kuburen si nggo isediaken i Kanaan. Erkiteken si e lawes aku lebe ngkuburken bapangku, janah kenca dung mulih ka aku. '"
Nina raja njabapsa, "To kuburken lah bapandu bagi si nggo ipadankenndu."
Emaka lawes me Jusup ngkuburken bapana. Kerina pegawai raja, kalak si erpangkat, ras kalak si mbelin i Mesir ngikut ras Jusup.
Keluargana, senina-seninana, kerina keluarga bapana ngikut ras ia. Si tading i daerah Gosen eme danak-danak si kitik denga, biri-biri, kambingna, lembuna.
Ikut pe kalak si ergereta perang ras si ngersak kuda. Lanai tanggung teremna kalak enda naruhkenca.
Kenca kalak enda seh i ingan ngerik i kuta Atat, arah matawari pultak Lau Jordan, ndekah ia i je tangis ngandung alu sora megang. Iban Jusup adat perngandungen pitu wari dekahna.
Kenca iidah rayat Kanaan kalak si erceda ate e i Atat nina, "Megogo kal ate ngidah adat perngandungen kalak Mesir e. " Eme sabapna maka iban gelar ingan e Abel Misraim. Cibalna arah Timur Lau Jordan.
Dage ilakoken anak-anak Jakup me bagi si iperentahken bapana man bana
Ibabana ia ku Kanaan, ikuburkenna i gua Mahpela, arah Timur Mamre i juma si itukur Abraham i bas Epron kalak Heti e man taneh kuburen.
Kenca nggo ikuburken Jusup bapana, mulih ia ku Mesir radu ras senina-seninana ras kerina kalak si ngikut i bas penguburan e.
Fakta Dan Makna
1. Idampesken Jusup bana ku babo bapana, itangisina, iemaina. Kenca bage iperentahken Jusup gelah itamaken rempah-rempah ku mait bapana.
Teridah kal uga getem na pusuh Jusuf ibas kematen Jakub bapana. Aminna pe ia anak si pe sepulusadaken, tapi idah uga deherna ia ras bapana. Lit sada nari agina emekap Benyamin, si nomor sepulu dua kerina anak anak Jakub.
Uga maka Jusup ndeher kal ras bapana Jakub lebihen asangken seninana kerina (tafsirenku) erkiteken Jusup nggit cakap cakap ras bapana. Ibegeiken na usur bapana, janah ia sendiri pe usur nuri nuri man bapana. Adi ernipi Jusup, man bapana leben turikenna. Jadi endame si erbahanca ndeher kal relationship antara bapa ras anak. Kerina anak anakta e pe, adilit 3 tah empat anakta, nen dahndu ise si usurna nggit ras kita cakap cakap ku ia nge ateta ertambat. Ia ateta si ngenana, lang keleng na seri nge ateta kelengna man kerina anakta e.
Emaka adi lit anakta 3 kalak misalna, harus lah lit waktuta cakap cakap secara personal ras teluna anak ta e. Adi nina Steven Covey “harus ada waktu orang tua untuk bercakap cakap secara pribadi (dua dua) dengan masing masing anak kita”. Tujuanna gelah seri ngenana ateta anakta e.
Aku kuterapkan kal sibage, emaka man teluna anak kami (sada diberu ras dua dilaki) kusediaken kel waktuku ercakap cakap ras masing masing anak kami e. Kam gia ma perlu akapndu bage ?
2. Peseh lah berita enda man raja, 'Nandangi bapa mate, isuruhna aku erpadan man bana gelah kukuburken ia i kuburen si nggo isediaken i Kanaan. Erkiteken si e lawes aku lebe ngkuburken bapangku, janah kenca dung mulih ka aku. '"
Kepeken man Jusuf lit sada amanah (pesan / pedah si seh kal pentingna) ibereken Jakup sanga ia nggeluh denga, sanga Jusup langa ibuang / idayaken ku Mesir (berarti usia Jusup remaja denga). Tapi pedah e iinget Jusup lalap asa geluhna. Emaka idalanken Jusup amanah bapana e sekalipun ia enggo pejabat paling tinggi i Mesir. Emaka idah kami lit dua point perenungen ibas hal enda emekap
i. Pedah orang tua harus dalankenndu, uga ganjangna pe pangkatndu, uga buena pe senndu, uga sibukna pe kam. Harta ras kinibayaken la terbandingken ras pedah orang tua.
ii. Orang tua ibas ia nggeluh denga harus memberikan amanah si banci idalanken anak.
Emaka lit sada si menantang ijenda, uga orang tua harus mampu mbereken pedah siinget anak asa umurna. Mungkin la perlu ku kerina anak, tapi minimal harus lit man anak siapai ibereken amanah e. Jadi pertanyaan man kita kerina : Seri nge amanah ras pasu pasu ????
3. Dage ilakoken anak-anak Jakup me bagi si iperentahken bapana man bana
Emaka itaruhken Jusuf me mait bapana ku Tanah Kanaan, janah ikuburken ibas tanah si itukur ninina Abraham. Janah sinaruhkensa i Mesir nari la tanggung buena, janah itangisi na bapa na alu ate megogo kal.
Sangap kal orang tua adi anakna ndalaken pedah na.
Sangap kal orang tua adi ibas geluhna idahna anak anakna ndalanken ajar ras kai siipedahkenna.
Tapi lit sada penungkunen penting, “uga maka nggit anak ndalanken pedah orang tuana, padahal situasi ras jaman enggo berubah?” Jaman orang tua, berbeda ras jaman anak anakna. Terlebih ibas masa sigundari enda, “ orang tua nggeluh ibas jaman telepon ras TV” sedangkan anak na nggeluh ibas jaman 5.0 jaman teknologi super tinggi ras Artificial Inteligent (AI)
Adi ninta kepatuhen e harus lit bas anak lako ngikutken ajar orang tua? Sada sisi payo. Tapi adi ajar e lanai relevan bas jaman anak anak ta, perlu nge anak anakta e harus ngikut ajar e ?
Ibas si enda idah kami solusina “ Ajar e harus beluh anak anak memaknai sa ibas jamanna”. Ajar e pasti mengandung rasa hormat ras keleng ate, emaka ajar si harus iikutken anak anak emekap, keleng ate ras rasa hormat na. Labo harus pasti bagi ajar orang tua secara leterlek . Uga akapndu mengenai si enda ?
Pengkenaina
• Mari kita diskusi lebih jauh ras lebih dalam ? Apai ngenda lebih utama “Anak harus ngelakoken pedah orang tua” asangken “orang tua harus mbereken ajar man anakna”?. Sebab lit kange anak anak si la jelas man bana ajar orang tua e. Aku sendiri pernah kusungkun anak anak si erlajar katekisasi. “Apa nasihat bapakmu sama kamu, ningku”. Lit si gampang akapna njawabsa tapi lalan ka anak anak e si la jelas kai kin ajar orang tua na man ia. Emaka idah kami point sipertama kal, orang tua harus beluh mbereken ajar man anak anakna. Janah ula min ajar e si terlalu egois, ras terlalu umum, ras terlalu jangka pendek. Jadi orang tua harus mempersiapkan ajar man anak anak na ras pe tetap notoken anakna gelah meriah akapna ndalanken ajar e, bagi Jusup.
• Sisi si peduaken, anak harus lah ndalanken ajar orang tuana. Sada hal si paling penting na kal, anak anak harus mendapatkan ras ndalanken ajar orang tuana e. Bahkan li bas pedah sepuluh, ajar singataken “anak harus hormat man nande bapana”. Hormat man nande bapa salah sada na, mbegiken ajarna ras ngelakokensa. Salah sada sumber kebahagiaan diri emekap ndalanken pedah / ajar orang tua. Emaka ise pe si atena berbahagia ibas geluhna harus lah ngelakoken pedah orang tua. Amin.
Bujur ras mejuah juah kita kerina.
Pt. Analgin Ginting (Magister Ministri)
Komentar