Ngalo Ngalo Kalimbubu

(Refleksi Lukas 10 : 38-42)

Adi bas sada paksa reh kalimbubu ndu ku rumahndu, tentu harus ituduhken kehamatenta nandangi kalimbubu e. “Dibata nidah”, nina kalak karo. Apai nge akapndu pentingen cara nghamatisa. Kuskas erbahan nakan pangan lako ipanna tah sikap kundul i lebe lebena megiken ranannd tah pe tenah sinibabana? Uga nindu, kam sienggo biasa kal ngalo ngalo kalimbubu reh kurumahndu?

La pe mis jawabndu banci nge yah. Si oge ras sitinggelken lebe uga ibahan Marta ras agina Maria ibas ia ngalo ngalo Yesus reh ku rumahna. E pe tuhu tuhu kal “Dibata si niidah”. Marta, kaka, jahan ibas penafsiren ngatakensa ia sekalak janda. Mis kal ia kuskas, mpesikap nakan pangan man Tuhan Yesus. Simehuli na kal atena ibahanna man Yesus, Tuhan ras sekaligus teman na kin. Umur na pe paksa e menam menam seri nge ras umur Tuhan Yesus.

Ibas Lukas 10 : 40 ikataken : Tapi Marta kuskas nikapken pangan; e maka murkas ia ideherina Jesus janah nina, "O Tuhan, la iperdiatekenNdu ipeturut seninangku aku sisada ndahiken kerina dahin e? Suruh min ia nampati aku!"
Latih akap Marta, ence idahna Maria agina, kundul ngenca lalap mbegiken pengajaren Tuhan Yesus. “Bas ukurna ngerana sisada ia, uga maka kundul lalap si beru nguda e, la kuidah ia nggit sitik pe nampati aku. Kita enggo cur cur panas ta e, diataina pe kita lang...,( rikutken dialek barusjahe, hehehee)

Tapi kai nina Yesus njabab: Lukas 10:41-42. Erjabap Jesus man Marta nina, "O Marta, Marta! Suhsah dingen gulut ukurndu sabap melala atendu ibahanndu, tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari."

Kepeken teridah kal Tuhan Yesus lebih memihak Maria, simegiken pengajarenNa. Janah nina man Marta, suhsah dingen gulut ukurndu sebab melala atendu ibahanndu.
Kesusahen e terjadi erkiteken melala ate ibahan. Tapi si melala e pe, ierbahanca suh sah e pe kepeken menurut Tuhan Yesus labo perlu.

Kai pe atendu ibahanndu, tapi erkiteken si e lanai begikenndu pengajaren Tuhan Yesus, eme erbahanca ukurndu suh sah. Melala dahinndu, lanai lit waktu ku gereja. Emaka absen kam ke gereja, lako ndahiken dahinndu ah ndai. Labo erbahanca kam dame, tapi erbahanca kam ersuh sahna.

Dage lanai padah kita erdahin cari makan pertua? Ku gereja saja kita kerina? Man tah la man, ku gereja saja kita?

Mungkin lit penungkunenndu bage, alu matandu si ikut njerleng e, sierbahanca bulung bulung kayu pe mugur mugur. Jawabna. Ue, sabab nina Tuhan Yesus ka..: Ngaloi Jesus nina, "Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata. (Matius 4: 4.)

Jadi adi mulihi kita kerna ngalo ngalo kalimbubu ndai, apa dage pentingen. Nikapken nakanna, tah mbegiken rananna? Uga jababndu? Adi menurutku pribadi, adi reh kal ia ku rumahta, duana nge perlu sibahan. Begiken rananna, sikapken ka panganna. Simehulina ban, erbagi tugas bas keluarga. Perbapan nggeleh manuk, pernanden nasakkensa. Tarum nande tengah jabu nasakken ras nikapken kerina acara makan e, sediaken kopi susu rikut pe ras roti kosongna. Gelah banci kalimbubu ncelupken rotina. Puas ia, rusur ia reh ku rumahndu. Adi kalimbubu rusur reh ku rumah anak beruna, pasti erlalana pasu pasu. Bagepe adi Tuhan Yesus rusur ialo alondu reh ku rumahndu, wooou pasu pasuNA seh kal belinna. Ma bage me ninta ?